មហានក្ខត្តសម័យទាំង3របស់ព្រះបរមគ្រូកើតមាននៅថ្ងៃនេះ
យោងតាមគម្ពីរព្រះពុទ្ធសាសនាបានលើកសរសើរថ្ងៃ១៥កើត ពេញបូណ៌មី ខែវិសាខថាជា
យោងតាមគម្ពីរព្រះពុទ្ធសាសនាបានលើកសរសើរថ្ងៃ១៥កើត ពេញបូណ៌មី ខែវិសាខថាជា
យោងតាមគម្ពីរព្រះពុទ្ធសាសនាបានលើកសរសើរថ្ងៃ១៥កើត ពេញបូណ៌មី ខែវិសាខថាជាថ្ងៃមហាមង្គលដ៏អស្ចារ្យ និងជាថ្ងៃនាំមកនូវមហាសិរីសួស្តីដ៏ប្រសើរក្រៃលែង។ ក្នុងថ្ងៃដ៏វិសេសវិសាលនេះឃើញពុទ្ធបរិស័ទចំណុះជើងវត្តនីមួយៗនាំគ្នាទៅកាន់ទីអារាមក្នុងដៃមានកាន់ទៀន ធូប ផ្កាភ្ញី ប្រទីបជ្វាលា យកទៅបូជាព្រះពុទ្ធរូបដើម្បីឧទ្ទិសដល់ព្រះសម្មាសម្ពុទ្ធដែលបរិនិព្វានទៅអស់កាលជាយូរអង្វែង។ ពិធីនេះរំលឹកដល់កាលដែលព្រះពុទ្ធទ្រង់ប្រសូត ត្រាស់ដឹង និងបរិនិព្វាន ដែលអ្នកប្រាជ្ញចាត់ទុកកាលទាំង៣នេះថាជានក្ខត្តសម័យដ៏ពិសេសបំផុតរបស់ព្រះពុទ្ធសាសនា ដោយសារតែកាលទាំង៣នេះកើតឡើងក្នុងថ្ងៃពេញបូណ៌មី ខែវិសាខដូចគ្នា គឺខុសតែឆ្នាំប៉ុណ្ណោះ។ ក្នុងថ្ងៃបុណ្យវិសាខបូជានេះដែរមន្ត្រីរាជការទាំងស្ថាប័នរដ្ឋ និងកម្មករនិយោជិតតាមស្ថាប័នឯកជននានាក៏ត្រូវបានឈប់សម្រាកពីការងារមួយថ្ងៃផងដែរ ។
សូមលើកយកនក្ខត្តសម័យទាំង៣កាលដ៏សង្ខេបមកបង្ហាញដល់សាធុជនដូចតទៅ ៖
១-ព្រះពោធិសត្វទ្រង់ប្រសូតៈ ព្រះសម្មាសម្ពុទ្ធទ្រង់ប្រសូតនៅថ្ងៃសុក្រ ខែវិសាខ ឆ្នាំច ពេញបូណ៌មី វេលាជិតថ្ងៃត្រង់ ក្នុងព្រៃលុម្ពិនី ឬហៅព្រៃសាលព្រឹក្សជាចន្លោះនៃនគរទាំង២គឺ នគរកបិលពស្តុ និងនគរទេវទហៈ ហើយមានសេចក្តីអស្ចារ្យកក្រើករំពើកញ័រផែនដី មានរស្មីភ្លឺចែងចាំងពេញលោកធាតុទាំងមូល
២-ព្រះអង្គត្រាស់ដឹងលើរតនបល្ល័ង្កៈ ព្រះជន្មបាន២៩ឆ្នាំ ព្រះអង្គយាងចេញចាកពីនគរទៅសាងផ្នួស ។ រយៈពេល៦ឆ្នាំ ទើបបានត្រាស់ដឹងនូវអនុត្តរសម្មាសម្ពោធិញ្ញាណលើរតនបល្ល័ង្កក្រោមដើមពោធិព្រឹក្ស ដោយទ្រង់គង់បែរព្រះភ័ក្ត្រទៅទិសបូព៌ ។ ពេលនោះពពួកទេវតាទាំង១ម៉ឺនចក្កវាឡបាននាំទិព្វមាលាមកធ្វើសក្ការបូជាថ្វាយសព្ទសាធុការពរដល់ព្រះបរមគ្រូ ។ ព្រះអង្គបានត្រាស់ដឹងធម៌ក្នុងថ្ងៃពុធ ខែវិសាខ ឆ្នាំរកា ពេញបូណ៌មី វេលាទៀបភ្លឺ ក្នុងព្រះជន្ម៣៥ឆ្នាំ ។
៣-ព្រះពុទ្ធបរិនិព្វានចន្លោះសាលព្រឹក្សៈ ក្នុងរវាងនៃការត្រាស់ដឹងរយៈពេល៤៥វស្សានេះព្រះអង្គទ្រង់បំពេញពុទ្ធកិច្ចទាំង៥ប្រការជានិច្ច រហូតដល់ចេញវស្សាទី៤៥ ព្រះអង្គបានត្រាច់ទៅកាន់សាលវ័នរបស់ពួកមល្លក្សត្រ និងបានត្រាស់ទៅកាន់ព្រះអានន្ទឱ្យរៀបចំអាសនៈ(គ្រែ)ដោយដាក់ក្បាលដំណេកបែរទៅទិសខាងជើងត្រង់ចន្លោះដើមសាលព្រឹក្សទាំងគូឱ្យឆាប់ថ្វាយតថាគត។ គ្រានោះព្រះអង្គទ្រង់ផ្ទុំផ្អៀងទៅខាងស្តាំ យកព្រះបាទឆ្វេងតម្រួតលើព្រះបាទស្តាំស្រេចហើយពេលណាទ្រង់ត្រាស់នូវវត្តប្រតិបត្តិផ្សេងៗដែលត្រូវប្រព្រឹត្តធ្វើក្នុងកាលជាខាងក្រោយដល់ភិក្ខុសង្ឃទាំងឡាយរហូតដល់ទ្រង់បរិនិព្វានក្នុងចន្លោះសាលវ័ននោះ ។ ព្រះបរមគ្រូបរិនិព្វានក្នុងថ្ងៃអង្គារ ខែវិសាខ ឆ្នាំម្សាញ់ ពេញបូណ៌មី វេលាបែកបច្ចូសសម័យ (វេលាភ្លឺព្រាងៗ) ក្នុងជន្មាយុ៨០ឆ្នាំ ៕ ដោយធម្មាចារ្យ សច្ចភាព
ចែករំលែកព័តមាននេះ