ខិលខូចហើយនៅតែមិនដឹងខ្លួន
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងថា
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងថាគណបក្សប្រឆាំងមិនដែលទទួលស្គាល់ការពិតនូវទង្វើរបស់ខ្លួនឡើយទោះបីជាខ្លួនបានធ្វើខុសក៏ដោយ ។ ការលើកលើកឡើងរបស់អ្នកនាំពាក្យគណបក្សកាន់អំណាចខណៈដែលមេបក្សប្រឆាំងលោក កឹម សុខា នៅសហរដ្ឋអាមេរិកបានលើកឡើងថា គណបក្សកាន់អំណាចកំពុងធ្វើទុក្ខបុកម្និញលើគណបក្សប្រឆាំង ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានឲ្យដឹងនៅថ្ងៃទី១០ ខែឧសភា ឆ្នាំ២០១៧ ថ្នាក់ដឹកនាំគណបក្សសង្គ្រោះជាតិបានបើកធ្វើសមាជវិសាមញ្ញរបស់ខ្លួនដើម្បីជ្រើសរើសអនុប្រធានគណបក្ស ដោយយោងតាមប្រការ៤៧នៃលក្ខន្តិកៈគណបក្ស ។ ក៏ប៉ុន្តែបន្ទាប់ពីជ្រើសរួចហើយក្រសួងមហាផ្ទៃមិនទទួលស្គាល់សមាសភាពអនុប្រធានទាំងបីរូបនោះទេ ដោយយកហេតុផលថា មិនត្រូវ តាមស្មារតីនៃលក្ខន្តិកៈគណបក្សដែលតម្រូវឲ្យជ្រើសក្នុងរយៈពេល៣០ថ្ងៃតែគណបក្សបានធ្វើរហូតដល់៥០ថ្ងៃ ។
លោកបញ្ជាក់ថា «ដូច្នេះបានជាថ្នាក់ដឹកនាំគណបក្សសង្គ្រោះជាតិសម្រេចប្រជុំគណកម្មាធិការនាយកនៅថ្ងៃទី១៧ ខែឧសភា ឆ្នាំ២០១៧ ខាងមុខដើម្បីជ្រើសរើសអនុប្រធាន៣រូបជាថ្មី» ។ អ្នកនាំពាក្យគណបក្សប្រជាជនកម្ពុជាបន្ថែមថា ថ្លែងនៅសហរដ្ឋអាមេរិកលោក កឹម សុខា បាននិយាយថា ការប្រជុំនេះគឺដើម្បីបញ្ចប់ការតាមរករឿងដោយបញ្ជាក់ថា កន្លងទៅគេតាមរករឿងគណបក្សគាត់ ។ មានអ្នកណារករឿង? គឺមកខ្លួនឯងធ្វើខុសបានជាក្រសួងមហាផ្ទៃមិនទទួលស្គាល់ ។នេះបានហៅថា មិនទទួលស្គាល់ការពិតមែន ។ ចូលចិត្តតែអញ្ចឹង ! ៕
ចែករំលែកព័តមាននេះ