រាជធានីភ្នំពេញ ៖ យោងតាមការបង្ហើបកីឡាករថៃ Niev Vengchan ដែលបានប្រកួតឈ្នះកីឡាករកម្ពុជា មឿន សុខហ៊ុច ដែលទើបទទួលបានខ្សែក្រវាត់អន្តរជាតិពីប្រទេសថៃកាលពីថ្ងៃទី៧ ឧសភា មិនមែនជាកីឡាករអាជីព១០០ភាគរយនោះទេ គឺជាកម្មករដកដំឡូងនៅប្រទេសថៃ និងយូរៗម្ដងឡើងប្រកួតតាមសង្វៀនក្នុងវត្តប៉ុណ្ណោះ ។ មានការកត់សម្គាល់ថា កីឡាករដែលគ្រាន់តែជាកម្មករក្នុងចម្ការដំឡូងរូបនេះ ក៏ខ្លាំងមិនណយនោះដែរ ទើបប្រកួតកាលពី២លើកមុនក៏ត្រូវគេអះអាងថាឈ្នះមឿន សុខហ៊ុច តែគណៈកម្មការឱ្យចាញ់ ហើយការប្រកួតប៉ះគ្នាជាលើកទី៣ក៏ឈ្នះពិន្ទុតែម្ដង។
លោកថៃ អ៊ូ អ្នកដឹកនាំកីឡាករថៃមកប្រកួតនៅលើសង្វៀនអន្តរជាតិទូរទស្សន៍អាស៊ីអាគ្នេយ៍ បានថ្លែងក្រោយបញ្ចប់ការប្រកួតរវាងគូទាំង២កាលពីថ្ងៃទី៧ ឧសភាថា រវាងកីឡាករមឿន សុខហ៊ុច និងកីឡាករNeiv Vengchan ប៉ះគ្នា៣លើកមកហើយ ដោយ២លើកមុនគឺជាការប្រកួតមិត្តភាពបែបនេះដូចគ្នា ហើយលទ្ធផលកីឡាកររបស់លោកទទួលបរាជ័យទាំងមិនអស់ចិត្ត ។ លោកថា ការប្រកួតរបស់ពួកគេកាលពី២លើកមុនមិនស្ថិតនៅលើសង្វៀនទូរទស្សន៍មួយនេះទេ គឺនៅសង្វៀនទូរទស្សន៍អប្សរា ដោយលទ្ធផលចុងក្រោយនាពេលនោះ គឺកីឡាករថៃត្រូវឈ្នះ ប៉ុន្តែគណៈកម្មការឱ្យចាញ់ដើម្បីយោងមុខកីឡាករកម្ពុជា ដែលធ្លាប់ល្បីឈ្មោះនៅលើសង្វៀនប្រដាល់ ។ លោកបានចោទថា លទ្ធផលដែលផ្ដល់ឱ្យ២លើកកន្លងមក ជាលទ្ធផលបែបលម្អៀង និងថាមានតែលទ្ធផលក្នុងជំនួបលើកទី៣ទេដែលលោកយល់ថាមានភាពត្រឹមត្រូវព្រោះកីឡាករថៃវាយល្អដូច២លើកមុន ហើយបានឈ្នះតាមបំណង ។ លោកថា ការប្រកួតនៅលើសង្វៀនទូរទស្សន៍អប្សរា កម្រឱ្យកីឡាករថៃឈ្នះកីឡាករកម្ពុជាណាស់ ទើបក្នុងពេលសង្វៀនមួយនោះមិនទាន់បិទចោល គឺកីឡាករថៃរបស់លោកមិនសូវចង់ទៅប្រកួតទេ ។
លោកថា បើកុំតែការប្រកួតជាមួយកីឡាករ មឿន សុខហ៊ុច ត្រូវបានធ្វើឡើងនៅលើសង្វៀនទូរទស្សន៍អាស៊ីអាគ្នេយ៍ មិនមែនសង្វៀនអប្សរា លោកថាកីឡាករ Niev Vengchan ពិតជាមិនមកប្រកួតនោះទេ ដោយសារតែរាងចាលកាលពី២លើកមុន ។ លោកថា កីឡាករថៃដែលមកប្រកួតជាមួយកីឡាករមឿន សុខហ៊ុច នេះ មិនមែនជាកីឡាករអាជីពក្នុងសហព័ន្ធប្រដាល់ថៃទេ គឺជាកីឡាករប្រដាល់នៅតាមវត្ត