មន្ត្រីជំនាញចុះត្រួតពិនិត្យគុណភាពចំណីអាហារ និងការវេចខ្ចប់
ខេត្តមណ្ឌលគិរី ៖ ដើម្បីការពារផលប្រយោជន៍ និងសុខភាពអ្នកប្រើប្រាស់ ប្រធានសាខាកាំកុងត្រូលខេត្តមណ្ឌលគិរី បានសហការជាមួយមន្ទីរពាណិជ្ជកម្មខេត្ត
ខេត្តមណ្ឌលគិរី ៖ ដើម្បីការពារផលប្រយោជន៍ និងសុខភាពអ្នកប្រើប្រាស់ ប្រធានសាខាកាំកុងត្រូលខេត្តមណ្ឌលគិរី បានសហការជាមួយមន្ទីរពាណិជ្ជកម្មខេត្ត នគរបាលប្រឆាំងបទល្មើសសេដ្ឋកិច្ចខេត្ត បានចុះត្រួតពិនិត្យទំនិញ និងចំណីអាហារ ដែលអាជីវករដាក់តាំងលក់នៅតាមផ្ទះលក់ចាប់ហួយនានា ស្ថិតនៅឃុំពូជ្រៃ ស្រុកពេជ្រាដា នាព្រឹកថ្ងៃទី០៩ ខែឧសភា ឆ្នាំ២០១៧។ លោក ចាន់ វាសនា ប្រធានសាខាកាំកុងត្រូលខេត្ត បានឲ្យដឹងថា ការចុះត្រួតពិនិត្យនេះគឺផ្តោតសំខាន់ទៅលើទំនិញវេចខ្ចប់ស្រាប់ ភេសជ្ជៈ និងចំណីអាហារនៅតាមផ្ទះលក់ចាបហួយនានា ដើម្បីពិនិត្យគុណភាព សុវត្ថិភាព ទំនិញគ្មានអនាម័យ និងទំនិញគ្មានសុវត្ថិភាពត្រឹមត្រូវ ឬលាយសារធាតុគីមីហាមឃាត់ក្នុងគោលបំណងការពារផលប្រយោជន៍ និងសុខភាពអ្នកប្រើប្រាស់។
លោកបញ្ជាក់ឲ្យដឹងបន្តថា តាមការត្រួតពិនិត្យនោះ មន្ត្រីកាំកុងត្រូល បានធ្វើតេស្តរកសាធាតុគីមីបូរ៉ាក់ទៅលើប្រហិតសាច់គោ ត្រីងៀត សរសៃមី សរសៃគុយទាវ មីសួ ជាលទ្ធផលនៃការធ្វើតេស្តពុំមានសារធាតុគីមីហាមឃាត់នោះទេ ហើយក៏បានធ្វើតេស្តទៅលើ អំបិលអ៊ីយ៉ូតម៉ាក់ លីលីដា ជាលទ្ធផល គឺមានអ៊ីយ៉ូតត្រឹមត្រូវ។ ជាមួយគ្នានេះដែរ ក៏បានធ្វើតេស្តរកសារធាតុគីមី សូឌីយ៉ូមហ៊ីត្រាសូហ្វីលនៅលើស្ករត្នោត ជាលទ្ធផលក៏ពុំមានសារធាតុគីមីហាមឃាត់នៅក្នុងស្ករត្នោតនោះទេ។ បន្ទាប់មកមន្ត្រីជំនាញ បានចុះត្រួតពិនិត្យ និងរកឃើញទំនិញហួសកាលបរិច្ឆេទ និងខូចគុណភាព ដូចជា កំប៉ុងក្រពឹត ដែលអាជីវករដាក់តាំងលក់នៅតាមផ្ទះលក់ភេសជ្ជៈគ្រប់ប្រភេទ រួមមាន៖ ទឹកក្រូចម៉ាកគូលែនចំនួន១២ដប ទឹកក្រូចម៉ាកហ្វាន់តា ចំនួន១២ដប និងម្សៅស៊ុបរ៉ូឌី ចំនួន៣កញ្ចប់ ត្រូវបានមន្ត្រីជំនាញបានធ្វើការដកហូតយកទៅរក្សាទុកដើម្បីដុតកម្ទេចចោលនៅពេលក្រោយ។
ក្នុងការចុះត្រួតពិនិត្យនេះដែរ លោក ចាន់ វាសនា ប្រធានសាខាកាំកុងត្រូលខេត្តក៏បានធ្វើការណែនាំ ដល់អាជីវករ ពាណិជ្ជករឲ្យយល់ដឹង និងមានប្រុងប្រយ័ត្ន ចៀសវាងការដាក់តាំងលក់ទំនិញហួសកាលបរិច្ឆេទប្រើប្រាស់ ដូចជា កំប៉ុងក្រពឹត ប៉ោង ច្រេះស៊ី ទំនិញដែលសារធាតុគីមីហាមឃាត់ និងការរៀបចំទំនិញលក់ដូរទុកឲ្យមានសណ្តាប់ធ្នាប់ទៅតាមប្រភេទទំនិញ ទំនិញហូបចុក ទំនិញប្រើប្រាស់ផ្សេងៗ ដាច់ដោយឡែកៗពីគ្នា និងបានបិទរូបភាពដែលរៀបចំដោយអគ្គនាយកដ្ឋានកាំកុងត្រូល ស្តីពីសូមពិចារណាមុននឹងជ្រើសរើស ផលិតផល ម្ហូបអារហារ ណាមួយមកបរិភោគ ជូនដល់អ្នកលក់ដូរ និងអ្នកប្រើប្រាស់ឲ្យបានយល់ដឹងពីរូបភាពជាបឋម នូវទំនិញណាដែលគួរប្រើ និងទំនិញណាមិនគួរប្រើប្រាស់៕
ចែករំលែកព័តមាននេះ