ខេត្ដពោធិ៍សាត់ ៖ ប្ដីប្រពន្ធដែលកូនលង់ទឹកប្រឡាយស្លាប់៣នាក់ ទោះបីជាបានធ្វើបុណ្យចប់សព្វគ្រប់ហើយក៏ដោយ ក៏សប្បុរសជនក្នុងប្រទេស និងក្រៅប្រទេសមួយចំនួនដែលមានអារម្មណ៍ដក់ចិត្ដអាណិតខ្លោចផ្សានោះនៅតែមានសទ្ធាជ្រះថ្លាជួយជាបន្ដបន្ទាប់ ។
ជាក់ស្ដែងអំណោយលើកទី២ តាមរយៈកោះសន្ដិភាពនាពេលនេះ មានទឹកប្រាក់ចំនួន៦៨៧.៧០០រៀល និង២១៩ដុល្លារសហរដ្ឋអាមេរិកបានមកពីសប្បុរសជនចំនួន៤៧ ក្នុងនោះមានក្រុមបណ្ដាញមិត្ដភាពឆ្នាំ៩៧ និងសប្បុរសជនក្នុង និងក្រៅប្រទេសដូចជា៖
-ស៊ុន ចាន់ថន, ជា វាសនា សុវណ្ណ, Suy Thavara, Leng, Mareth, Kim Sung, Sam, ពុំ វាសនា, ប៉ែន ចាន់លៀង, ប៉ែន មីនា, គង់ វីរៈសេដ្ឋា, ស៊ុន សុភក្ដ្រិ, ថេម វណ្ណា, រស់ បណ្ដុស, ឈួរ អេឡែត, ភិរម្យ, សូយ ចិន្ដា, គង់ មេត្ដា, ម៉ា ប៊ុនសែងឫទ្ធី, សោម វិសាល, លី ជូខេង, ចាន់ ឫទ្ធី, សុត ញ៉ច, សឿង ណារិទ្ធ, ជួប ឥសាន្ដ, ឆៃ សុភារី, គា គឹមហុង, ហ៊ាន វាសនា, ប៉ែន មិថុនា, សេង ទនធារិទ្ធិ, ឃុន រចនា ។
សប្បុរសជនខាងលើសូមបួងសួងឱ្យក្រុមគ្រួសារខាងលើ ចាកផុតពីសោកនាដកម្មបែបនេះនៅគ្រប់ជាតិខាងមុខ។ ទន្ទឹមនឹងនេះដែរ ក្រុមបណ្ដាញមិត្ដភាពឆ្នាំ៩៧ ក៏សូមឧទ្ទិសកុសលផលបុណ្យនេះជូនចំពោះវិញាណក្ខន្ធ អ្នកគ្រូ សោ គឹមកូយ ដែលបានទទួលមរណភាពកាលពីពេលថ្មីៗកន្លងមក ។
ថវិកាទាំងអស់នេះត្រូវបានភ្នាក់ងារកោះសន្ដិភាពប្រចាំខេត្ដពោធិ៍សាត់នាំយកទៅប្រគល់ជូនដល់ដៃឪពុកម្ដាយសពក្មេងទាំង៣នាក់ កាលពីល្ងាចថ្ងៃទី១៨ កុម្ភៈ ឆ្នាំ២០១០ ដល់លំនៅឋានដោយមានអ្នកជិតខាងចូលរួមផងដែរ ។
ឪពុកម្ដាយ ជីតា និងអ៊ំរបស់ក្មេងរងគ្រោះ ទាំង៣នាក់បានលើកដៃទទួលថវិកាទាំងរលីងរលោងទឹកភ្នែក និងអួលដើម.កដោយពួកគាត់និយាយថា
ទី១-នឹកឃើញសពកូនទាំង៣នាក់ ហាក់បីដូចជានៅនឹងមុខ ខណៈពេលគេស្រង់មកដាក់លើគោកតំរៀបគ្នាដូចដេកលក់ដែលប៉ុន្មានថ្ងៃមុនរត់ប្រលែងគ្នាលេងជុំវិញផ្ទះសោះ។
ទី២-រំភើបរីករាយ ដែលសប្បុរសជនលោកបានរួមចំណែកជួយរំលែកទុក្ខក្រៀមក្រំតាមរយៈកាសែតកោះសន្ដិភាពដោយបានផ្ញើថវិកាមកជូននាពេលនេះ ក៏ដូចជាកាលបុណ្យសពគំរប់៧ថ្ងៃផងដែរ ។
ថវិកាទាំងនេះនឹងបានដោះស្រាយនូវកង្វះខាតផ្សេងៗលើការចំណាយធ្វើបុណ្យសពក្មេងទាំង៣នាក់កន្លងមក ព្រមទាំងបានជួយសំរួលដល់ជីវភាពគ្រួសារពួកគាត់ក្នុងជីវិតជាកម្មករសំណង់ដែលពេលនេះរស់នៅទាំងសោកសង្រេងពីរនាក់ប្ដីប្រពន្ធ ព្រោះតែកូនលង់ទឹកស្លាប់ម្ដងទាំង៣នាក់ ។ ពួកគាត់ បានជូនពរដល់សប្បុរសជនទាំងអស់ ទោះកើតជាតិណាៗ សូមឱ្យមានសុខភាព និងរូបរាងល្អ ប្រាជ្ញាឈ្លាសវៃជួបតែសេចក្ដីសុខសេចក្ដីចំរើន កុំឱ្យស្គាល់ក្រលំបាកវេទនា ហើយបច្ចុប្បន្ននេះទោះជាបំរើការងារ ឬ ប្រកបមុខរបរអ្វីក៏ដោយសូមឱ្យទទួលជោគជ័យគ្រប់ពេលវេលា ។
គួររំលឹកថា គ្រួសារខាងលើមានឪពុក ឈ្មោះនាង គឹមសេង អាយុ២៨ឆ្នាំ ប្រពន្ធឈ្មោះស៊ីវ រ៉ន អាយុ៣៤ឆ្នាំ ជាកម្មករសំណង់រស់នៅភូមិក្រាំងតាសែន សង្កាត់ព្រៃញី ក្រុងពោធិ៍សាត់ ។ កាលពីថ្ងៃទី២ កុម្ភៈ ឆ្នាំ២០១០ កូនចំនួន៣នាក់ ដែលកូនស្រីទី១-អាយុ៨ឆ្នាំ កូនស្រីទី២ អាយុ៧ឆ្នាំ និងកូនប្រុសទី៣ អាយុ៤ឆ្នាំ បានលង់ទឹកប្រឡាយក្បែរផ្ទះស្លាប់ ខណៈពេលឪពុកម្ដាយរវល់ជូនបងប្អូនអ្នកជិតខាងទៅសំរាលកូននៅឯមន្ទីរពេទ្យ ហើយទុកកូនទាំង៣នាក់ឱ្យនៅចាំផ្ទះ។ ដោយឃើញគ្រួសារមានជីវភាពក្រីក្រជីវិតជាកម្មករសំណង់ ហើយកូនស្លាប់ម្ដងទាំង៣នាក់ សប្បុរសជននានាបានផ្ញើថវិកាមួយចំនួនមកចូលរួមបុណ្យសពជាបន្ដបន្ទាប់ ឯនេះគឺជាលើកទី២ផងដែរដែលសប្បុរសជនបានផ្ញើមកជួយឧបត្ថម្ភតាមរយៈការិយាល័យនិពន្ធកោះសន្ដិភាព ។
ចែករំលែកព័តមាននេះ