បុគ្គលគ្រប់រូបតែងចង់ឱ្យគេស្រឡាញ់ចូលចិត្ត ជាមនុស្សមានទឹកចិត្តល្អ និងទន់ភ្លន់ជាមួយអ្នកដទៃ ។ ប៉ុន្តែឥរិយាបថនេះ មិនមែនមនុស្សគ្រប់គ្នាសុទ្ធតែមានទេ ព្រោះពេលខ្លះយើងបែរជាមានឥរិយាបថមិនសមគួរ និង
បុគ្គលគ្រប់រូបតែងចង់ឱ្យគេស្រឡាញ់ចូលចិត្ត ជាមនុស្សមានទឹកចិត្តល្អ និងទន់ភ្លន់ជាមួយអ្នកដទៃ ។ ប៉ុន្តែឥរិយាបថនេះ មិនមែនមនុស្សគ្រប់គ្នាសុទ្ធតែមានទេ ព្រោះពេលខ្លះយើងបែរជាមានឥរិយាបថមិនសមគួរ និងក្លាយជាបុគ្គលមិនគួរឱ្យសេពគប់ គួរឱ្យរំខាន និងគ្មានអ្នកណាចូលចិត្ត ។ យើងសាកល្បងពិនិត្យខ្លួនឯងមើលថា តើមានឥរិយាបថដូចខាងក្រោមនេះឬទេ ប្រសិនបើមាន ត្រូវឈប់ប្រព្រឹត្ត ហើយកែតម្រង់ឡើងវិញ ។
១-និយាយតែរឿងរបស់ខ្លួន ៖
មនុស្សជាច្រើនមានឥរិយាបថបែបនេះដោយមិនដឹងខ្លួន ។ នៅពេលដែលអ្នកចាប់អារម្មណ៍តែលើខ្លួនឯង និយាយតែរឿងរ៉ាវផ្ទាល់ខ្លួនជាញឹកញាប់ គួរតែលះបង់វាចេញ ។ បើអ្នកមានឥរិយាបថបែបនេះ គឺដល់ពេលវេលាត្រូវផ្លាស់ប្តូរវាហើយ ព្រោះគ្មាននរណាចង់សេពគប់ជាមួយបុគ្គលចាប់អារម្មណ៍តែរឿងខ្លួនឯងទេ ។ អ្នកអាចបើកឱកាសឱ្យអ្នកដទៃបាននិយាយរឿងរបស់ពួកគេខ្លះផង។
២-ចាប់អារម្មណ៍តែផ្នែកខាងក្រៅ ហើយមើលរំលងផ្នែកខាងក្នុង ៖
រូបរាងខាងក្រៅមិនមែនជាភាពដែលស្រស់ស្អាតទាំងអស់ទេ ព្រោះភាពស្រស់ស្អាតពិតប្រាកដ គឺស្ថិតនៅចិត្តគំនិត ។ មនុស្សមានឥរិយាបថមិនគួរឱ្យសេពគប់ តែងផ្តល់ភាពសំខាន់លើរូបរាងខាងក្រៅ ។ បើអ្នកមានចរិតបែបនេះ ហើយមិនព្រមកែប្រែអាកប្បកិរិយានេះចេញទេ អាចសាកល្បងឆ្លុះកញ្ចក់ ហើយមើលឱ្យជ្រៅដល់ខាងក្នុងសាកមើល អ្នកនឹងឃើញស្រមោលដែលគួរឱ្យស្អប់នៅក្នុងនោះ ។
៣-ចូលចិត្តប្រកួតប្រជែងគ្រប់ពេល ៖
ការដែលអ្នកក្លាយជាមនុស្សចូលចិត្តខ្វាយខ្វល់ចង់ប្រជែងគ្រប់ពេល តើនឹងអាចយកឈ្នះលើអ្នកដទៃបានរហូតមែនទេ ? បើមែន វាជាហេតុផលដែលធ្វើឱ្យអ្នកក្លាយជាមនុស្សមិនគួរចូលក្បែរ ។ អ្នកគួរតែបារម្ភពីមិត្តភក្តិឱ្យច្រើនជាងនេះ និងបណ្តោយឱ្យពួកគេរស់នៅតាមបែបរបស់គេ ដូចជា បើអ្នកឃើញមិត្តភក្តិកំពុងតែធ្វើអ្វីមួយ ហើយអ្នកនិយាយថា ៖ « ធ្វើបានតែប៉ុណ្ណឹងឬ ខ្ញុំធ្វើបានច្រើនជាងនេះទៀត » ។ អ្នកអាចប្តូរការគិតបែបនេះ ហើយនិយាយដោយផ្តល់កម្លាំងចិត្តដល់ពួកគេជំនួសវិញថា ៖ « អូហូ! ឯងធ្វើបានល្អណាស់ ខ្ញុំមានមោទនភាពចំពោះរូបឯង ចូរព្យាយាមបន្តទៀត»… វានឹងប្រសើរជាង ។
៤-មើលមិត្ត ជាសត្រូវ ៖
មនុស្សប្រភេទនេះ ជាញឹកញាប់ តែងមានអារម្មណ៍ចង់ប្រកួតប្រជែងជាមួយអ្នកដទៃ ជាជាងសហការគ្នាជាក្រុម ។ ពួកគេមិនអើពើជាមួយមិត្តភក្តិ ហើយបែរជាចាក់ពីក្រោយខ្នងទៅវិញ ។ មិត្តភក្តិ មិនមែនជាសត្រូវទេ ព្រោះពួកគេនៅក្នុងក្រុមតែមួយជាមួយអ្នក ។
៥-ទាមទារតែលើភាពសំខាន់របស់ខ្លួន ៖
អ្នកនឹងកាន់តែក្លាយជាបុគ្គលមិនគួរឱ្យចូលចិត្តថែមទៀត បើសិនជាអ្នកគិតតែសួរថា ហេតុអ្វីបានជាអ្នកដទៃមើលមិនឃើញពីតម្លៃរបស់អ្នក ដូចជា ពេលមិត្តរបស់អ្នកទៅកម្សាន្តតែ២នាក់ ហើយភ្លេចបបួលអ្នក ដែលពួកគេគិតថា វាជារឿងធម្មតា តែអ្នកបែរជាមិនពេញចិត្ត ។ ជីវិតពួកគេអាចរស់នៅបាន ទោះបីជាគ្មានរូបអ្នកនៅជាមួយក្តី ។
៦-ចូលចិត្តបង្គាប់បញ្ជា ៖
នៅក្នុងក្រុមមិត្តភក្តិគួរតែស្មើៗគ្នា បើសិនជាអ្នកសម្រេចចិត្តអ្វីមួយក្នុងក្រុមតែម្នាក់ឯងរហូត នោះ ដោយបង្គាប់បញ្ជា ហើយព្យាយាមត្រួតត្រាអ្វីដែលអ្នកដទៃកំពុងធ្វើគ្រប់ពេលបង្ហាញថា អ្នកកំពុងមានឥរិយាបថមិនគួរឱ្យសេពគប់ ។
៧-មិនស្មោះត្រង់ ៖
ភាពស្មោះត្រង់ គឺមិត្តភក្តិល្អតែងប្រកាន់យក ហើយមនុស្សគ្រប់រូបគួរតែមាន ។ បុគ្គលមិនគួរឱ្យចូលក្បែរ គឺគ្មានភាពមិនស្មោះត្រង់ និងចូលចិត្តកុហកគ្រប់រឿង ។ កុំភ្លេចថា ភាពស្មោះត្រង់ជារឿងសំខាន់បំផុតក្នុងចំណងមិត្តភាព និងបង្កើតទំនុកចិត្តផងដែរ ។
៨-ទ្រគោះបោះបោក ៖
បើសិនជាអ្នកមានអត្តចរិតមិនសុភាព ឬធ្វើឱ្យអ្នកដទៃលក់មុខចំពោះសាធារណជន ដោយភាពទ្រគោះបោះបោករបស់អ្នក ចូរបញ្ឈប់វា មុននឹងត្រូវមិត្តភក្តិបោះបង់ ។ ពេលខ្លះដោយសារតែអ្នកមើលមិនឃើញអ្វីដែលអ្នកដទៃមើលឃើញ តែវាមិនចាំបាច់ឡើយដែលអ្នកត្រូវបង្ហាញអត្តចរិតមិនសុភាពចំពោះទស្សនៈផ្សេងគ្នា ព្រោះអ្នកដទៃមើលឃើញតែឥរិយាបថអាក្រក់ច្រើនជាងគំនិតរបស់អ្នក ។
៩-ជាបុគ្គលពឹងពាក់មិនបាន តែបែរជាសុំជំនួយពីអ្នកដទៃ ៖
នៅពេលមិត្តភក្តិមានទុក្ខ តើអ្នកបានជួយអ្វីខ្លះដល់ពួកគេ ? ឬអ្នករវល់ជាប់ រហូតគ្មានអ្នកណាម្នាក់អាចពឹងពាក់អ្នកបាន ។ បើសិនជាដូច្នោះ អ្នកក៏កំពុងក្លាយជាមនុស្សមិនគួរឱ្យសេពគប់ ។ ផ្ទុយទៅវិញ បើអ្នកគិតតែសុំជំនួយពីអ្នកដទៃ តែមិនធ្លាប់ជួយពួកគេវិញ នឹងគ្មានអ្នកណាម្នាក់ចង់ធ្វើជាមិត្តជាមួយទេ ។
១០-តែងមើលពិភពខាងក្រៅក្នុងផ្លូវអាក្រក់៖
ការមើលពិភពខាងក្រៅក្នុងផ្លូវអាក្រក់ វាមិនមែនជាគុណសម្បត្តិទេ ។ បើសិនជាអ្នកមើលទៅពិភពខាងក្រៅក្នុងផ្លូវអវិជ្ជមាន គិត និងនិយាយតែរឿងអាក្រក់ៗ អ្នកអាចផ្លាស់ប្តូរឥរិយាបថជាថ្មី ដោយមើលពិភពខាងក្រៅក្នុងផ្លូវវិជ្ជមានឱ្យច្រើន ៕
ចែករំលែកព័តមាននេះ