រាជធានីភ្នំពេញ ៖ ជាឱកាសសាងកេរ្តិ៍ឈ្មោះឱ្យលូតលាស់ឡើងថែមទៀត ដោយតារាកំប្លែងរលកក្រោយកញ្ញាសោម ស្រីអូនត្រូវលោកព្រហ្ម ម៉ាញយកជាដៃគូចម្រៀងអាយ៉ៃ ។
តារាកំប្លែងទើបរះ និងនៅក្មេងខ្ចីកញ្ញាសោម ស្រីអូន កំពុងប្រឹងប្រែងដើម្បីលេចធ្លោក្នុងពិភពសិល្បៈ ។ ដោយឃើញទេពកោសល្យច្រៀងអាយ៉ៃរបស់ស្រីអូននាពេលកន្លងមក លោកព្រហ្ម ម៉ាញ ក៏ជ្រើសរើសយកនាងជាដៃគូឡើងឆាកសម្តែងម្នាក់ទៀតក្រៅពីអ្នកស្រីនួន សារី ហៅយាយយ៉យដែលជាគូសម្តែងចាស់។ មួយរយៈចុងក្រោយនេះកញ្ញាស្រីអូនមានឱកាសចាប់ដៃគូច្រៀងអាយ៉ៃជាមួយលោកព្រហ្ម ម៉ាញ ជាបន្តបន្ទាប់ ។ ការសម្តែងអាយ៉ៃផ្តោះផ្តងគ្នាជាមួយសិល្បករជើងចាស់របស់នាងដែលផ្សាយផ្ទាល់តាមទូរទស្សន៍ធ្វើឱ្យទស្សនិកជនភ្ញាក់ផ្អើលចំពោះទេពកោសល្យរបស់ស្រីអូន។ ជាមួយពាក្យពេចន៍ឌឺដងដាក់គ្នា«ម៉ាំងទៅម៉ាំងមក» ជាមួយដៃគូលោកព្រហ្ម ម៉ាញ ធ្វើឱ្យទស្សនិកជនបានសើចសប្បាយ ។
កញ្ញាសោម ស្រីអូន រៀបរាប់ឱ្យដឹងក្នុងជំនួបកាលពីពេល ថ្មីៗកន្លងមកថា នាងប្រឡូកអាជីពសិល្បៈទើបតែរយៈពេល៣ឆ្នាំប៉ុណ្ណោះ គឺចាប់ផ្តើមលេងកំប្លែងតែម្តង ។ អាជីពកំប្លែងនេះបានមកដោយចៃដន្យប៉ុណ្ណោះ គឺនាយហុងដា ជាអ្នកបើកផ្លូវបញ្ចូលនាងឱ្យសម្តែងគ្រាដែលនាងច្រៀងក្នុងកម្មវិធីមង្គលការ ។ ចៃដន្យខ្វះដៃគូកំប្លែងនាយហុងដាយកនាងជំនួសភ្លាមតែម្តង ។ ដោយឃើញនាងមាននិស្ស័យ និងទេពកោសល្យក៏ឱ្យបន្តការងាររហូតមកដល់សព្វថ្ងៃនេះ ។
សោម ស្រីអូន អតីតជាសិស្សនៅសាលាវិចិត្រសិល្បៈផ្នែកចម្រៀងបុរាណ ហើយឆ្លៀតពេលពីការសិក្សាចូលរួមច្រៀងភ្លេងការ ជាឱកាសដែលនាំឱ្យបានជួបតារាកំប្លែងល្បី ។
តារាកំប្លែងថ្មីមានប្រភពចេញពីខេត្តកោះកុងកញ្ញាសោម ស្រីអូនចាប់ដៃគូច្រៀងអាយ៉ៃជាមួយលោកព្រហ្ម ម៉ាញ ជិត១ឆ្នាំមកហើយ ពិសេសនៅស្ថានីយទូរទស្សន៍ស៊ីធីអិន ដែលមានអ្នកនាងយុគ ចិន្តា និងនាយទុយជាពិធីករ ។
សោម ស្រីអូននិយាយថា «នាងខ្ញុំមិនដែលនឹកដល់ថា ខ្លួនអាចទៅរួចនោះទេ និងកាន់តែព្រួយបារម្ភពេលដឹងថាមកឈរជើងលើវេទិកាល្បី ហើយតំណែងនេះគឺយាយយ៉យ និងតារាចម្រៀងផ្សេងទៀត គាត់ជាអ្នកកាន់កាប់ ហើយមហាជនសុទ្ធតែទទួលស្គាល់ថាល្អ ។ អីុចឹងហើយយើងជាក្មេងបើគិតពីអាយុវិញដូចចៅរបស់លោកព្រហ្ម ម៉ាញ ។ យ៉ាងណាមិញ ក្រោយពេលសម្រេចគោលការណ៍ពីមួយសប្តាហ៍ទៅមួយសប្តាហ៍ នាងខ្ញុំត្រូវបានលោកពូព្រហ្ម ម៉ាញឱ្យខំរៀនវិជ្ជាអាយ៉ៃនេះជាបន្តទៀត ព្រោះថានាងខ្ញុំអាចទៅបានលោកនឹងបណ្តុះបណ្តាលឱ្យល្អ ជាធនធានថ្មី ។ គាត់ឱ្យនាងខ្ញុំខំមើលរៀមច្បង និងអានសៀវភៅកំណាព្យ ផ្សេងៗឱ្យច្រើនដើម្បីមានចំណេះដឹងទូលាយ ហើយអាចចាប់ចុងចួនបាន ភ្លាមៗឆ្លងឆ្លើយគ្នាតទៅតមក ។
លើសពីនេះអ្នកមីងយ៉យក៏បានផ្តល់ជាយោបល់ផងដែរថា នាងខ្ញុំអាចជារលកថ្មីក្នុងអាជីពអាយ៉ៃ ត្រូវតែខិតខំធ្វើឱ្យបានកម្រមានអ្នកចេះណាស់ ខ្វះខាតអ្វីមីងយ៉យគាត់នឹងប្រាប់វិធីច្រៀង ថ្មីៗទៀត ។ មូលហេតុបែបនេះហើយនាងខ្ញុំបានខិតខំព្យាយាមឱ្យខ្លួនកាន់តែប្រសើរឡើងថែមទៀត ដើម្បីបានគ្រងការងារជាអ្នកចម្រៀងអាយ៉ៃនេះឱ្យបានល្អ ទោះជាលំបាកបែបណាក្តី ព្រោះនាងខ្ញុំស្រឡាញ់និងចង់ថែរក្សាស្នាដៃមួយនេះឱ្យល្អបន្តទៀត » ។
កញ្ញាសោម ស្រីអូន ក្រៅពីសម្តែងជាមួយលោកព្រហ្ម ម៉ាញ តែងតែមានឱកាសសម្តែងកំប្លែងជាមួយក្រុមកំប្លែងនាយកុយ នាយចាបចៀន នាយខ្ជឹបជាដើម ។ ក្រៅពីកំប្លែងនាងសម្តែងភាពយន្តបានចំនួនពីររឿង ៕
ចែករំលែកព័តមាននេះ