ខេត្តព្រះសីហនុ ៖ ក្ដីរំពឹងរបស់ប្រជាពលរដ្ឋខ្មែរដែលគិតថានឹងអាចប្រើប្រាស់ប្រេងឥន្ទនៈដែលផលិតនៅក្នុងស្រុកដោយខ្លួនឯងនោះ ពេលនេះបានលេចជារូបរាងហើយ ហើយនេះក៏ជាការបើកទំព័រសករាជថ្មីមួយទៀតរបស់កម្ពុជាផងដែរ ដោយរោងចក្រចម្រាញ់ប្រេងដ៏ធំមួយដែលគ្រោងចំណាយថវិកាប្រមាណ១.៦២០លានដុល្លារអាមេរិកនោះ កាលពីព្រឹកថ្ងៃទី៤ ឧសភា ម្សិលមិញ ក្រុមហ៊ុនខេមបូឌាន ភេត្រូខេមីខល ខូអិលធីឌី (Cambodian Petrochemical Co.,Ltd )បានធ្វើពិធីបើកការដ្ឋានសាងសង់ដំណាក់កាលទី១ហើយ ដែលមានទីតាំងស្ថិតនៅតំបន់សេដ្ឋកិច្ចពិសេស(អេច ខេ ធី)ក្នុងភូមិព្រែកទាល់ ឃុំទឹកថ្លា ស្រុកព្រៃនប់ ។
ការសាងសង្រ់ដំណាក់កាលទី១នេះ នឹងចំណាយប្រាក់ចំនួន៦២០លានដុល្លារអាមេរិក ដែលមានសមត្ថភាពផលិតបានរហូតដល់២លានតោនក្នុងមួយឆ្នាំ ។
លោកឧកញ៉ា ហាន់ ឃៀង អគ្គនាយកប្រតិ បិត្តក្រុមហ៊ុន Cambodian Petrochemical Co.,Ltd បានថ្លែងថា រោងចក្រនេះស្ថិតលើផ្ទៃដីជាកម្មសិទ្ធិស្របច្បាប់ទំហំសរុបប្រមាណ៣៨៧ហិកតា ត្រូវបានទទួលការសាងសង់និងផ្គត់ផ្គង់ពីក្រុមហ៊ុន EPC. SINO Great Wall Internatinal Engineering Co.ltd. ក្នុងនោះក្រុមហ៊ុន CPECC Design ជាអ្នកទទួលបន្ទុករចនាប្លង់ ស្ថាបត្យកម្ម, ក្រុមហ៊ុនCNPC ជាអ្នកដំឡើងភ្លើង និងក្រុមហ៊ុន Lanzhou ជាអ្នកទទួលបន្ទុកផ្នែកគ្រឿងចក្រ ។ ចំណែកដំណើរការសាងសង់អាចនឹងហើយរួចរាល់នៅឆ្នាំ២០១៩ ។ វត្តុធាតុដើមចម្រាញ់ប្រេងជំហានដំបូង និងនាំចូលពីរបរទេស និងជំហានបន្ទាប់ អាចប្រើប្រាស់វត្តុធាតុដើមក្នុងស្រុក នៅពេលណាអណ្តូងរ៉ែប្រេងស្រុកខ្មែរដំណើរការទទួលបានលទ្ធផល ។
លោកឧកញ៉ាថ្លែងថា ៖ « សង្វាក់ផលិតកម្មដំណាក់កាលទីមួយ រួមមាន ប្រេងសាំង ប្រេងម៉ាស៊ូត និងហ្គាស ហើយកាកសំណល់ដែលសល់ពីផលិតប្រេងទាំងនោះ នឹងអាចយកទៅផលិតបន្តនូវសម្ភារប្រើប្រាស់ជាច្រើនមុខទៀត ហើយកាកសំណល់ចុងក្រោយ ធ្វើជាជ័រកៅស៊ូក្រាលផ្លូវថ្នល់ ។ នៅពេលណាសាងសង់រួចរាល់ រោងចក្រនេះនឹងចាប់ផ្តើមដំណើរការផលិតជាជំហានដំបូងចំនួន២លានតោនក្នុងមួយឆ្នាំ ហើយត្រូវការបុគ្គលិកនិងកម្មករបម្រើការងារមិនតិចជាង១.០០០នាក់នោះឡើយ ។ នៅថ្ងៃអនាគត បុគ្គលិកកម្មករក្នុងតំបន់សេដ្ឋកិច្ច ពិសេសនេះ អាចនឹងឈានដល់១០ម៉ឺននាក់ »។
