ខេត្តត្បូងឃ្មុំ ៖ សម្តេច ហេង សំរិន ប្រធានរដ្ឋសភាអំពាវនាវ ឲ្យបងប្អូនប្រជាពលរដ្ឋទាំងអស់ថែរក្សាឲ្យបាននូវសមិទ្ធិផលដែលកើតមានក្រោយថ្ងៃ ៧ មករា ១៩៧៩ គឺសន្តិភាព និងការអភិវឌ្ឍ ដែលយើងខិតខំប្រឹងប្រែងរកដោយលំបាក ក្រោមការដឹកនាំរបស់គណបក្សប្រជាជនកម្ពុជា ។ ការអំពាវនាវរបស់ប្រធានរដ្ឋសភាធ្វើឡើង ជួបសំណេះសំណាលជាមួយលោកតា លោកយាយ បងប្អូនប្រជាពលរដ្ឋទូទៅ ប្រមាណជាង ២៥០០នាក់ កាលពីថ្ងៃទី១០ ឧសភា នៅក្នុងពិធីបុណ្យសម្ពោធដាក់ឲ្យប្រើប្រាស់ឡើងវិញនូវ ព្រះវិហារ និងសមិទ្ធផលនានា ក្នុងវត្តជម្ពូសុវណ្ណហៅវត្តត្រពាំងព្រីង ភូមិត្រពាំងព្រីងទី២ ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ ។
សម្តេចប្រធាន បានរំលឹកពីអនុស្សាវរីយ៍អតីតកាលដែលធ្លាប់បួសរៀននៅវត្តត្រពាំងព្រីងនេះ រហូតដល់លាចាកសិក្ខាបទក្នុងយុវវ័យ និងចូលរួមធ្វើនយោបាយក្នុងពេលនោះជាសកម្មជនគាំទ្រគណបក្សប្រជាជនបដិវត្តន៍ខ្មែរ និងចូលរួមចលនាតស៊ូដោយចេញមុខ ប្រឆាំងបរទេសឈ្លានពាន និងចូលរួមជាមួយអ្នកស្នេហាជាតិផ្សេងៗទៀត មានសម្តេច ជា ស៊ីម សម្តេច ហ៊ុន សែន ជាដើម វាយរំលំរបបប្រល័យពូជសាសន៍ ប៉ុល ពត រំដោះប្រទេសជាតិ និងប្រជាជនកម្ពុជា នាថ្ងៃ ៧ មករា ១៩៧៩ រួមគ្នាកសាង និងអភិវឌ្ឍន៍ប្រទេសជាតិអោយរីកចំរើនដូចបច្ចុប្បន្ន ។
សម្តេចប្រធានបានអំពាវនាវ អោយបងប្អូនប្រជាពលរដ្ឋទាំងអស់ថែរក្សាអោយបាននូវសមិទ្ធិផលដែលកើតមានក្រោយថ្ងៃ ៧ មករា ១៩៧៩ គឺសន្តិភាព និងការអភិវឌ្ឍ ដែលយើងខិតខំប្រឹងប្រែងរកដោយលំបាក ក្រោមការដឹកនាំរបស់គណបក្សប្រជាជនកម្ពុជា ។ ជាមួយគ្នានោះដែលសម្តេចប្រធានក៏បានអំពាវនាវអោយបងប្អូនប្រជាពលរដ្ឋទាំងអស់បន្តបោះឆ្នោតគាំទ្រគណបក្សប្រជាជនកម្ពុជា ក្នុងការបោះឆ្នោតជ្រើសតាំង ក្រុមប្រឹក្សាឃុំ សង្កាត់ នាថ្ងៃទី ៤ ខែមិថុនា ឆ្នាំ២០១៧ និងការបោះឆ្នោតសកលឆ្នាំ ២០១៨ ខាងមុខផងដែរ ៕
ចែករំលែកព័តមាននេះ