លួចកាច់កយកម៉ូតូបានសម្រេច តែត្រូវបានកម្លាំងនគរបាលចាប់ខ្លួន
ខេត្តបន្ទាយមានជ័យ ៖ មានករណីចោរលួចកាច់សោក យកម៉ូតូ១គ្រឿងម៉ាក PCX ស៊េរី២០១៥ ពណ៌សលាយឈាមជ្រូក ពាក់ស្លាកលេខ ប.មានជ័យ1P-0639
ខេត្តបន្ទាយមានជ័យ ៖ មានករណីចោរលួចកាច់សោក យកម៉ូតូ១គ្រឿងម៉ាក PCX ស៊េរី២០១៥ ពណ៌សលាយឈាមជ្រូក ពាក់ស្លាកលេខ ប.មានជ័យ1P-0639 ខណៈដែលម្ចាស់ចូលរួមក្នុងកម្មវិធីបុណ្យឆ្លងកុដិវត្តស្ទឹងបត់។ ហេតុការណ៍នេះ បានកើតឡើងនៅវេលាម៉ោង១០ព្រឹក ថ្ងៃទី០៩ ខែឧសភា ឆ្នាំ២០១៧ នៅវត្តស្ទឹងបត់ ស្ថិតក្នុងភូមិស្ទឹងបត់ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។ លោកវរសេនីយ៍ទោ ធិន ស៊ិនដេត អធិការនគរបាលក្រុងសិរីសោភ័ណ បានឲ្យដឹងថា៖ ជនរងគ្រោះ ជាម្ចាស់ម៉ូតូឈ្មោះ ជីវ គឹមហ៊ាង ភេទស្រី អាយុ១៧ឆ្នាំ ជាយុវជន(ស.ស.យ.ក) នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ចំណែកជនប្រព្រឹត្តល្មើស ឈ្មោះសៅ មករា ភេទប្រុស អាយុ៣៤ឆ្នាំ នៅភូមិជោ ឃុំគ្រញូង ស្រុកកំចាយមា ខេត្តព្រៃវែង ជាជនដៃដល់ធ្វើសកម្មភាពកាច់សោរកម៉ូតូ និងម្នាក់ទៀតឈ្មោះ ហ៊ឹម វុទ្ធី ភេទប្រុស អាយុ២៣ឆ្នាំ នៅភូមិព្រៃ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ជាអ្នកផ្សំគំនិត។ ជាមួយនឹងការបង្ក្រាបនេះ សមត្ថកិច្ចបានធ្វើការដកហូតវត្ថុតាងជាក់ស្តែង មាន ដែករាងអក្សរ T សម្រាប់កាច់សោកម៉ូតូចំនួន១,ទូរស័ព្ទដៃ១គ្រឿង និងម៉ូតូសម្រាប់ជិះធ្វើសកម្មភាព១គ្រឿង។
លោកអធិការបានបញ្ជាក់ថា៖ នៅចំពោះមុខសមត្ថកិច្ចជនសង្ស័យ ក៏បានសារភាពផងដែរ ចំពោះទង្វើដែលគេបានប្រព្រឹត្ត ។ ជនសង្ស័យទាំង២នាក់នេះ ដោយផ្អែកលើចម្លើយសារភាព និងការបង្ក្រាបជាក់ស្តែង ព្រមទាំងដកហូតបានសម្ភារទាក់ទងនឹងបទល្មើស កម្លាំងជំនាញអធិការដ្ឋាននគរបាលក្រុងប៉ោយប៉ែតកំពុងកសាងសំណុំរឿងបញ្ជូនខ្លួនមកស្នងការដ្ឋាននគរបាលខេត្ត ដើម្បីចាត់កាបន្តតាមនីតិវិធី៕
ចែករំលែកព័តមាននេះ