ប្រទេសសិង្ហបុរី ៖ តម្លៃប្រេងបានកើនឡើងកាលពីថ្ងៃចន្ទ ខណៈរដ្ឋមន្ត្រីថាមពល ប្រទេសអារ៉ាប៊ីសាអូឌីតនិយាយថា ការកាត់បន្ថយផលិតកម្មដែលដឹកនាំដោយអង្គការ OPEC នឹងបញ្ចប់ក្នុងខែមិថុនា
ប្រទេសសិង្ហបុរី ៖ តម្លៃប្រេងបានកើនឡើងកាលពីថ្ងៃចន្ទ ខណៈរដ្ឋមន្ត្រីថាមពល ប្រទេសអារ៉ាប៊ីសាអូឌីតនិយាយថា ការកាត់បន្ថយផលិតកម្មដែលដឹកនាំដោយអង្គការ OPEC នឹងបញ្ចប់ក្នុងខែមិថុនា ហើយនឹងបន្តរហូតដល់ចុងឆ្នាំនេះ បើទោះជាមានការបន្តបូមប្រេងក្នុងសហរដ្ឋអាមេរិកក្តី ។
រដ្ឋមន្ត្រីថាមពលប្រទេសអារ៉ាប៊ីសាអូឌីត លោក Khalid Al-Falih បាននិយាយកាលពីថ្ងៃចន្ទថា ទីផ្សារប្រេងមានស្ថិរភាពជាថ្មីម្តងទៀត បន្ទាប់ពីមានការផ្គត់ផ្គង់លើសលប់អស់រយៈពេលជាច្រើនឆ្នាំមកនេះ ប៉ុន្តែលោកនៅតែសង្ឃឹមថា កិច្ចព្រមព្រៀងកាត់បន្ថយផលិតកម្មរបស់ OPEC នឹងត្រូវបន្ត ។ លោកថា ៖ « យោងតាមការប្រឹក្សាដែលខ្ញុំចូលរួមជាមួយសមាជិកដទៃ ខ្ញុំជឿជាក់ថា កិច្ចព្រមព្រៀងនឹងបន្តរហូតដល់ឆមាសទី២ឆ្នាំនេះ » ។
អង្គការប្រទេសនាំចេញប្រេង (OPEC) និងប្រទេសផលិតប្រេងមិនមែនជាសមាជិកដូចជារុស្ស៊ី សន្យាថា នឹងកាត់បន្ថយផលិតកម្មប្រេងប្រមាណជិត១,៨លានធុងក្នុង១ថ្ងៃនៅអំឡុងឆមាសទី១នាឆ្នាំនេះ ដើម្បីជួយដល់ទីផ្សារ ។ ការសម្រេចចិត្តថា គួរបន្តកាត់បន្ថយផលិតកម្មឬអត់នេះត្រូវគេគិតថា នឹងកើតមានឡើងក្នុងកិច្ចប្រជុំផ្លូវការបន្ទាប់របសOPEC នាថ្ងៃទី២៥ ឧសភា ខាងមុខ ។
លោក Jeffrey Halley ឧត្តមអ្នកវិភាគទីផ្សារក្នុងOANDA នៅសិង្ហបុរី និយាយថា ៖ « តម្លៃប្រេងអាចនឹងមិនធ្លាក់ចុះទៀតទេក្នុងពេលបច្ចុប្បន្ន ព្រោះទីផ្សារបង្វែរការចាប់អារម្មណ៍លើកិច្ចប្រជុំបន្ទាប់របស់OPECនៅចុងខែនេះ » ។
ពាណិជ្ជករក៏បាននិយាយថា ជ័យជម្នះរបស់លោក Emmanuel Macron ក្នុងការបោះឆ្នោតជ្រើសរើសប្រធានាធិបតីបារាំង ក៏បានជំរុញដល់តម្លៃប្រេងផងដែរ ដោយវាបង្កើនក្តីសង្ឃឹមថា សេដ្ឋកិច្ចអឺរ៉ុបអាចនឹងមានស្ថិរភាពជាងមុន ។
យ៉ាងណាក្តី តម្លៃប្រេងរបស់ Brent និង WTI គឺនៅក្រោម៥០ដុល្លារក្នុង១ធុង ព្រោះតែចំនួនប្រេងស្តុកទុក អត្រាបូមខ្ពស់ និងផលិតកម្មច្រើន ។ ការបូមប្រេងថ្មីដោយសហរដ្ឋអាមេរិកបានបន្តកើនឡើងក្នុងសប្តាហ៍មុន ។
Goldman Sachs និយាយថា តាំងពីថ្ងៃទី២៧ ឧសភា ២០១៦ ក្រុមហ៊ុនផលិតប្រេងរបស់អាមេរិកបានបន្ថែមឧបករណ៍ជីកប្រេងចំនួន៣៨៧ ឬប្រមាណ១២៣% ៕
ចែករំលែកព័តមាននេះ