ខេត្តត្បូងឃ្មុំ ៖ អតីតកម្មករម្នាក់រួមនិងបក្សពួកម្នាក់ទៀត បានព្យាយាមប៉ងលួចម៉ូតូ១គ្រឿងម៉ាកហុងដាឌ្រីម C125ស៊េរី២០១២មួយគ្រឿងដែលគេទុកនៅក្រោមផ្ទះ ។ ហេតុការណ៏បានកើតឡើងនៅវេលាម៉ោង១និង៣០នាទីយប់រំលងអធ្រាត្យ ឈានចូលព្រឹកថ្ងៃទី១០ ខែឧសភា ឆ្នាំ២០១៧ ត្រង់ចំនុចភូមិទី៦ ឃុំស្វាយឃ្លាំង ស្រុកក្រូចឆ្មារ ត្រូវបានម្ចាស់ម៉ូតូនិងសម្ថកិច្ច ព្រមទាំងប្រជាពលរដ្ឋនាំគ្នាដេញតាមចាប់ទាំង២នាក់ហើយមុខសញ្ញានេះ គឺប្រើប្រាស់គ្រឿងញៀនថែមទៀតផង ។
លោកវរសេនីយ៏ត្រី អ៊ុក ពៅ អធិការរងនគរបាលស្រុកក្រូចឆ្មារ ប្រាប់ឲ្យដឹងនៅព្រឹកថ្ងៃទី១១ ឧសភាថាម៉ូតូដែលក្រុមចោរប៉ងលួចមិនបានសំរេចនេះ ត្រូវបានម្ចាស់ឈ្មោះ ស៊ុយ ណារ៉ុម ភេទប្រុស អាយុ៥០ឆ្នាំ រស់នៅភូមិឃុំខាងលើ ចាក់សោរទុកនៅខាងក្រោមផ្ទះត្រឹមត្រូវដូចសព្វមួយដង ហើយក៏មិនដែលមានបញ្ហារណាមួយកើតឡើងដែរ ។ លោកវរសេនីយ៏ត្រី អ៊ុក ពៅ អធិការរងនគរបាលស្រុកក្រូចឆ្មារ ប្រាប់បន្តថា រហូតដល់វេលាយប់ជ្រៅឈានចូលព្រឹកថ្ងៃទី១០ឧសភា ស្រាប់តែមានចោរចំនួន២នាក់បាននាំគ្នាមកធ្វើសកម្មភាពលួចម៉ូតូតែត្រូវបានម្ចាស់ដឹងទាន់ក៏ស្រែកឆោឡោរឡើង ធ្វើឲ្យចោរមានការភិតភ័យក៏នាំគ្នារត់គេចខ្លួន ។ បុរសជាម្ចាស់ម៉ូតូបានប្តឹងមកប៉ុស្តិ៍រដ្ឋបាលឃុំស្វាយឃ្លាំងនិងអធិការនគរបាលស្រុក ដើម្បីឲ្យជួយអន្តរាគមន៏តាមចាប់ក្រុមចោរមនុស្សម្នារជាច្រើននាក់បាននាំគ្នារត់ដេញតាមចោរ មកដល់ត្រង់មាត់ព្រែកដែលមានទឹកនោះ ក៏បានឃើញជនសង្ស័យម្នាក់ឈ្មោះ ឈឿន សារឿន ភេទប្រុស អាយុ១៨ឆ្នាំ រស់នៅភូមិទី៦ ឃុំស្វាយឃ្លាំង ស្រុកក្រូចឆ្មារ លុះពេលដែលបាននាំខ្លួនកាន់ អធិការដ្ឋាននគរបាល ស្រុកសួរនាំ បានឆ្លើយសារភាពក៏ឈានទៅចាប់បក្សពួកម្នាក់ទៀតឈ្មោះ រិន ធារ៉ា ភេទប្រុស អាយុ២៣ឆ្នាំ ជាមុខសញ្ញាប្រើប្រាស់គ្រឿងញៀនដែលជាអ្នកបបួលលួយម៉ូតូខាងលើនេះ ។
លោកវរសេនីយ៏ត្រី អ៊ុក ពៅ អធិការរងនគរបាលស្រុកក្រូចឆ្មារ បានរំលឹកថា ជនទី២ឈ្មោះ រ៉ា នេះធ្លាប់នៅជាកម្មករធ្វើថ្នាជក់ឲ្យបុរសខាងលើជាម្ចាស់ម៉ូតូបាន៣ឆ្នាំ ដោយបានស្គាល់ពីស្ថានភាពកន្លែងទុកដាក់ផ្សេងៗរបស់ម្ចាស់ផ្ទះផងដែរ ។ លុះមកដល់ឆ្នាំ២០១៧ជននេះបានឈប់ធ្វើការ ជាមួយក៏បានបែកគំនិតបបួលបក្សពួកមកលួចម៉ូតូរបស់ថៅកែថ្នាំជក់ តែមិនបានសំរេចក៏ត្រូវបានសមត្ថកិច្ចស្រាវជ្រាវចាប់បានទាំង២នាក់តែម្តង ។ ជនទាំងនេះគឺជាមុខសញ្ញាប្រើប្រាស់គ្រឿងញៀន ស្ថិតនៅក្រោមការគ្រប់គ្រងរបស់សមត្ថកិច្ចផងដែរ ៕
ចែករំលែកព័តមាននេះ