ខេត្តបាត់ដំបង ៖ អ្នកបើកត្រាក់ទ័រភ្ជួរចំការម្នាក់ភ័យស្ទើរលស់ព្រលឹង បន្ទាប់ពីគាត់ភ្ជួរដីប៉ះគ្រាប់មីនតោនមួយគ្រាប់ប៉ើងផុសចេញពីក្នុងដីកាលពីរសៀលថ្ងៃទី៣ ឧសភា នៅក្នុងដីចំការរបស់គាត់ដែលស្ថិតនៅចំណុចភូមិស្វាយ ឃុំបឹងរាំង ស្រុកកំរៀង ហើយបានរាយការណ៍ភ្លាមៗទៅកាន់សមត្ថកិច្ចមូលដ្ឋាន ។
សមត្ថកិច្ចបានរាយការណ៍ថា កសិករម្នាក់ឈ្មោះ យ៉យ យុត្ត បានបើកត្រាក់ទ័រភ្ជួរដីចំការរបស់ខ្លួន ស្រាប់តែប៉ះចំគ្រាប់មីនតោនមួយគ្រាប់ផុសចេញពីក្នុងដីធ្វើឱ្យគាត់ភ័យស្ទើរលស់ព្រលឹង ។
សេចក្ដីរាយការណ៍បានបញ្ជាក់ថា គ្រាប់មីននោះនៅមានគុណភាព ហើយបានប៉ើងតាមផាលត្រាក់ទ័រ តែបើត្រាក់ទ័របើកកិនប្រាកដជាផ្ទុះគ្រោះថ្នាក់ធ្ងន់ធ្ងរជាមិនខាន ។ អ្នកបើកបរត្រាក់ទ័រពិតជាសំណាងមែនទែន ។
បើតាមការបំភ្លឺពីលោកយ៉យ យុត្ត បាននិយាយថា ដីចំការរបស់គាត់ធ្លាប់ភ្ជួរដាំដំណាំរាល់ឆ្នាំ តែមិនធ្លាប់ជួបប្រទះគ្រាប់មីនបែបនេះទេ លុះចាប់ផ្ដើមភ្ជួរពេលនេះ ស្រាប់តែចេញគ្រាប់មីនតោនពីក្នុងដីតែម្ដង ។ គាត់បានប្រាប់សមត្ថកិច្ចថា ពេលកំពុងភ្ជួរគាត់បានប្រទះឃើញគ្រាប់នោះប៉ើងផុសចេញពីក្នុងដីធ្វើឱ្យគាត់តក់ស្លុតយ៉ាងខ្លាំង ហើយក៏បញ្ឈប់សកម្មភាពភ្ជួរភ្លាម និងបានរាយការណ៍ប្រាប់សមត្ថកិច្ចមូលដ្ឋានភ្លាមៗដែរ ដើម្បីឱ្យជួយពិនិត្យ និងដោះស្រាយ ។
ទោះជាយ៉ាងណា បើតាមសមត្ថកិច្ចបានឱ្យដឹងថា ក្រោយពីប្រទះឃើញគ្រាប់មីនតោនដ៏គ្រោះថ្នាក់នេះអាជ្ញាធរបានរាយការណ៍ប្រាប់អង្គភាពកម្ចាត់មីន«ហេឡូត្រាស»ដែលនៅតំបន់នោះឱ្យជួយអន្តរាគមន៍ចុះមកពិនិត្យ និងចាត់វិធានការភ្លាមៗដែរ ។ សមត្ថកិច្ចបានបញ្ជាក់ថា ក្រោយពេលពិនិត្យមន្ត្រីកម្ចាត់មីន បានយកគ្រាប់មីននោះចេញពីកន្លែងកើតហេតុ ដើម្បីរៀបចំកម្ទេចចោលហើយ៕
ចែករំលែកព័តមាននេះ