ខេត្តកំពង់ស្ពឺ ៖ រថយន្តប្រភេទបែនដឹកថ្មពណ៌ត្រេអ៊ី ពាក់ស្លាកលេខ ខេមរភូមិន្ទ និងមានបិទស្លាកសញ្ញា (ង៧០) ផងនោះ បានរេចង្កូតបុករបាំងពុះផ្លូវបណ្តាលឲ្យខូចទៅមុខលែងរួច
ខេត្តកំពង់ស្ពឺ ៖ រថយន្តប្រភេទបែនដឹកថ្មពណ៌ត្រេអ៊ី ពាក់ស្លាកលេខ ខេមរភូមិន្ទ និងមានបិទស្លាកសញ្ញា (ង៧០) ផងនោះ បានរេចង្កូតបុករបាំងពុះផ្លូវបណ្តាលឲ្យខូចទៅមុខលែងរួច តែសំណាងល្អមិនមានគ្រោះថ្នាក់ដល់អាយុជីវិតមនុស្សឡើយ គ្រាន់តែខូចរថយន្តប៉ុណ្ណោះ។ ឧប្បត្តិហេតុនេះកើតឡើងកាលពីព្រឹកថ្ងៃទី៤ ឧសភា ២០១៧ នៅមុខភូមិអង្គសេរី សង្កាត់សុពរ័ទេព ក្រុងច្បារមន ខេត្តកំពង់ស្ពឺ។ អ្នកបើកបរមិនត្រូវបានស្គាល់អត្តសញ្ញាណនោះទេ ដោយឡែករថយន្តម៉ាកហ៊ីណូ ពាក់ស្លាកលេខ ខេមរភូមិន្ទ ៣-២៩១៤។ ប្រភពពីសមត្ថកិច្ចស្រង់សម្ដីសាក្សីនៅជិតកន្លែងកើតហេតុ បានឲ្យដឹងថា គេបានឃើញរថយន្តខាងលើបើកបរទិសដៅពីលិចទៅកើតដោយមានដឹកថ្មប្រភេទ៤គុណ៦ពេញប្រៀបទ្រុងឡាន(ទ្រុងត)តែម្តង លុះមកដល់ចំណុចកើតហេតុខាងលើ ស្រាប់តែគេបានឮសូរសំឡេងផ្ទុះយ៉ាងខ្លាំង ស្រាប់តែឃើញរថយន្តខាងលើរេចង្កូតទៅបុករបាំងពុះទ្រូងផ្លូវ បណ្តាលឲ្យបាក់ប៉ុងទៅមុខលែងរួចតែម្តង។
ប្រភពបន្តថា ក្រោយកើតហេតុពេលសមត្ថកិច្ចទៅដល់អ្នកបើកបរមិនបានសហការនោះទេ ដោយនិយាយថា ចាំដោះស្រាយជាមួយមេរបស់គេទៅ។ ក្រុមមហាជនបានលើកឡើងថា ជារៀងរាល់ថ្ងៃរថយន្តខាងលើនេះតាមរយៈការសង្កេតគេដឹកថ្មមិនសូវលស់ពេលនោះទេ តែគ្មានអ្នកណាម្នាក់ដឹងនោះទេ ថាតើថ្មដែលគេដឹករាល់ថ្ងៃនេះគេដឹកយកទៅណាឲ្យប្រាកដ និយាយរួមគឺដឹកជាប្រចាំថ្ងៃតែម្តង។ អ្នកខ្លះបាននាំគ្នាលើកឡើងថា ឡានមានបិទស្លាកសញ្ញាទាហានបែបនេះ ប្រហែលជាគេដឹកយកទៅកសាងបន្ទាយទេដឹង? ដោយឡែកអ្នកខ្លះទៀតលើកឡើងថា បើដឹកថ្មទាំងនេះទៅលក់វាទំនងជាង ព្រោះឡាននេះបានដឹកថ្មរាប់ឆ្មាំមកហើយមិនដែលមានបន្ទាយឯណាកសាងរាប់ឆ្នាំបែបនេះនោះទេ។ ដោយឡែកអ្នកខ្លះទៀតព្រលយពាក្យថា ឡាននេះមិនមែនជាឡានរបស់ខាងទាហានកងពលតូចលេខ៧០នោះទេ គឺថៅកែឡានបានបង់លុយប្រចាំខែក្នុង០១គ្រឿង១០០ដុល្លារ ដើម្បីយកស្លាកលេខ និងស្លាកសញ្ញាមកបិទបន្លំភ្នែកសមត្ថកិច្ចតាមដងផ្លូវ និងមហាជនថា ជាឡានរបស់ខាងទាហានដែលធាតុពិតឡានទាំងនោះភាគច្រើនជាឡានអត់ពន្ធផងក៏មិនដឹង? មិនមានប្រភពណាមួយហ៊ានអះអាងថា ថៅកែឡាននេះបង់លុយតាមរយៈមន្ត្រីទាហានរូបណាឡើយ។ បើតាមមន្ត្រីនគរបាលមួយរូបបានប្រាប់ថា តាមការត្រួតពិនិត្យគឺឧប្បត្តិហេតុនេះបណ្តាលមកពីរថយន្តដឹកលើសចំណុះ ទើបបែកកង់ខាងមុខរេចង្កូតទៅបុកទ្រូងផ្លូវបែបនេះ។
រឿងឡានដឹកថ្មមានបិទស្លាកសញ្ញាទាហានរបៀបនេះ កើតមានច្រើនឆ្នាំមកហើយ ក្នុងនោះមហាជនរស់នៅក្រុងច្បារមនបានចំណាយពេលច្រើនឆ្នាំមកហើយក្នុងការរង់ចាំមើលខាងសមត្ថកិច្ចបង្ក្រាបឡានដឹកថ្មទាំងនេះ។ ដោយសារតែគេសម្អាងលើស្លាកលេខទាំងនេះហើយមើលទៅ ទើបបានជាពេលបង្កគ្រោះថ្នាក់ម្តងៗមិនដែលនៅកន្លែងកើតហេតុដោះស្រាយនោះឡើយ គឺរត់យកតែរួចខ្លួនរង់ចាំមេរបស់គេចូលខ្លួនមកដោះស្រាយជាក្រោយ។ជាក់ស្តែងដូចជាករណីនេះជាដើម ចាត់ទុកថាសំណាងហើយដែលមិនបង្កឲ្យមានគ្រោះថ្នាក់ដល់អាយុជីវិតមនុស្សនោះផង អ្នកបើកបរនៅមិនផ្តល់ការសហការណ៍ចុះទម្រាំបង្កឲ្យមានគ្រោះថ្នាកដល់ជីវិតមនុស្សវិញរឿងអីគេនៅឲ្យចាប់ខ្លួន។
ម្យ៉ាងឡានទាំងនេះសុទ្ធសឹងតែតទ្រុងដែលអាចផ្ទុកថ្មបានច្រើនចំណេញក្នុងការរត់យកថ្មទៅលក់នៅភ្នំពេញ។ លោកវតសេនីយ៍ទោ អ៊ូច ហៀង អធិការនគរបាលក្រុងច្បារមនបានឲ្យដឹងថា ករណីខាងលើសមត្ថកិច្ចរបស់លោកបានត្រឹមចុះធ្វើកំណត់ហេតុប៉ុណ្ណោះ ដោយឡែកសំណងការខូចខាតសម្បត្តិសាធារណៈគឺខាងសាធារណការជាអ្នកចាត់ចែង រឿងឃាត់មិនឃាត់រថយន្តទុកខាងលោកមិនដឹងនោះទេ។ មិនអាចសុំការបំភ្លឺបានទេពាក់ព័ន្ធនឹងបញ្ហាខាងលើដោយភ្នាក់ងារយើងបានទូរស័ព្ទទៅលោក ហុង ចាន់សុខា ប្រធានមន្ទីរសាធារណាការ ជាច្រើនដងតែចូលហើយមិនមានអ្នកលើកទទួល។ ដោយឡែកពាក់ព័ន្ធនឹងរថយន្តដឹកថ្មដែលមានពាក់ស្លាកលេខ ខេមរភូមិន្ទ និងមានបិទស្លាកសញ្ញារបស់កងពលតូចលេខ៧០នេះ ដែលមិនមានសុំការពន្យល់បានទេពីថ្នាក់ដឹកនាំកងពលមួយនេះថាជារបស់អង្គភាពមួយនេះពិត ឬក៏ដូចការលើកឡើងរបស់មហាជននោះទេ៕
ចែករំលែកព័តមាននេះ