ខេត្តកំពង់ចាម ៖ ច្រាំងទន្លេមេគង្គត្រង់ចំណុចភូមិចុងថ្នល់ទី១ សង្កាត់បឹងកុក ក្រុងកំពង់ចាម បានបាក់ជាង១ខែមកហើយ គឺការបាក់នោះកាន់តែមានទំហំធំឡើងៗ
ខេត្តកំពង់ចាម ៖ ច្រាំងទន្លេមេគង្គត្រង់ចំណុចភូមិចុងថ្នល់ទី១ សង្កាត់បឹងកុក ក្រុងកំពង់ចាម បានបាក់ជាង១ខែមកហើយ គឺការបាក់នោះកាន់តែមានទំហំធំឡើងៗ រហូតដល់បាក់ទាំងផ្លូវក្រាលកៅស៊ូទៀត ដែលធ្វើឲ្យផ្លូវកាន់តែមានលក្ខណៈរាងតូចជាងមុន។ ហើយការធ្វើដំណើរទៅវិញទៅមកក៏ត្រូវជួបការលំបាកថែមទៀត ពលរដ្ឋរស់នៅក្បែរនោះមានក្តីកង្វល់ខ្លាចទឹកទន្លេ ឡើងមកបាក់ដល់ផ្ទះរបស់គាត់ និងបង្កគ្រោះថ្នាក់ដល់មនុស្សផងដែរ។ ស្ត្រីឈ្មោះ លី សៀក អាយុ៤២ឆ្នាំ មានផ្ទះជាប់មាត់ទន្លេប្រាប់ឲ្យដឹងនៅព្រឹកថ្ងៃទី៤ ឧសភា ២០១៧ថា របាំងបេតុងច្រាំងទន្លេមុខផ្ទះដែលគាត់នៅនោះបានបាក់បន្តិចម្តងៗ តែចុងក្រោយនេះពេលមានភ្លៀងធ្លាក់បង្អុរចុះមកក៏បានហូរច្រោះដីផ្លូវថែមទៀត ហើយបានបង្កឲ្យគាត់មានការភិតភ័យ និងការបាក់ច្រាំងនោះខ្លាចចេះតែបាក់បន្តមកដល់ផ្ទះឈើរបស់បងគាត់ ដែលបានឲ្យស្នាក់នៅមើលការខុសត្រូវនោះ។
ស្ត្រីឈ្មោះ លី សៀក ប្រាប់បន្តថា បើគិតមកដល់ព្រឹកថ្ងៃទី៤ ឧសភា នេះ ជាង១ខែហើយនូវតែមិនទាន់ឃើញមានស្ថាប័នណាមួយចុះមកជួសជុលនូវឡើយទេ ព្រោះថាដល់រដូវវស្សាទឹកទន្លេបានចាប់ផ្តើមឡើងមកបន្តិចម្តងៗហើយ។ ត្រង់កន្លែងបាក់នោះ មានពលរដ្ឋបានយកឈើទៅដោតជាសញ្ញា និងបានដាក់ភ្លើងសញ្ញាភ្លឺនៅពេលយប់ទៀត ក្រែងមានអ្នកដំណើរណាមកពីទីឆ្ងាយ ជិះមិនបានប្រុងប្រយ័ត្ននឹងត្រូវធ្លាក់រណ្តៅដីនោះបង្កគ្រោះថ្នាក់។ កន្លែងបាក់នេះកន្លងមកបានធ្វើការជួសជុល៣លើកហើយតែគាត់ឃើញថា មិនបានប៉ុន្មានបានបាក់ខូចខាតទៅវិញ មិនដឹងមកពីមូលហេតុអ្វីដែរ។ លោកយាយឈ្មោះ អៀង ភាង អាយុ៧៧ឆ្នាំ នៅភូមិចុងថ្នល់ទី១ មានប្រសាសន៍ឲ្យដឹងថា ច្រាំងទន្លេត្រង់ចំណុចមុខផ្ទះរបស់គាត់នេះបានបាក់រហូតដល់ទៅ៣លើក ហើយជាមួយនោះគាត់មានក្តីកង្វល់ខ្លាចតែនៅក្នុងរដូវវស្សាខាងមុខទឹកឡើងមកអាចនឹងបណ្តាលឲ្យបាក់បន្ថែមទៀត ប្រសិនណាបើមិនប្រញាប់ជួសជុលឲ្យបានទាន់ពេលវេលាទេនោះ។
ស្រួលមិនស្រួលច្រាំងបាក់បន្តិចម្តងៗមកដល់ផ្ទះរបស់គាត់ហើយដីខ្លីផង មិនដឹងជាទៅរកដីមកពីណានៅទៀតឡើយ សូមឲ្យអាជ្ញាធរពាក់ព័ន្ធជួសជួសជុលឲ្យបានលឿន និងងាយស្រួលក្នុងការធ្វើដំណើរ ចាប់តាំងពីច្រាំងបាក់មកនេះគាត់មិនដែលបានឃើញមានពលរដ្ឋណាម្នាក់ជិះយានយន្តធ្លាក់រណ្តៅទេ។ លោកស្រី គឹមឈីន មេភូមិចុងថ្នល់ទី១ មានប្រសាសន៍ឲ្យដឹងដែរថា បញ្ហាបាក់ច្រាំងទន្លេនៅក្នុងភូមិរបស់លោកមានមាន៣លើកមកហើយ រួមទាំងលើកក្រោយនេះប្រវែងប្រហែល៥០ម៉ែត្រ ក៏បានសសេររបាយការណ៍ទៅដល់អាជ្ញាធរសង្កាត់បឹងកុក អាជ្ញាធរក្រុង បានដឹងជ្រួតជ្រាប និងបានថែមទាំងចុះមក ពិនិត្យមើលថែមទៀតលោកអភិបាលខេត្តក៏បានអញ្ចើញចុះមកដែរ ។ រូបលោកកំពុងតែពន្លឿនលើកិច្ចការទាំងនេះ ដើម្បីឲ្យក្រុមការងារចុះមកជួសជុលទាន់ពេលវេលា ធ្វើយ៉ាងណាកុំឲ្យពលរដ្ឋមានការភ័យខ្លាច៕
ចែករំលែកព័តមាននេះ