រាជធានីភ្នំពេញ ៖ ពេជ្រ សីហា មកពីសមាគមកីឡាប្រដាល់ក្រសួងការពារជាតិ និងថុល មករា មកពីក្លិបឃ្លាំងមឿងកីឡា ដែលបានបាត់មុខពីលើសង្វៀនប្រដាល់ជាច្រើនខែមកហើយនោះ ត្រូវបានគេរៀបចំឱ្យជួបប្រកួតជាមួយកីឡាករថៃនៅលើសង្វៀនទូរទស្សន៍ភីអិនអិន ថ្ងៃអាទិត្យទី១៤ ឧសភា ។
គូអន្តរជាតិទី១ កីឡាករកម្ពុជា ពេជ្រ សីហា ត្រូវជួបប្រកួតជាមួយកីឡាករថៃឈ្មោះខ្វាន់ អេក ក្នុងប្រភេទទម្ងន់៦៩គីឡូក្រាម។ កីឡាករថៃរូបនេះទោះបីមិនធ្លាប់មកប្រកួតនៅលើសង្វៀនទូរទស្សន៍ភីអិនអិនពីមុនមកមែន ប៉ុន្តែអ្នករៀបចំកម្មវិធីប្រកួតប្រចាំសង្វៀនមួយនេះហាក់ដូចជាដឹងច្បាស់ពីសមត្ថភាពកីឡាករថៃរហូតហ៊ាននិយាយថា បើសិនជាគេមិនខ្លាំងក៏មិនដាក់ឱ្យប្រកួតជាមួយ ពេជ្រ សីហាដែលជាជើងខ្លាំងល្បីឈ្មោះពិបាករកគូប្រកួតនោះដែរ ។ ទោះបីយ៉ាងណា ពេជ្រ សីហា មួយរយៈមកនេះហាក់ធ្លាក់កូដជាងមុនបន្តិចដោយសារមិនបានឡើងសង្វៀនញឹកញាប់ដូចមុនទើបការមកជួបកីឡាករថៃលើកនេះគេមិនទាន់ដឹងថាយ៉ាងណានោះទេ ។
គូអន្តរជាតិទី២ កីឡាករកម្ពុជា ថុល មករា ត្រូវជួបប្រកួតជាមួយកីឡាករថៃឈ្មោះ យ៉ត ផេត ក្នុងប្រភេទទម្ងន់៦៥គីឡូក្រាម ។ កីឡាករថៃរូបនេះត្រូវអ្នករៀបចំកម្មវិធីអះអាងថា ជាជើងខ្លាំងលំដាប់ជួរមុខមួយរូបនៅក្នុងប្រទេសថៃ ។
រីឯថុល មករា គឺជាអ្នកប្រដាល់ដែលមានចិត្តសឿងបំផុត ។ កីឡាកររូបនេះមិនសូវពូកែស្នៀតកែងនិងជង្គង់ទេ តែបើនិយាយពីស្នៀតជើងនិងស្នៀតកណ្ដាប់ដៃវិញគឺរស់រវើកតែម្ដង ។ ចាំមើលការជួបគ្នារវាងកីឡាករទាំង២លើកនេះអ្នកណាខ្លាំងជាងអ្នកណា ?
ចំណែកគូប្រកួតមិត្តភាពធម្មតាវិញមានកីឡាករ យ៉ង ប៊ុនហ៊ីម មកពីក្លិបខេត្តបាត់ដំបង ប្រកួតជាមួយកីឡាករ ចាន់ ស៊ីណាត មកពីក្លិបសាមគ្គីកូនខ្មែរ និងកីឡាករ ចូច ង៉ា មកពីក្លិបរាជសីហ៍ខេត្តបន្ទាយមានជ័យ ប្រកួតជាមួយកីឡាករ ចាន់ សច្ចា មកពីក្លិបតាព្រហ្មមានជ័យ ៕
ចែករំលែកព័តមាននេះ