ខេត្តមណ្ឌលគិរី ៖ ដោយអាកាសធាតុនៅខេត្តមណ្ឌលគិរីចាប់ផ្តើមចុះត្រជាក់ចាប់ពីចុងខែវិច្ឆិកានេះ ហើយទេសភាព តាមដងភ្នំប្រែពណ៌តាមរដូវកាល ហើយក៏បានអន្ទងចិត្តអ្នកទេសចរទៅអ្នកទស្សនាកម្សាន្តឥតដាច់សោះឡើយ ទោះបីមិនមែនថ្ងៃបុណ្យទាន ឬឈប់សម្រាកក្តី ។ ខណៈអាកាសធាតុអំណោយផលគួបផ្សំជាមួយប្រព័ន្ធផ្លូវធ្វើដំណើរល្អស្អាត…
ខេត្តមណ្ឌលគិរី ៖ ដោយអាកាសធាតុនៅខេត្តមណ្ឌលគិរីចាប់ផ្តើមចុះត្រជាក់ចាប់ពីចុងខែវិច្ឆិកានេះ ហើយទេសភាព តាមដងភ្នំប្រែពណ៌តាមរដូវកាល ហើយក៏បានអន្ទងចិត្តអ្នកទេសចរទៅអ្នកទស្សនាកម្សាន្តឥតដាច់សោះឡើយ ទោះបីមិនមែនថ្ងៃបុណ្យទាន ឬឈប់សម្រាកក្តី ។
ខណៈអាកាសធាតុអំណោយផលគួបផ្សំជាមួយប្រព័ន្ធផ្លូវធ្វើដំណើរល្អស្អាត នៅតាមរមណីយដ្ឋាននានានៅក្នុងខេត្តមណ្ឌលគិរី អាចទទួលស្វាគមន៍អ្នកទេសចរគ្រប់ពេលពេលវេលា ។ ជាមួយគ្នានេះ រដូវពណ៌មាស ដែលជាការហៅតគ្នារបស់អ្នករស់នៅខេត្តមណ្ឌលគិរី គឺពិតជាស្រស់ស្អាតខ្លាំងណាស់ ព្រោះតែវាលស្មៅដ៏ធំធេងបានផ្លាស់ប្តូរពណ៌ពីបៃតងទៅជាកំរាលព្រំមាសដាច់កន្ទុយភ្នែក ស្របជាមួយអាកាសធាតុក្រោម២០អង្សា គឺជាបទពិសោធន៏ដ៏អស្ចារ្យថ្មីសម្រាប់ដំណើរកម្សាន្តក្នុងប្រទេសដែលខេត្តដទៃមិនមានចំណុចទាំងនេះ។
ក្រៅពីភាពរីករាយដែលអ្នកទេសចរអាចទទួលបានដោយធម្មជាតិ គេនៅអាចទស្សនាកម្សាន្តតាមបណ្តារមណីយដ្ឋានកែច្នៃរាប់សិបកន្លែងដែលអ្នកវិនិយោគកំពុងសម្រុកអភិវឌ្ឍន៏ជារៀងរាល់ថ្ងៃ ។ រីឯការផ្គត់ផ្គង់ទីកន្លែងស្នាក់នៅ កន្លែងទទួលទានអាហារនានា អ្នកទេសចរលែងព្រួយបារម្ភដូចអំឡុង១០ឆ្នាំមុនទៀតហើយ ដ្បិតបញ្ហាទាំងនេះត្រូវបានដោះស្រាយយ៉ាងល្អប្រសើរពីប្រជាពល រដ្ឋដែលប្រកបរបរនេះ ដ្បិតការរីកចម្រើននាពេលសព្វថ្ងៃធ្វើឲ្យខេត្តមណ្ឌលគិរី មានផ្ទះសំណាក់ សណ្ឋាគារ រីស៊ត រាប់មិនអស់រង់ចាំស្វាគមន៏អ្នកដើរលេងកម្សន្ត។
ម្យ៉ាងដោយរដូវនេះ ជារដូវប្រមូលផលរបស់ប្រជាកសិករក្នុងតំបន់ អ្នកទេសចរក៏អាចស្វែងរកការទិញនូវផលិតផលធម្មជាតិដូចជា កាហ្វេ ម្រេច បន្លែ និងឱថសបុរាណ ពីអ្នកភូមិដែលបានតាំងលក់នៅតាមរមណីយដ្ឋាននានាផងដែរ៕
ចែករំលែកព័តមាននេះ