រាជធានីភ្នំពេញ ៖ រដ្ឋមន្ត្រីក្រសួងព័ត៌មាន លោកខៀវ កាញ៉ារីទ្ធ បានស្នើសុំដល់ក្រសួងវប្បធម៌ និងវិចិត្រសិល្បៈ ឱ្យបបង្ហាញនូវភស្តុតាងច្បាស់មួយ ជុំវិញការដាក់បំរាមហាមឃាត់ដល់តារាសម្តែង កញ្ញា ដេនី ក្វាន់ ដែលមិនឱ្យប្រឡូកក្នុងសិល្បៈរយៈពេលមួយឆ្នាំនោះ ។ ការស្នើសុំរបស់លោករដ្ឋមន្ត្រីក្រសួងព័ត៌មាន បានធ្វើឡើងបន្ទាប់ពីលិខិតមួយច្បាប់របស់ក្រសួងវប្បធម៌ និងវិចិត្រសិល្បៈ ដាក់ជូនក្រសួងព័ត៌មាន ដើម្បីពិនិត្យ និងកិច្ចសហការហាមឃាត់ដល់បណ្តាស្ថានីយទូរទស្សន៍ និងអាជីវករ ដែលមានមុខរបរពាក់ព័ន្ធ និងវិស័យសិល្បៈវប្បធម៌ ឱ្យផ្អាកទទួលយកតារាកញ្ញា ដេនី ក្វាន់ ចូលរួមសម្តែង។
ដោយភ្ជាប់ទៅនឹងលិខិតមួយនេះ លោករដ្ឋមន្ត្រីខៀវ កាញ៉ារិទ្ធ បានបង្ហោះសារដោយខ្លីថា «ខ្ញុំមិនដែលស្គាល់នាងទេ ហើយក៏មិនឈឺក្បាលរឿងនាងស្លៀកពាក់នៅក្រៅឆាកដែរ តែការហាមឃាត់ការសម្តែងរបស់នាង ត្រូវមានភស្តុតាងច្បាស់លាស់ ក្រោយការណែនាំហើយ»។ តាមរយៈសារ ដែលលោករដ្ឋមន្ត្រីក្រសួងព័ត៌មានបង្ហោះនាពេលនេះ គឺមានន័យថា លោកចង់ឲ្យក្រសួងវប្បធម៌ និងវិចិត្រសិល្បៈបង្ហាញនូវភស្តុតាងជាក់លាក់ណាមួយមកកាន់ក្រសួង ដែលជាការដាក់បន្ទុកដល់តារាសម្តែងនាង ដេនី ក្វាន់។
ពាក់ព័ន្ធបញ្ហាខាងលើនេះរដ្ឋលេខាធិកាក្រសួងវប្បធម៌ និងវិចិត្រសិល្បះ និងជាអ្នកនាំពាក្យក្រសួងលោក ថៃនរះ សត្យា បានអះអាងប្រាប់កោះសន្តិភាពតាមទូរស័ព្ទថា យោបល់លោករដ្ឋមន្ត្រី ខៀវ កាញ៉ារីទ្ធ គឺជាយោបល់ផ្ទាល់ខ្លួនរបស់លោកប៉ុណ្ណោះ ក្នុងន័យដើម្បីឱ្យខាងយើងខិតខំធ្វើការងារបន្ត ដើម្បីជាឧទាហរណ៍មួយ សម្រាប់កូនចៅរបស់យើងដែលទទួលការប្រទេចប្រដាស់សារហើយ បានយើងប្រតិកម្មតាមក្រោយ ។
ចែករំលែកព័តមាននេះ