និងមានអាជីពជាប្រចាំគឺជាកម្មករដកដំឡូងនៅក្នុងប្រទេសថៃ ។ ប៉ុន្តែបើនិយាយពីសមត្ថភាពគឺល្អហ៊ានឡើងប្រកួតជាមួយជើងខ្លាំងមឿន សុខហ៊ុច ដែលជាម្ចាស់ខ្សែក្រវាត់អន្តរជាតិក្នុងព្រឹត្តិការណ៍ Thai Fight ។ លោកថា នៅក្នុងប្រទេសថៃ កីឡាករដើរវាយតាមវត្តខ្លះ ក៏មិនធម្មតានោះដែរ ជាក់ស្ដែងដូចជាកីឡាករ Niev Vengchan មានសមត្ថភាពមិនធម្មតានោះទេ ដោយអ្នកគាំទ្រតិចណាស់ជឿថាគេគឺជាកម្មករដកដំឡូង ។ លោកនិយាយថា កីឡាករថៃរូបនេះ មិនខុសពីកីឡាករកម្ពុជាមួយចំនួននោះទេ ដោយពេលប្រកួតក៏យកពេលហ្វឹកហាត់មួយសប្ដាហ៍ដើម្បីឡើងរេញ ហើយដល់ពេលអត់ប្រកួតក៏ដើរស៊ីឈ្នួលដកដំឡូង ឬធ្វើការងារផ្សេងៗតាមរដូវកាល ។ បើNiev Vengchan ជាកីឡាករអាជីពវិញ គឺមឿន សុខហ៊ុច នឹងខ្ចប់ជាងនេះ ។
លោក ញាណ សុធី អ្នករៀបចំការប្រកួតប្រចាំស្ថានីយទូរទស្សន៍អាស៊ីអាគ្នេយ៍បានអះអាងថា សម្រាប់សង្វៀនរបស់លោកអត់ខ្វល់ថាកីឡាករបរទេស ឬកម្ពុជានោះទេ សំខាន់ឱ្យតែប្រកួតបានពិន្ទុឈ្នះគឺលោកនឹងឱ្យឈ្នះតែម្ដងដើម្បីកុំឱ្យមានការរិះគន់ពីសំណាក់អ្នកទស្សនា ។ ទោះបីយ៉ាងណា លោកក៏ទទួលស្គាល់ថា ពេលខ្លះសង្វៀនរបស់លោកក៏ធ្លាប់លម្អៀងផងដែរនៅពេលស៊ើបដឹងថាកីឡាករណាម្នាក់បន្លំធ្វើចាញ់ដើម្បីលក់ដូរលទ្ធផល បើគ្មានរឿងហ្នឹងកើតឡើងទេ គឺលទ្ធផលត្រូវតែយុត្តិធម៌ ។ លោកនិយាយថាការពិតឱ្យខ្មែរឈ្នះប៉ុនហ្នឹងៗនៅចាញ់ស្រុកថៃផងទេ ព្រោះនៅពេលកីឡាករខ្មែរយើងទៅប្រកួតបើវាយកីឡាករថៃមិនសន្លប់គេនឹងឱ្យចាញ់តែរហូតហ្នឹង តែនៅនេះ(សង្វៀនទូរទស្សន៍អាស៊ីអាគ្នេយ៍) យើងអត់ធ្វើអ៊ីចឹងទេ តែឈ្នះឱ្យឈ្នះតែចាញ់ឱ្យចាញ់ហើយ ដើម្បីកុំឱ្យកីឡាករយើងបានចិត្ត ។ លោកថា ការប្រកួតរវាងមឿន សុខហ៊ុច និងកីឡាករថៃគូនេះ នឹងអាចប៉ះគ្នាម្ដងទៀតដើម្បីកុំឱ្យកីឡាករកម្ពុជាចាញ់ទាំងមិនអស់ចិត្ត ។ លោកឯកភាពនឹងការលើកឡើងរបស់ថៃ អ៊ូ រឿងឱ្យកីឡាករថៃឈ្នះជារឿងយុត្តិធម៌និងត្រឹមត្រូវ ដោយលោកបញ្ជាក់ថា កីឡាករ មឿន សុខហ៊ុច ដែលទើបទទួលបានខ្សែក្រវាត់មកពីប្រទេសថៃកាលពីច្រើនសប្ដាហ៍មុន វាយចេញច្រើនតែមិនសូវត្រូវគោលដៅទៅលើគូប្រកួត ទើបការប្រកាសឱ្យកីឡាករថៃឈ្នះ ជារឿងត្រឹមត្រូវ៕
ចែករំលែកព័តមាននេះ