ខេត្តបាត់ដំបង ៖ សេចក្តីរាយការណ៍ឱ្យដឹងថា កម្លាំងកងរាជអាវុធហត្ថ បានធ្វើការឃាត់ខ្លួនយុវជន៣នាក់ក្នុងចំណោមច្រើននាក់ ក្រោយពីវាយសម្លាប់យុវជនម្នាក់ នៅក្នុងរោងមង្គលការ កើតឡើងកាលពីរសៀលថ្ងៃទី០៥ ឧសភា ស្ថិតនៅចំណុចបុស្សសុព័រ ក្នុងភូមិបឹងក្រសាល ឃុំស្នឹង ស្រុកបាណន់ ។
ប្រភពឱ្យដឹងថា ជនសង្ស័យទាំង៣នាក់ ១-ឈ្មោះយាន ជាតិ អាយុ៣៣ឆ្នាំ ២-ឈ្មោះយាន ចាច់ អាយុ១៩ឆ្នាំ និង៣-ឈ្មោះប្រាវ គឹមសេង អាយុ២២ឆ្នាំ ។ រីឯយុវជនរងគ្រោះដែលស្លាប់ឈ្មោះជិត តុលា អាយុ២៤ឆ្នាំ ពួកគេរស់នៅចំណុចកើតហេតុ ។
ករណីឃាតកម្មខាងលើនេះ គេឃើញភាគីជនដៃដល់មានបក្សពួកយ៉ាងតិច៦នាក់ បានប្រើបន្ទះក្ដារវាយទៅលើជនរងគ្រោះ ក្រោយផ្ទុះជម្លោះ នៅក្នុងរោងមង្គលការនោះ ។ ជនរងគ្រោះរបួសយ៉ាងធ្ងន់ធ្ងរ ហើយក្រុមគ្រួសារដឹកទៅសង្គ្រោះនៅមន្ទីរពេទ្យខេត្ត លុះនៅព្រឹកថ្ងៃទី០៦ ឧសភា ជនរងគ្រោះបានស្លាប់នៅមន្ទីរពេទ្យ ។ មួយថ្ងៃក្រោយមក បន្ទាប់ពីទទូលពាក្យបណ្ដឹង កម្លាំងកងរាជអាវុធហត្ថស្រុកបាណន់ ក៏បានចុះសួរនាំ និងស្រាវជ្រាវ រហូតឈានដល់ការឃាត់ខ្លួនជនដៃដល់២នាក់។ ក្រោយពីឃាត់ខ្លួនមកសួរនាំ ក្រុមជនសង្ស័យសារភាពថា ពេលកំពុងរាំនៅក្នុងពិធីមង្គលការនោះបានប៉ះទង្គិចពាក្យសំដីគ្នា ទើបឈានដល់ការវាយសម្លាប់បែបនេះ។
ចែករំលែកព័តមាននេះ