រាជធានីភ្នំពេញ៖ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលជារដ្ឋមន្ត្រីវ័យក្មេងមួយរូបទើបឡើងកាន់តំណែងថ្មីៗបាននិងកំពុងចុះតាមមូលដ្ឋានពិនិត្យមើលសកម្មភាពរបស់កសិករ និងការដាំដុះបន្លែ ពិសេសគឺការពង្រីកផលិតកម្មបន្លែ។…
រាជធានីភ្នំពេញ៖ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលជារដ្ឋមន្ត្រីវ័យក្មេងមួយរូបទើបឡើងកាន់តំណែងថ្មីៗបាននិងកំពុងចុះតាមមូលដ្ឋានពិនិត្យមើលសកម្មភាពរបស់កសិករ និងការដាំដុះបន្លែ ពិសេសគឺការពង្រីកផលិតកម្មបន្លែ។
លោករដ្ឋមន្ត្រីបានបង្ហោះរូបភាពមួយចំនួនដែលរូបលោកបានចុះទៅកាន់ទីតាំងមួយកន្លែងដែលមានការផលិតបន្លែ ដោយអមជាមួយសំណេរលើបណ្តាញសង្គមហ្វេសប៊ុកផេករបស់លោកកាលពីរាត្រីថ្ងៃទី ២១ ខេវិច្ឆិកា ថា «គោលដៅទៅថ្ងៃអនាគត គឺពង្រីកផលិតកម្មបន្លែ ជាពិសេសបន្លែមានសុវត្ថិភាព ដើម្បីឆ្លើយតបទៅនឹងកំណើននៃតម្រូវការអ្នកប្រើប្រាស់ ហើយកសិករត្រូវមានផែនការដាំដុះឱ្យបានត្រឹមត្រូវ និងច្បាស់លាស់»។
លោក ឌិត ទីណា បានសរសេរបន្តថា «ផលិតកម្មបន្លែមានសុវត្ថិភាព ត្រូវការផ្ទះសំណាញ់ដែលមានស្តង់ដារបច្ចេកទេស ដូច្នេះដើម្បីជួយឱ្យកសិករអាចផលិតបានតាមតម្រូវការក្រុមហ៊ុនប្រមូលទិញបន្លែគួរជួយសាងសង់ផ្ទះសំណាញ់ជូនកសិករ ដោយអនុវត្តកិច្ចសន្យាកសិកម្ម»។
ជាមួយនឹងការជម្រុញលើកទឹកចិត្តពលរដ្ឋខ្មែរក្នុងការដាំដុះនិងការធ្វើផលិតកម្មបន្លែមានសុវត្ថិភាពសម្រាប់សុខភាពអ្នកទទួលទាននោះ គេសង្កេតឃើញថា ការបង្ហោះរបស់លោករដ្ឋមន្ត្រីទទួលបានការចាប់អារម្មណ៍ជាច្រើនពីសំណាក់អ្នកប្រើប្រាស់បណ្តាញសង្គម ក្នុងនោះអ្នកប្រើប្រាស់បណ្តាញសង្គមចូលទៅបញ្ចេញមតិយោបល់។
