រាជធានីភ្នំពេញ ៖ បន្ទាប់ពីជប៉ុនយល់ព្រមផ្ដល់កម្ចីដល់កម្ពុជាសម្រាប់សាងសង់កំពង់ផែទឹកជ្រៅមួយទៀតនៅខេត្តព្រះសីហនុ កម្ពុជាបានចាប់ផ្ដើមសិក្សាគម្រោងកំពង់ផែថ្មីនេះហើយ ដោយគ្រោងនឹងបញ្ចប់ការសាងសង់ទាំងស្រុងនៅឆ្នាំ២០២២ ហើយក៏ជាពេលដែលកម្ពុជាមានកំពង់ផែទឹកជ្រៅមួយទៀតសម្រាប់ទទួលនាវា និងកុងតឺន័របន្ថែមផងដែរ ។ នេះបើតាមប្រធានអគ្គនាយកកំពង់ផែស្វយ័តក្រុងព្រះសីហនុ ។
លោក លូ គឹមឈន់ ប្រតិភូរាជរដ្ឋាភិបាល ទទួលបន្ទុកជាប្រធានអគ្គនាយកកំពង់ផែស្វយ័តក្រុងព្រះសីហនុ បានមានប្រសាសន៍តាមទូរស័ព្ទថា កំពង់ផែទឹកជ្រៅថ្មីមួយទៀតនៅក្នុងខេត្តព្រះសីហនុ នឹងបញ្ចប់ការសាងសង់ ហើយអាចប្រើប្រាស់ជាផ្លូវការនៅចុងឆ្នាំ២០២២ ។ នៅពេលនោះ កម្ពុជាក៏អាចឱ្យនាវាធំៗចូលចតបានជាមួយកំណើនកុងតឺន័រផងដែរ ។
លោកថ្លែងថា ៖ « បន្ទាប់ពីមានការយល់ព្រមផ្ដល់កម្ចីពីប្រទេសជប៉ុន ពេលនេះយើងកំពុងសិក្សាសាងសង់កំពង់ផែថ្មីដែលមានជម្រៅទឹក១៤ម៉ែត្រកន្លះនៅក្នុងខេត្តព្រះសីហនុ ហើយនៅពេលសាងសង់រួច កំពង់ផែថ្មីរបស់យើងនឹងអាចទទួលបានកុងតឺន័រច្រើន ព្រមទាំងអាចឱ្យនាវាធំៗចូលចតទៀតផង ។ បច្ចុប្បន្ននេះ កំពង់ផែរបស់យើងមិនទាន់អាចមានលទ្ធភាពឲ្យកប៉ាល់ធំៗចូលចតបានច្រើននៅឡើយទេ ដោយសារតែកំពង់ផែចាស់មានជម្រៅទឹករាក់ ហើយនៅតូច តែសព្វថ្ងៃនេះក្នុងមួយសប្ដាហ៍ៗ ក៏អាចឱ្យនានាដឹកកុងតឺន័រចូលចតប្រមាណពី១៤ទៅ១៥គ្រឿងដែរ » ។
លោកបន្តថា សព្វថ្ងៃនេះ ចំនួនកុងតឺន័រឆ្លងកាត់កំពង់ផែស្វយ័តក្រុងព្រះសីហនុ ជាមធ្យមប្រមាណ៤០០ពាន់កុងតឺន័រក្នុងរយៈពេល៥២សប្ដាហ៍ ឬប្រមាណ៧.៦០០កុងតឺន័រក្នុងរយៈពេលមួយសប្ដាហ៍ ។ លោកថា ៖ « បើនិយាយពីសមត្ថភាពអាចទទួល ឬផ្ទុកចំនួនកុងតឺន័ររបស់កំពង់ផែចាស់ ក្នុងមួយឆ្នាំរហូតដល់៧០០ពាន់ឯណោះ ខណៈពេលនេះទើបតែមានកុងតឺន័រចូលបានជាង៤០០ពាន់ប៉ុណ្ណោះ » ។
គួររំលឹកថា កាលពីចុងសប្ដាហ៍មុននេះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍ក្រោយជំនួបជាមួយភាគីជប៉ុនថា ជប៉ុនបានឯកភាពផ្ដល់កម្ចីចំនួន២០០លានដុល្លារអាមេរិកសម្រាប់សាងសង់កំពង់ផែទឹកជ្រៅនៅខេត្តព្រះសីហនុ ដើម្បីទទួលនាវា និងកុងតឺន័របន្ថែមទៀតចេញចូលតាមច្រកកំពង់ផែស្វយ័តរបស់កម្ពុជា ។ លោកបន្ថែមថា នៅឆ្នាំខាងមុខ កំពង់ផែស្វយ័តក្រុងព្រះសីហនុអាចនឹងកកស្ទះ ដូចនេះ ដើម្បីដោះស្រាយបញ្ហាកកស្ទះ កម្ពុជាត្រូវការសាងសង់កំពង់ផែថ្មីមួយទៀតដែលមានជម្រៅទឹកជ្រៅជាងកំពង់ផែចាស់ ។
លោកបន្តថា ក្រៅពីការស្នើសុំថវិកាសាងសង់កំពង់ផែថ្មីមួយទៀតនៅខេត្តព្រះសីហនុ កម្ពុជាក៏បានស្នើសុំឱ្យជប៉ុនជួយរៀបចំប្លង់មេប្រព័ន្ធដឹកជញ្ជូនឱ្យកាន់តែទំនើប ដើម្បីសម្រួលការដឹកជញ្ជូននៅកម្ពុជាបានលឿនរហ័ស ។
ទាក់ទងនឹងសំណើនេះដែរ ជប៉ុនក៏បានយល់ព្រម ហើយនឹងជួយរៀបចំឲ្យកម្ពុជាផងដែរ ។ ម្យ៉ាងទៀត កម្ពុជាបានស្នើសុំឱ្យជប៉ុនជួយរៀបចំ EDI ជារៀបចំឯកសារអេឡិចត្រូនិក រាល់ពេលកប៉ាល់ចេញចូលឆ្លងកាត់កំពង់ផែកម្ពុជា ព្រោះសព្វថ្ងៃនេះ រាល់ឯកសាររបស់កប៉ាល់ចេញចូល គឺធ្វើដោយដៃទាំងអស់ ដែលធ្វើឲ្យការងារយឺតយ៉ាវ និងកកស្ទះ ។ ពាក់ព័ន្ធនឹងបញ្ហានេះដែរ លោក ស៊ុន ចាន់ថុល ថា ជប៉ុនបានយល់ព្រមឯកភាពជាមួយកម្ពុជា ក្នុងការរៀបចំប្រព័ន្ធនេះហើយដែរ ។
បើតាមការបញ្ជាក់របស់លោកទេសរដ្ឋមន្ត្រី ស៊ុន ចាន់ថុល ឲ្យដឹងថា រហូតមកដល់បច្ចុប្បន្ន រដ្ឋាភិបាលជប៉ុនតាមរយៈទីភ្នាក់ងារសហប្រតិបត្តិការអន្តរជាតិជប៉ុន ហៅកាត់ថា (JICA) បានផ្តល់កម្ចីប្រមាណ១៧៨,៦លានដុល្លារអាមេរិកហើយសម្រាប់អភិវឌ្ឍន៍កំពង់ផែខេត្តព្រះសីហនុ ដោយមិនទាន់រាប់បញ្ចូលកម្ចីក្រោយនេះទេ ៕
ចែករំលែកព័តមាននេះ