សហរដ្ឋអាមេរិក ៖ អត្រាអ្នកគ្មានការងារបានធ្លាក់ចុះមកត្រឹម៤,៤% ដែលជាអត្រាទាបជាងគេតាំងពីខែឧសភា ឆ្នាំ២០០៧មក ។
ទិន្នន័យចេញផ្សាយពីក្រសួងការងាររបស់អាមេរិកកាលពីថ្ងៃសុក្រ ឲ្យដឹងថា ប្រទេសនេះបានបង្កើតការងារថ្មីៗចំនួនជាង២១ម៉ឺនកន្លែងទៀតក្នុងខែមេសា ច្រើនជាងខែមីនា ដែលមានតែ៧,៩ម៉ឺនការងារ ។
អត្រាអ្នកគ្មានការងារដ៏ទាបនេះបង្ហាញពីការចាប់ផ្តើមងើបឡើងវិញនៃសេដ្ឋកិច្ចអាមេរិកតាំងពីវិបត្តិសេដ្ឋកិច្ចបានបញ្ចប់ក្នុងឆ្នាំ២០០៩មកម្ល៉េះ ដោយពេលនោះអត្រានេះស្មើ១០% ។
សេដ្ឋវិទូជាច្រើននិយាយថា សហរដ្ឋអាមេរិកបានខិតជិតកម្រិតការងារពេញហើយ មានន័យថា អត្រាអ្នកគ្មានការងារធ្វើ នឹងមិនធ្លាក់ចុះច្រើនទៀតទេ ។ វាជាប្រទេសមួយដែលនិយោជកត្រូវតែបង្កើនប្រាក់បៀវត្ស ព្រោះពួកគេជួបប្រទះនឹងការលំបាកស្វែងរកបុគ្គលិក ។ នេះជាមូលហេតុដែលមានការគិតថា ប្រាក់បៀវត្សនឹងកើនឡើង ។
អត្រាកំណើនប្រាក់បៀវត្សក្នុងខែមេសា បានកើនឡើង២,៥% បើធៀបនឹងឆ្នាំមុន ។
ការបង្កើតការងារមានវត្តមានក្នុងវិស័យជាច្រើនដូចជា វិស័យសុខាភិបាលបង្កើតការងារបន្ថែម២ម៉ឺន, សេវាកម្មអាជីវកម្ម៣,៩ម៉ឺន, សណ្ឋាគារ និងភោជនីយដ្ឋាន៥,៥ម៉ឺន និង វិស័យសាងសង់ រ៉ែ និងផលិតកម្ម ក៏កើនឡើងបន្តិចបន្តួចផងដែរ ។
អ្នកជំនាញអះអាងថា ការបង្កើតការងារថ្មីជាច្រើននេះ ជាពិសេសផ្នែកផលិតកម្ម គឺមកពីស្ថានភាពដ៏ល្អនៃសេដ្ឋកិច្ចពិភពលោក មិនមែនមកពីការសន្យារបស់លោក ដូណាល់ ត្រាំ ក្នុងការកាត់បន្ថយពន្ធសាងសង់ហេដ្ឋារចនាសម្ព័ន្ធ ឬបន្ធូរច្បាប់នោះទេ ។
អ្នកជំនាញព្រមានថា នៅមានបញ្ហាជាច្រើនទៀត ឧទាហរណ៍ ជនជាតិអាមេរិកមានអាយុរវាងពី២៥ ទៅ៥៤ឆ្នាំជាច្រើនមិនទាន់មានការងារធ្វើ ព្រោះតែមូលហេតុជាច្រើន ហើយបើទោះជាការងារក្រៅម៉ោងថយចុះក្តី ប៉ុន្តែនៅមានជនជាតិអាមេរិកប្រមាណ៥,៣លាននាក់ទៀតកំពុងតែធ្វើការងារក្រៅម៉ោងដែលពួកគេមិនចង់បាន ៕
ចែករំលែកព័តមាននេះ