តួយ៉ាង អ្នកប្រើប្រាស់បណ្តាញសង្គមមួយរូប បានចូលរួមបង្ហាញការយល់ឃើញដែលមានខ្លឹមសារថា «ខ្ញុំឆ្ងល់ដល់ហើយ ឯកឧត្តម នៅប្រទេសរបស់យើង កន្លងមកកសិករ ផលិតបន្លែបានហើយ តែថាគ្មានទីផ្សារ តែដល់ប្រជាជន ដែលនៅតាមខេត្តនានា ឬក៏ទីក្រុងនោះ ជាវឬក៏គាំទ្រ ផលិតផលក្នុងស្រុកនោះ បែរជារាល់ទំនិញទាំងនោះថ្លៃមួយគុណនិងពីរ ឬក៏គុណនិងបីក៏មានដែរ! របស់នាំចូលពីរជិតខាងអស់ថ្លៃដឹកជញ្ជូនឆ្ងាយ អស់ថ្លៃឆ្លងដែន និយាយរួមអស់ថ្លៃចំណាយច្រើនជាង ម៉េចក៏របស់នាំចូលទៅជាតម្លៃធូរថ្លៃជាង ទៅវិញ0x017d7»។ អ្នកប្រើប្រាស់បណ្តាញសង្គមខាងលើបានបន្តថា «នេះមួយចំណែកនូវមានច្រើនទៀត ដូចជា ត្រី សាច់សត្វគ្រប់ប្រភេត ផលិតផលកែឆ្នៃដោយកូនខ្មែរ ទាំងអស់ អោយតែផលិតបាន គឺមានតម្លៃថ្លៃជាង របស់នាំចូលពីជិតខាងទៅទៀត ! រួចតាំងនិយាយថា ខ្មែរមិនជួយខ្មែរ ខ្មែរមិនគាំទ្រផលិតផលខ្មែរជាដើម ! តើ កន្លងមក ឯកឧត្តម មានដែលគត់សំគាល់ ដូចជា ខ្ញុំដែរ ឬទេ បាទ ។ ខ្ញុំសូមអព្យាស្រ័យ ពី ឯកឧត្តម ផងចុះ ពីព្រោះ ខ្ញុំសិក្សាបានតិចតួចណាស់ ហើយក៏មិនយល់នូវបញ្ហាដូចជំរាបជូនខាងលើនោះដែរ ឯកឧត្តម បាទ!»។
ឆ្លើយតបនឹងការលើកឡើងខាងលើ លោករដ្ឋមន្ត្រីក្រសួងកសិកម្មបានបញ្ជាក់ថា បងប្អូនយើងគួរយល់អំពី បញ្ហាផលិតកម្មទ្រង់ទ្រាយតូច និងផលិតកម្មទ្រង់ទ្រាយធំ (small production VS Scale production)។
ដើម្បីដោះស្រាយបញ្ហាកាត់បន្ថយចំណាយថ្លៃដើម និងបង្កើនចំណេញដល់កសិករក្នុងស្រុក លោក ឌិត ទីណា បានពន្យល់ថា «កសិករយើងមានដីតូច ផលិតតិចៗ ប្រើមធ្យោបាយដោយខ្លួនឯងមនអាចប្រើមធ្យោបាយរួមបាន ដាំដុះដោយមិនមានផែនការជាទំហុំផលិតផលនិងពេលវេលាប្រមូលផលជាមួយតម្រូវការទីផ្សា។ ល។ មធ្យោបាយគឺការកែទម្រងរបៀបធ្វើកសិកម្មទាំងមូល។ ទាំងកសិករ ទាំងឈ្មួញកណ្ដាល ទាំងអ្នកលក់ ទាំងអ្នកទិញ ទាំងមន្ត្រីកសិកម្ម ត្រូវធ្វើការរួមគ្នាទើបជំនះបញ្ហាកាត់បន្ថយថ្លៃដើម និងបង្កើនចំណេញបានដល់គ្រប់គ្នាក្នុងច្រវាក់ផលិតកម្មបាន»។
យ៉ាងណាមិញ គ្រប់ការកែទំរង់គឺមិនអាចធ្វើឡើងត្រឹមរយៈពេលខ្លី ឬមួយរាត្រីឡើយ។ លោក ឌិត ទីណា ក៏បានបញ្ជាក់បន្ថែមថា «ខ្ញុំត្រូវការពេលមួយរួមផ្សំនឹងការកែប្រែឥរិយាបថរបស់ទាំងអស់គ្នា ទើបសម្រេចកំណែរទម្រង់ដ៏ធំនេះបាន»៕
ចែករំលែកព័តមាននេះ