ខេត្តបាត់ដំបង ៖ បុរសម្នាក់ដែលគេអះអាងថា ជាបុគ្គលិកធនាគារមួយ ត្រូវកម្លាំងកងរាជអាវុធហត្ថឃាត់ខ្លួន កាលពីវេលាម៉ោង១១ថ្ងៃត្រង់ថ្ងៃទី២០ វិច្ឆិកា នៅចំណុចភូមិចំការសំរោង១ សង្កាត់ចំការសំរោង ក្រុងបាត់ដំបង ក្រោយពីជននេះ បានយកដុំឥដ្ឋគប់ក្បាលលោកអនុប្រធានមន្ទីរពាណិជ្ជកម្មខេត្តម្នាក់ បណ្ដាលឲ្យបែកក្បាលហូរឈាមកក្លាក់ ពេលកំពុងផ្ទុះជម្លោះដ៏ក្ដៅគគុកក្នុងនាមអ្នកនៅក្បែរខាងគ្នា ។
របាយការណ៍កងរាជអាវុធហត្ថបានឲ្យដឹងថា ជនសង្ស័យឈ្មោះ ទឹម វណ្ណរឹទ្ធ ហៅទូច ភេទប្រុស អាយុ៤១ឆ្នាំ ជាបុគ្គលិកធនាគារ ។ រីឯជនរងគ្រោះឈ្មោះ ពែត ថារ៉ូ ហៅជីត ភេទប្រុស អាយុ៥២ឆ្នាំ មានតួនាទីជាអនុប្រធានមន្ទីរពាណិជ្ជកម្មខេត្តបាត់ដំបង រស់នៅក្បែរខាងគ្នាក្នុងភូមិ-សង្កាត់ខាងលើ ។ របាយការណដដែលបានបន្តថា បុគ្គលិកធនាគារម្នាក់នេះ (ជនសង្ស័យ) បានយកដុំឥដ្ឋគប់ក្បាលលោកអនុប្រធានមន្ទីរពាណិជ្ជកម្មខេត្តត្រូវចំក្បាលបណ្ដាលឲ្យបែកឈាម កាលពីយប់ថ្ងៃទី ១៩ វិច្ឆិកា នៅចំណុចកើតហេតុ ។
ក្រោយប្រើហិង្សាដ៏កំរោលទៅលើជនរងគ្រោះ ជនដៃដល់រូបនេះ ក៏បានគេចខ្លួនបាត់មួយយប់។ លុះព្រឹកថ្ងៃបន្ទាប់ ទើបត្រូវកម្លាំងកងរាជអាវុធហត្ថឃាត់ខ្លួននាំយកទៅសួរនាំ។ គេមិនទាន់ដឹងអំពីមូលហេតុជាក់លាក់ដែលនាំឲ្យមានអំពើហិង្សាក៏ឃោរឃៅនេះកើតឡើងរវាងបុគ្គលិកធនាគារ និងលោកអនុប្រធានមន្ទីរពាណិជ្ជកម្មខេត្តខាងលើនេះនៅឡើយទេ ។ ប៉ុន្តែបើតាមលោក សូ ឌី ប្រធានមន្ទីរយុត្ថិធម៌នៃបញ្ជាការដ្ឋានកងរាជអាវុធហត្ថខេត្តបានផ្ដល់ព័ត៏មានបឋមអំពីមូលហេតុថា អំពើហិង្សានេះផ្ដើមចេញពីជម្លោះរ៉ៃរាំចងជាគំនុំ រវាងភាគីទាំងពីរដែលរស់នៅក្បែរខាងគ្នា។
លោក សូ ឌី បានបញ្ជាក់ថា នៅថ្ងៃកើតហេតុ ភាគីទាំងពីរបានផ្ទុះជម្លោះស៊ីសាច់ហុតឈាមគ្នាជាថ្មី រហូតភាគីម្ខាងទ្រាំមិនបានក៏ទាញដុំឥដ្ឋគប់ក្បាលភាគីម្ខាងទៀតបណ្ដាលឲ្យបែកហូរឈាម ។ ប៉ុន្តែយ៉ាងណា ពេលនេះជនដៃដល់ត្រូវបានកម្លាំងកងរាជអាវុធហត្ថក្រុងឃាត់ខ្លួន តាមបទបញ្ជាលោកមេបញ្ជាការកងរាជអាវុធហត្ថខេត្ត និង តំណាងអយ្យការអមសាលាដំបូងខេត្ត ដើម្បីចាត់ការតាមនីតិវិធីហើយ៕
ចែករំលែកព័តមាននេះ