ខេត្តកំពត ៖ ទីបំផុតកីឡាការិនី ហេង ស៊ីវឡាង ជាម្ចាស់ជើងឯកជិះកង់ឡើងភ្នំនៅប្រទេសម៉ាឡេស៊ីកាលពីឆ្នាំ២០១៦ បានក្លាយជាម្ចាស់ជើងឯកជិះកង់ឡើងភ្នំអន្តរជាតិដូចការរំពឹងទុកនៅក្នុងការប្រកួតដែល
ខេត្តកំពត ៖ ទីបំផុតកីឡាការិនី ហេង ស៊ីវឡាង ជាម្ចាស់ជើងឯកជិះកង់ឡើងភ្នំនៅប្រទេសម៉ាឡេស៊ីកាលពីឆ្នាំ២០១៦ បានក្លាយជាម្ចាស់ជើងឯកជិះកង់ឡើងភ្នំអន្តរជាតិដូចការរំពឹងទុកនៅក្នុងការប្រកួតដែលបានធ្វើឡើងនៅរមនីយដ្ឋានបូកគោ កាលពីថ្ងៃអាទិត្យទី៧ ឧសភា កន្លងមកនេះ ។
នៅក្នុងព្រឹត្តិការណ៍ប្រកួតជាលក្ខណៈអន្តរជាតិដែលកម្ពុជាទទួលធ្វើជាម្ចាស់ផ្ទះលើកទី១ ឆ្នាំ២០១៧ នៅរមណីយដ្ឋានឋានសួគ៌បូកគោលើកនេះ កីឡាការិនីជម្រើសជាតិកម្ពុជារូបនេះពិតជាធ្វើបានល្អខ្លាំងណាស់ដោយបានប្រជែងយកឈ្នះគូប្រកួតមកពីប្រទេសម៉ាឡេស៊ី ដោយប្រើថិរវេលាត្រឹមតែ១ម៉ោង៣២នាទីនិង៤០វិនាទីប៉ុណ្ណោះ ក្នុងរយៈចម្ងាយ៥១គីឡូម៉ែត្រ ។
កីឡាការិនី ហេង ស៊ីវឡាង បានប្រាប់ឱ្យដឹងនៅមុនពេលប្រកួតមួយថ្ងៃថា សម្រាប់ការប្រកួតលើកនេះនាងពិតជាមានជំនឿចិត្តយ៉ាងច្រើនក្នុងការយកឈ្នះលើការប្រកួតនេះ ។
បានជានាងហ៊ាននិយាយដូច្នេះ ដោយសារមុនពេលប្រកួតប៉ុន្មានខែនាងបានព្យាយាមមកហ្វឹកហាត់នៅទីនេះក្នុងមួយសប្ដាហ៍យ៉ាងតិចក៏២ឬ៣ដងដែរ ដើម្បីឱ្យស៊ាំទៅនឹងអាកាសធាតុក៏ដូចជាទីកន្លែងនៅមុនពេលប្រកួតដែរ ។ នាងបញ្ជាក់ថា មុននឹងធ្វើអ្វីមួយឱ្យទទួលជោគជ័យទៅបាន លុះត្រាតែមានការតាំងចិត្តទុកជាមុន ។
ជាក់ស្ដែងដូចជាការប្រកួតលើកនេះតែម្ដង នាងបានចំណាយពេលមិនតិចថ្ងៃទេក្នុងការហ្វឹកហាត់ដើម្បីយកឈ្នះ ។ ហេង ស៊ីវឡាង ជាកីឡាការិនីកម្ពុជាតែម្នាក់គត់ដែលតែងតែជួយលើកមុខមាត់កម្ពុជានៅលើឆាកអន្តរជាតិតាមរយៈការប្រកួតកីឡាជិះកង់នេះ ។
គួររំលឹកថា ព្រឹត្តិការណ៍ប្រកួតជិះកង់ឡើងភ្នំជាលក្ខណៈអន្តរជាតិផ្នែកនារីដែលកម្ពុជាទទួលធ្វើជាម្ចាស់ផ្ទះលើកដំបូងនេះមាន៣ប្រទេសចូលរួម គឺកម្ពុជា ថៃ និងម៉ាឡេស៊ី ។ ប៉ុន្តែដល់ថ្ងៃប្រកួតកីឡាការិនីថៃអវត្តមាន ដូច្នេះនៅសល់តែកម្ពុជា និងម៉ាឡេស៊ីប៉ុណ្ណោះ ។ នៅក្នុងការប្រកួតនេះ កីឡាការិនីកម្ពុជាមាន២រូប និងម៉ាឡេស៊ីមាន៣រូប ។ ជាលទ្ធផល កីឡាការិនីកម្ពុជាទាំងពីររូបដណ្ដើមបានជ័យជម្នះទាំងអស់គ្នាក្នុងនោះកីឡាការិនីហេង ស៊ីវឡាង ជាប់ចំណាត់ថ្នាក់លេខ១ និងកីឡាការិនីហេង ស៊ីវហ្គេច ជាប់ចំណាត់ថ្នាក់លេខ២ ៕
ចែករំលែកព័តមាននេះ