រាជធានីភ្នំពេញ ៖ រិន សារ័ត្ន មកពីក្លិបទីបញ្ជាការកងទ័ពជើងទឹក និងបឺត សង្ឃឹម មកពីក្លិបរ៉ាហាប់ស្វាយប៉ាក ត្រូវបានគេរៀបចំឱ្យជួបប្រកួតជាមួយកីឡាករថៃនៅលើសង្វៀនទូរទស្សន៍ស៊ីអិនស៊ីថ្ងៃអាទិត្យ
រាជធានីភ្នំពេញ ៖ រិន សារ័ត្ន មកពីក្លិបទីបញ្ជាការកងទ័ពជើងទឹក និងបឺត សង្ឃឹម មកពីក្លិបរ៉ាហាប់ស្វាយប៉ាក ត្រូវបានគេរៀបចំឱ្យជួបប្រកួតជាមួយកីឡាករថៃនៅលើសង្វៀនទូរទស្សន៍ស៊ីអិនស៊ីថ្ងៃអាទិត្យទី៧ ឧសភា ខានស្អែកនេះ ។ អ្នកនិយមទស្សនាកីឡាប្រដាល់ភាគច្រើនកំពុងទន្ទឹងរង់ចាំមើលថាតើកីឡាករកម្ពុជាទាំងពីររូបនេះអាចទៅរួចជាមួយកីឡាករបរទេសដែរឬយ៉ាងណា ខណៈកីឡាករថៃត្រូវគេអះអាងថាមានសមត្ថភាពមិនអាចមើលស្រាលបែបហ្នឹងនោះ ។
រិន សារ័ត្ន ត្រូវជួបកីឡាករថៃឈ្មោះ សក្តិសិទ្ធ សរ.អ៊ូឌីយីម ក្នុងប្រភេទទម្ងន់៦៥គីឡូក្រាម ។ រិន សារ័ត្ន ធ្លាប់ប្រកួត២៨ដង ឈ្នះ១៦ដង ចាញ់៨ដង ស្មើ១ដង និងធ្លាប់ផ្ដួលគូប្រកួតឱ្យសន្លប់បាន៧ដង ក្នុងពេលកីឡាករថៃធ្លាប់ប្រកួត៦២ដង ឈ្នះ៤៥ដង ចាញ់១៥ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៥ដង ។ កីឡាករទាំងពីររូបនេះមិនធ្លាប់ជួបគ្នាពីមុនមកទេទើបគេពិបាកប៉ាន់ស្មានពីលទ្ធផលចុងក្រោយ បើទោះជាកីឡាករថៃរូបនេះមានប្រវត្តិប្រកួតច្រើនជាងបន្តិចក្ដីក៏មិនប្រាកដថាអាចយកឈ្នះកីឡាករកម្ពុជាបាននោះដែរ ។
បឺត សង្ឃឹម មកពីក្លិបរ៉ាហាប់ស្វាយប៉ាក ត្រូវជួបប្រកួតជាមួយកីឡាករថៃឈ្មោះ ភីតណាមអេក ស.ប៉ាកន ក្នុងប្រភេទទម្ងន់៥៧គីឡូក្រាម ។ បឺត សង្ឃឹម ធ្លាប់ប្រកួត៥២ដង ឈ្នះ៣៩ដង ចាញ់១១ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន១៧ដង ក្នុងពេលកីឡាករថៃធ្លាប់ប្រកួត៦៥ដង ឈ្នះ៥០ដង ចាញ់១៣ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៨ដង។ តាមការវាយតម្លៃទៅលើប្រវត្តិប្រកួតរវាងគូនេះគឺអាចស៊ីសងគ្នាបាន គ្រាន់តែមិនទាន់ដឹងថា អ្នកណានឹងក្លាយជាអធិរាជនៅលើសង្វៀននៅនាទីចុងក្រោយប៉ុណ្ណោះ ។
ចំណែកគូប្រកួតមិត្តភាពធម្មតាវិញមាន កីឡាករ ឡុង ស្រស់ មកពីក្លិបសាលវ័ន្តកីឡាប្រកួតជាមួយកីឡាករ អ៊ុយ សុចគង់ មកពីក្លិបសុភានូមានជ័យ ។ កីឡាករ ហូ សុភា មកពីក្លិបឃ្លាំងមឿងកីឡា ប្រកួតជាមួយកីឡាករ ឡុង សុធា មកពីក្លិបខ្លារខិនមានឫទ្ធិ ។ កីឡាករ ចាន់ ហេង មកពីក្លិបអេភូថងកីឡា ប្រកួតជាមួយកីឡាករ ភិន សុទី មកពីក្លិបទីបញ្ជាការកងទ័ពជើងទឹក និងគូចុងក្រោយកីឡាករ នួន ចាន់រាជ មកពីក្លិបតាព្រហ្មមានជ័យ ប្រកួតជាមួយកីឡាករ សិទ្ធ វណ្ណៈ មកពីក្លិបសាមគ្គីកូនខ្មែរ ៕
ចែករំលែកព័តមាននេះ