រាជធានីភ្នំពេញ ៖ សម្រាប់ធ្វើឃោសនាគោលនយោបាយបោះឆ្នោតជ្រើសរើសក្រុមប្រក្សឹក្សាឃុំ សង្កាត់អាណត្តិទី៤ដែលនៅសល់មិនដល់មួយខែផងគណបក្សសង្គ្រោះជាតិបានដាក់ប្រធានបទសំខាន់ៗ ចំនួន ៣ សម្រាប់ដាក់ផ្សាយលើស្ថាននីយ៍ទូរទស្សន៍ជាតិកម្ពុជា (ទ.ទ.ក) ។
លោក យឹម សុវណ្ណ អ្នកនាំពាក្យ និងតំណាងគណបក្សសង្គ្រោះជាតិ ថ្លែងក្នុងកម្មវិធីតុមូលរបស់គណៈកម្មាធិការជាតិរៀបចំការបោះឆ្នោត (គ.ជ.ប) កាលពីពេលថ្មីនេះថា ដើម្បីផ្សព្វផ្សាយអំពីគោលនយោបាយ និងកម្មវិធីនយោបាយរបស់គណបក្សនយោបាយ សម្រាប់ការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ ឆ្នាំ២០១៧ គណបក្សបានលើប្រធានបទទី៣ ស្តីពីយន្តការអភិវឌ្ឍ និងការពង្រឹងលទ្ធិប្រជាធិបតេយ្យ ៖
ទី១ ការកសាងនិងអភិវឌ្ឍហេដ្ឋារចនាសម្ព័ន្ធក្នុងឃុំសង្កាត់ ។
ទី២ ការអភិវឌ្ឍសេដ្ឋកិច្ច ការលើកកម្ពស់ជីវភាព និងកាត់បន្ថយភាពក្រីក្រក្នុងឃុំ សង្កាត់ ។
និងទី៣ ការពង្រឹងអភិបាលកិច្ចល្អ ការលើកកម្ពស់ការយល់ដឹងអំពីសិទ្ធិមនុស្ស និងការពង្រឹងលទ្ធិប្រជាធិបតេយ្យក្នុងឃុំ សង្កាត់ ។
លោកថាកម្មវិធីតុមូលលើប្រធានបទទាំង៣នេះ នឹងត្រូវចាក់ផ្សាយនៅស្ថានីយ៍ទូរទស្សន៍ជាតិកម្ពុជា (ទ.ទ.ក) នៅថ្ងៃទី២៤ និង៣០ ខែឧសភា ឆ្នាំ២០១៧ ។
ចែករំលែកព័តមាននេះ