រាជធានីភ្នំពេញ ៖ លោក ព្រំ សំខាន់ អភិបាលខណ្ឌចំការមន បានបញ្ជាក់ជាថ្មីម្តងទៀតថា លោកបានដាក់កម្លាំងឲ្យសម្រួលចរាចរណ៍នៅមុខខុនដូរឈ្មោះ ឆាយណា
រាជធានីភ្នំពេញ ៖ លោក ព្រំ សំខាន់ អភិបាលខណ្ឌចំការមន បានបញ្ជាក់ជាថ្មីម្តងទៀតថា លោកបានដាក់កម្លាំងឲ្យសម្រួលចរាចរណ៍នៅមុខខុនដូរឈ្មោះ ឆាយណា ខនស្ត្រាក់សិន ហ្វ័ត អេនជីនារីង ឌីវិសិន ខប អិលធីឌី (CHINA CONTRUCTION FOURTH ENGINEERING DIVISION CORP. LTD) ដែលមានទីតាំងស្ថិតតាមបណ្តោយមហាវិថីព្រះនរោត្តម ក្នុងសង្កាត់ទន្លេបាក់ ខណ្ខចំការមន រាជធានីភ្នំពេញ ដែលរងការរិះគន់ថាបំផ្លាញហេដ្ឋារចនាសម្ព័ន្ធ និងធ្វើឲ្យមានការកកស្ទះចរាចរណ៍យ៉ាងខ្លាំងជារៀងរាល់ថ្ងៃ ព្រោះការដ្ឋានមួយនេះបានយកចិញ្ចើមផ្លូវសម្រាប់ដាក់ដែក និងសម្ភារសំណង់ និងមានរថយន្តដឹកខ្សាច់ រថយន្តក្រឡុកស៊ីម៉ងត៍ ចតមុខការដ្ឋាននេះជាច្រើន និងបង្ហៀរទឹកកខ្វក់មកលើផ្លូវ ដែលជាហេតុធ្វើឲ្យផ្លូវខូចមករកដំណោះស្រាយបញ្ហាខាងលើ តែលោកមិនបានបញ្ជាក់ថានឹងមានចំណាត់ការយ៉ាងណាចំពោះបញ្ហាដាក់សម្ភារលើចិញ្ចើមផ្លូវ និងរថយន្តចតមុខការដ្ឋាននោះទេ។
ការដ្ឋានសំណង់ខុនដូមួយនេះ ឈ្មោះ ឆាយណា ខនស្ត្រាក់សិន ហ្វ័ត អេនជីនារីង ឌីវិសិន ខប អិលធីឌី (CHINA CONTRUCTION FOURTH ENGINEERING DIVISION CORP. LTD) ដែលមានទីតាំងស្ថិតតាមបណ្តោយមហាវិថីព្រះនរោត្តម ក្នុងសង្កាត់ទន្លេបាក់ ខណ្ខចំការមន រាជធានីភ្នំពេញ។ កន្លងមក លោក ជា សុផារ៉ា ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានចេញបម្រាមមួយដាក់កម្រិតមិនឲ្យការដ្ឋានសំណង់ធំៗ ខ្ពស់ៗក្នុង រាជធានីភ្នំពេញ យកទ្រូងផ្លូវ ឬចិញ្ចើមផ្លូវសាធារណៈ ដើម្បីដាក់សម្ភារសាងសង់ឡើយ ជាពិសេសហាមមិនឲ្យដាក់ដងស្ទូចជាប់ផ្លូវ ឬលើកសម្ភារសំណង់រំលងផ្លូវ ព្រោះវាបង្កការកកស្ទះចរាចរណ៍ និងអាចបង្កគ្រោះថ្នាក់ដល់អ្នកដំណើរ។
ប៉ុន្តែទោះជាមានបម្រាមបែបនេះក៏ដោយ ក៏ការដ្ឋានសំណង់របស់ជនជាតិចិនមួយនេះ នៅបង្កការរំខាន និងបំផ្លាញផលប្រយោជន៍សាធារណៈដដែល ជាពិសេសលើកស្ទួចសម្ភារសំណង់ រំលងផ្លូវ ដោយមិនខ្វល់ពីការបង្កគ្រោះថ្នាក់ដល់ជីវិតមនុស្ស។ ចំណែកសាលាខណ្ឌចំការមន និងសាលារាជធានីភ្នំពេញ មិនដឹងទទួលបានផលប្រយោជន៍អ្វីខ្លះពីខុនដូនេះទេ បានជាមើលមិនឃើញពីផលប៉ះពាល់ដល់សម្បត្តិសាធារណៈ និងបង្កការកកស្ទះចរាចរណ៍ជារៀងរាល់ថ្ងៃ។ អ្នកធ្វើដំណើរតាមបណ្តោយមហាវិថីព្រះនរោត្តមខ្លះ ដែលមកជិតដល់ស្ពានអាកាស ក្បាលថ្នល់ បានសំណូមពរឲ្យអាជ្ញាធរពាក់ព័ន្ធជួយពិនិត្យមើលផង ព្រោះខុនដូ (CHINA CONTRUCTION FOURTH ENGINEERING DIVISION CORP. LTD) ពិតជាធ្វើឲ្យខូចសម្បត្តិសាធារណៈ និងបង្កការបង្កការកកស្ទះ ជាពិសេសពួកគាត់ខ្លាចដែកនិងសម្ភារផ្សេងៗ ធ្លាក់លើផង៕
ចែករំលែកព័តមាននេះ