រាជធានីភ្នំពេញ ៖ ស្ទើរមិនគួរឱ្យជឿសោះ ដែលលោកមឿន វណ្ណា ជាអ្នកថតភាពយន្តល្បីម្នាក់ បែរជាជួបគ្រោះអកុសល រហូតបាត់បង់ជីវិត ដោយសាត្រូវរន្ទះដ៏ឃោរឃៅបាញ់ប្រហារគាត់ស្លាប់បែបនេះ ដែលធ្វើឱ្យគ្រប់គ្នាស្រឡាំងកាំង រហូតដាក់អារម្មណ៍ទទួលយកមិនបាន ។ ហេតុការណ៍ដ៏រន្ធត់នេះ កើតឡើងខណៈពេលកំពុងថត កាលពីល្ងាចថ្ងៃទី០៣ ឧសភា ដែលថតរឿងរបស់អ្នកស្រីពាន់ ភួងបុប្ផា ស្ថិតនៅភ្នំបាសិត ។ អ្នកកាន់កាមេរ៉ា លោកមឿន វណ្ណា បានទទួលមរណភាព បង្កឱ្យរំជើបរំជួលយ៉ាងខ្លាំង នៅក្នុងពិភពសិល្បៈ ។
តារាសម្ដែងភាគច្រើន សុទ្ធតែបានប្រកូសប្រកាសនៅលើហ្វេសប៊ុក ពីការស្ដាយស្រណោះ ខណៈដែលមរណភាពរបស់លោក បានក្លាយជារឿងសោកស្តាយពីអ្នកសិល្បៈដែលតារាសិល្បៈជជែកគ្នា ក្ន្ងងស្ថានភាពរន្ធត់។ កញ្ញាញឹម ចាន់ថន និយាយថា លោកវណ្ណា គឺជាអ្នកថតដែលមានជំនាញច្បាស់លាស់ និងបានបម្រើជាមួយផលិតកម្មខ្មែរមេគង្គ ដែលក្រៅពីថតអោយខ្មែរមេគង្គលោកក៏ទទួលកាន់កាមេរ៉ាអោយបណ្ដាក្រុមហ៊ុន និងផលិតកម្មដទៃផងដែរ ។
នាងថា តារាសម្ដែងនៅក្នុងប្រទេសកម្ពុជាភាគតិចណាស់ ដែលមិនស្គាល់លោកវណ្ណា ដោយសារតែលោកកាន់ការងារជាអ្នកថតកុនច្រើនឆ្នាំមកហើយមុនពេលទទួលមរណភាព ។ លោកបានស្លាប់ក្នុងពេលទៅថតរឿងឱ្យផលិតកម្មថោននៅភ្នំបាសិត កាលពីល្ងាចថ្ងៃទី៣ ឧសភា ដោយសារតែលោកបន្តថតក្នុងពេលធ្លាក់ភ្លៀងតិចៗ ។ មានតែលោកម្នាក់ឯងប៉ុណ្ណោះ ដែលបានទទួលមរណភាព ដោយក្រុមការងារផ្សេងពួកគេត្រឹមតែសន្លប់ប៉ុណ្ណោះ ក្នុងពេលរន្ទះបាញ់វាយប្រហារ ។
អ្នកនាងខាត់ សុឃីម និយាយថា ជារឿងតក់ស្លុតណាស់ ដែលមនុស្សម្នាក់ត្រូវស្លាប់ដោយសាររន្ទះ ដោយសារមិនបានដឹងមុនថាភ្លៀងដែលបានធ្លាក់ចុះស្រិចៗប៉ុណ្ណឹងសោះ នឹងមានរន្ទះបាញ់មករំខាន។ អ្នកនាងថាខ្លួនស្លុតចិត្តណាស់ចំពោះមរណភាពរបស់លោកមឿន វណ្ណា ហើយអ្នកនាងក៏កាន់តែមានអារម្មណ៍ភ័យញ័រផងដែរ ដោយសារតែកាលចូលឆ្នាំស្វាមីរបស់អ្នកនាង និងក្រុមការងារក៏កាន់កាមេរ៉ាថតកណ្ដាលភ្ញៀងផងដែរ ដោយមិនបានគិតដល់រឿងហ្នឹង។
លោកសុភេន អ្នកដឹកនាំកម្មវិធី «ចង់ក្លាយជាតារា»របស់ទូរទស្សន៍អប្សរាបានបង្ហោះសារនៅលើហ្វេសបុក បង្ហាញការសោកស្តាយជាពន់ពេក ការបាត់បង់លោកវណ្ណា ដែលជាអ្នកជំនាញថតដ៏ពូកែម្នាក់ ។ ក្រៅពីនោះ មានលោកម៉េង ប៊ុនឡូ កញ្ញានៅ សូនីតា លោកអ៊ុក សុភក្រ័រិទ្ឋសុខតែសោកស្តាយចំពោះរឿងនេះនឹងសម្តែងនូវអារម្មណ៍អាឡោះអាឡ័យជាច្រើន ។
ចែករំលែកព័តមាននេះ