លោកឧកញ៉ាបញ្ជាក់ថា ៖ «ក្រុមហ៊ុន នឹងធ្វើការដំឡើងស្ថានីយប្រេងចំនួន៣០០ទីតាំង នៅទូទាំងប្រទេសនៅតាមបណ្តោយផ្លូវជាតិ ហើយតម្លៃប្រេងសាំង ប្រេងម៉ាស៊ូត ក៏ដូចជាហ្គាសអាចមានតម្លៃទាបជាងក្រុមហ៊ុនលក់ប្រេងនានាដែលកំពង់ធ្វើសកម្មភាពក្នុងស្រុកនាពេលបច្ចុប្បន្ននេះដែរ » ។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពល ដែលបានអញ្ជើញជាអធិបតីបើកសម្ពោធការដ្ឋានសាងសង់នោះ បានមានប្រសាសន៍ថា នេះមោទនភាពសម្រាប់កម្ពុជា ក្រោយក្រុមហ៊ុនផលិតបានថាមពល មិនត្រឹមតែផ្គត់ផ្គង់សម្រាប់ទីផ្សារក្នុងស្រុកនោះទេ ប៉ុន្តែនឹងត្រូវលក់ផ្គត់ផ្គង់សម្រាប់ទីផ្សារអន្តរជាតិទៀតផង ដែលផលិតផលចេញពីរោងចក្រនេះ មានប្រេងសាំង ប្រេងម៉ាស៊ូត និងហ្គាស ហេីយដំណើរការសាងសង់រោងចក្រក្នុងដំណាក់កាលទី១ នឹងបញ្ចប់នាពាក់កណ្ដាលឆ្នាំ២០១៩ និងដំណាក់កាលទី២ នឹងចាប់ផ្ដើមសាងសង់នៅឆ្នាំ២០២២ ជាមួយទុនវិនិយោគ១ពាន់លានដុល្លារ ដែលមានសមត្ថភាពផលិតបាន៣លានតោនក្នុងមួយឆ្នាំសម្រាប់ផ្គត់ផ្គង់ទីផ្សារក្នុងស្រុក និងអន្តរជាតិ ។
គួរបញ្ជាក់ថា កម្ពុជាបាននិងកំពុងនាំចូលប្រេងឥន្ទនៈ និងឧស្ម័នពីប្រទេសជិតខាងទាំងស្រុង តាមរយៈក្រុមហ៊ុនក្នុងស្រុក និងក្រុមហ៊ុនអន្តរជាតិចំនួន១៤ ដើម្បីធ្វើការលក់ចែកចាយនៅទូទាំងប្រទេស។ នៅឆ្នាំ២០១៥ ការប្រើប្រាស់ប្រេងឥន្ធនៈសរុបមានចំនួន១,៨លានតោន គឺកើនឡើង៦,៧%ធៀបឆ្នាំ២០១៤ ក្នុងនោះប្រេងម៉ាស៊ូតកើន៩,៣% ប្រេងសាំងកើន៥,៦% និងឧស្ម័នឥន្ធនៈកើន(LPG)៦%ដែលឆ្លុះបញ្ចាំងឲ្យឃើញថា តម្រូវការប្រើប្រាស់ប្រេងឥន្ធនៈនឹងបន្តកើនឡើងនៅឆ្នាំបន្ទាប់ទៀតជាមួយនឹងកំណើនសេដ្ឋកិច្ចរបស់ប្រទេស ៕
ចែករំលែកព័តមាននេះ