តារាចម្រៀងនាង ឌី សូនីតា បានទម្លាយរឿងរ៉ាវដែលម្តាយរបស់នាងបានទន្ទឹងរង់ចាំភាពជោគជ័យលើវិថីសិល្បៈរបស់នាងប្រមាណជាង១០ឆ្នាំមកហើយ ក្រោយពេលនាងទើបតែសម្រេចគោលដៅលើកពានកម្មវិធី
រាជធានីភ្នំពេញ ៖ តារាចម្រៀងនាង ឌី សូនីតា បានទម្លាយរឿងរ៉ាវដែលម្តាយរបស់នាងបានទន្ទឹងរង់ចាំភាពជោគជ័យលើវិថីសិល្បៈរបស់នាងប្រមាណជាង១០ឆ្នាំមកហើយ ក្រោយពេលនាងទើបតែសម្រេចគោលដៅលើកពានកម្មវិធី I’m a singer Cambodia រដូវកាលទី៣ កាលពីពេលថ្មីៗនេះ។
ស្រីស្អាត ឌី សូនីតា បានសម្តែងក្តីរំភើបក្តុកក្តួលលាយឡំដោយទឹកភ្នែក ក្នុងពេលដែលនាងបានសម្រេចគោលដៅដ៏ធំសម្រាប់វិថីសិល្បៈ ក្រោយការឈ្នះពាននៃកម្មវិធីប្រឡងចម្រៀងដ៏ធំមួយនេះ។ ការទទួលពានខាងលើនេះ ពីស្រីស្អាត ឌី សូនីតា មិនត្រឹមតែជាការសម្រេចគោលដៅដ៏សំខាន់នៅក្នុងឆាកជីវិតរបស់នាងតែម្នាក់ប៉ុណ្ណោះទេ ពោលគឺវាក៏ជាការសម្រេចបានសម្រាប់ការចង់បានពីម្តាយរបស់នាងដែលរង់ចាំអស់រយៈពេលជាង១០ឆ្នាំមកនេះ។
ក្រោយលើកពានខាងលើនេះ ស្រីស្អាត ឌី សូនីតា បានទម្លាយរឿងរ៉ាវម្តាយរបស់នាងដែលស្ថិតនៅពីក្រោយនៃភាពជោគជ័យរបស់នាងនាពេលនេះ តាមរយៈសំណេរដែលបានបង្ហោះតាមបណ្តាញសង្គមហ្វេសប៊ុកថា «ម៉ែអើយ… កូនធ្វើបានជូនម៉ែហើយ ម៉ែអាចនឹងកម្សត់ពីក្មេង តែកូននឹងកែប្រវត្តិសាស្ត្រកម្សត់របស់ម៉ែដោយស្នាដៃកូនណាម៉ែ សូមទោសដែលកូនអោយម៉ែរង់ចាំភាពជោគជ័យលើវិស័យចម្រៀង ដែលម៉ែស្រលាញ់ឡើងជាង១៥ឆ្នាំ ការរង់ចាំ១៥ឆ្នាំរបស់ម៉ែបានសម្រេចហើយ វាអាចនឹងយឺតបន្តិចមែនម៉ែ តែវាមានន័យនៅចុងបញ្ចប់ណាម៉ែ»។
នាងថា «ទីបំផុត កូនឈ្នះខ្លួនឯង ឈ្នះឧបសគ្គ ឈ្នះបញ្ហាគ្រប់រឿងដោយក្តីស្រលាញ់ ដោយបេះដូងបរិសុទ្ធរបស់ម៉ែចំពោះកូន គ្មានឡើយពាក្យថាយឺតសម្រាប់ក្តីស្រលាញ់ និងការតស៊ូ អរគុណដល់មនុស្សពិសេសបំផុតក្នុងជីវិតរបស់ខ្ញុំ ជា idol ហើយក៏ជា fan មួយរូប និងដំបូងបំផុតរបស់កូនក្នុងឆាកជីវិត»។
ស្រីស្អាត ឌី សូនីតា បានលើកឡើងបន្ថែមថា «មនុស្សស្រីម្នាក់ដែលតែងតែបង្រៀនកូនអោយរៀនបង្កើតក្តីស្រម៉ៃ និងសុបិន្តឲ្យក្លាយជាការពិត ពាក្យគ្រប់ម៉ាត់ដែលចេញពីមាត់គាត់ ដោយក្តីស្រលាញ់ និងមេត្តា «កូនចង់ទទួលបានលទ្ធផលល្អ កូនត្រូវតែធ្វើ មិនមែនគ្រាន់តែនិយាយគ្រប់គ្រាន់នោះទេ» ទង្វើ និងការខិតខំប្រឹងប្រែង វាមិនរើសមនុស្សប្រភេទណាដែលវាគួរតែនៅនោះទេ មានន័យថា «អ្នកមាន ឬអ្នកក្រ អោយតែប្រឹងពិតប្រាកដហើយ យើងនឹងទទួលបានផលមកពីការប្រឹងរបស់យើងតាមផលដែលយើងប្រឹងមិនថា តិច ឬច្រើន»។
នាងបញ្ជាក់ថា «ម៉ែនៅតែជាស្ត្រីម្នាក់ដែលអស្ចារ្យ ដែលតស៊ូតែម្នាក់ឯងដើម្បីកូនៗ ម៉ែហត់ណាស់ ម៉ែនឿយណាស់ ម៉ែមិនដែលសម្រាក ម៉ែមិនចេះប្រែទម្លាប់ឧស្សាហ៍ និងឆ្លៀតរបស់ម៉ែតាំងពីកូននៅតូចរហូតមកដល់ពេលនេះ ទាំងអស់នេះហើយដែលជាស្ពានចម្លងកូនម៉ែ អោយកូនម៉ែរឹងមាំដូចម៉ែ។ 2016_2022 អ្វីដែលម៉ែចង់បាន កូនធ្វើជូនអស់ហើយ ពានទាំងពីរដែលម៉ែចង់បាន តារាសម្តែង និងតារាចម្រៀង និងរង្វាន់នាឡិកាដែលជាការលើកទឹកចិត្តពីកម្មវិធី ជាតារាគោរពការងារ និងពេលវេលា»។
ជាការកត់សម្គាល់ ស្រីស្អាត ឌី សូនីតា បានទទួលពាននៃកម្មវិធី Iam a singer Cambodia រដូវកាលទី៣ វគ្គផ្តាច់ព្រ័ត្រដែលបានធ្វើឡើងកាលពីថ្ងៃទី១៩ ខែវិច្ឆិកា ឆ្នាំ២០២២ នេះ៕
ចែករំលែកព័តមាននេះ