ចក្រភពអង់គ្លេស ៖ សហភាពអឺរ៉ុប(EU) បានព្រមានដល់ប្រទេសអង់គ្លេសថា ការដកខ្លួនចេញពីសហភាពនេះ នឹងបង្កឲ្យមានការចំណាយច្រើនណាស់ ។
លោកMichel Barnier ប្រធានអ្នកចរចារបស់EUបាននិយាយកាលពីថ្ងៃពុធថា៖ «មនុស្សមួយចំនួនបានបង្កើតជារូបភាពមួយថា Brexit នឹងមិនមានការប៉ះពាល់ដល់ជីវិតរបស់ពួកយើងទេ ហើយថា ការចរចានឹងត្រូវបានប្រព្រឹត្តឡើងដោយឆាប់រហ័ស និងមិនមានផលប៉ះពាល់ ។ ប៉ុន្តែវាមិនដូចបែបនេះទេ »។
មានការរាយការណ៍មកថា ប្រទេសអង់គ្លេសអាចនឹងជួបនឹងការបង់ប្រាក់ដល់ទៅ១០០ប៊ីលានផោន ឬ១០៩ប៊ីលានដុល្លារ ដើម្បីចាកចេញពីEU ។
ប៉ុន្តែចំនួននេះត្រូវបានបដិសេធភ្លាមៗដោយលោក David Davis លេខាធិការផ្នែក Brexit របស់ចក្រភពអង់គ្លេស ។
លោកបាននិយាយក្នុងបទសម្ភាសន៍តាមវិទ្យុមួយថា ៖ «វាបានកើនពី៥០ប៊ីលានផោន ទៅ ៦០ប៊ីលានផោន ទៅ១០០ប៊ីលានផោន ។ ខ្ញុំដឹងថា នោះមិនមែនជាចំនួនពិតប្រាកដទេ » ។
ប្រទេសជាសមាជិករបស់ EU ត្រូវបង់ប្រាក់សម្រាប់ថវិការួមមួយដែលផ្តល់ប្រាក់សម្រាប់គម្រោងហេដ្ឋរចនាសម្ព័ន្ធ កម្មវិធីសង្គម ការស្រាវជ្រាវវិទ្យាសាស្ត្រ ការផ្តល់ឧបត្ថម្ភធនដល់កសិករ និងប្រាក់ចូលនិវត្តន៍សម្រាប់មន្ត្រីEUជាដើម ។
អ្នកចរចាពេលនេះត្រូវកំណត់ចំនួនដែលប្រទេសអង់គ្លេសត្រូវបង់ដើម្បីដោះស្រាយកិច្ចសន្យាហិរញ្ញវត្ថុរបស់ខ្លួនជាមួយនឹង EU ។
ក្រុមអ្នកជំនាញការBruegel បានគណនាថាការបង់ប្រាក់ដំណាក់កាលដំបូងរបស់ចក្រភពអង់គ្លេសអាចនឹងស្មើ១០៩ប៊ីលានផោនឬស្មើនឹង១១៩ប៊ីលានដុល្លារអាមេរិក ៕
ចែករំលែកព័តមាននេះ