សហរដ្ឋអាមេរិក ៖ កាលពីមួយខែមុន ប្រធានាធិបតីអាមេរិក លោកដូណាល់ ត្រាំ (Donald Trump) បានដាក់ឈ្មោះឲ្យប្រទេសចិនថាជា «ជើងឯកផ្នែកទម្លាក់តម្លៃប្រាក់ » ។ ប៉ុន្តែក្នុងពេលបច្ចុប្បន្ននេះលោកបែរជានិយាយផ្សេងទៅវិញ ។
លោកត្រាំបាននិយាយក្នុងបទសម្ភាសន៍មួយកាលពីថ្ងៃចន្ទថា ៖ « តាំងពីខ្ញុំបានចាប់ផ្តើមឈរឈ្មោះ ពួកគេមិនបានទម្លាក់តម្លៃប្រាក់ដើម្បីជំរុញដល់ការនាំចេញទេ »។
សម្តីនេះគឺផ្ទុយនឹងសម្តីរបស់លោក ពេលដែលលោកឈរឈ្មោះជាបេក្ខជន ដោយលោកបានចោទប្រកាន់ប្រទេសចិនម្តងហើយម្តងទៀតថា ប្រទេសនេះបានទម្លាក់តម្លៃប្រាក់យន់ដោយចេតនាដើម្បីផ្តល់អត្ថប្រយោជន៍ដល់ការនាំចេញ ខណៈដែលសហរដ្ឋអាមេរិកជួបប្រទះការខាតបង់ ។
លោកបានសន្យាថា រតនាគារជាតិនឹងដាក់ឈ្មោះជាផ្លូវការដល់ប្រទេសចិនថា ជាអ្នកទម្លាក់តម្លៃប្រាក់នាថ្ងៃទីមួយ នៃការឡើងកាន់តំណែងរបស់លោកផងដែរ ។
ប៉ុន្តែលោកបានបរាជ័យក្នុងការគោរពតាមពាក្យសន្យា ដោយលោកបានអះអាងថា ប្រទេសចិនបានបញ្ឈប់ការទម្លាក់តម្លៃប្រាក់ ព្រោះតែយុទ្ធនាការបោះឆ្នោតរបស់លោក ក៏នៅមានកំហុសដែរ។
លោក Chi Lo ឧត្តមសេដ្ឋវិទូម្នាក់មកពី ស្ថាប័ន BNP Paribas បាននិយាយថា ប្រទេសចិនបានបង្កើតទីផ្សាររូបិយប័ណ្ណសាជាថ្មីតាំងពីលោកដូណាល់ ត្រាំ ឡើងកាន់តំណែងមក ។
ក្នុងអំឡុងពាក់កណ្តាលឆ្នាំ២០១៤និងដើមឆ្នាំនេះ ប្រទេសចិនបានចំណាយប្រាក់១ទ្រីលានដុល្លារក្នុងការជំរុញដល់ប្រាក់យន់ ខណៈដែលសេដ្ឋកិច្ចរបស់ប្រទេសនេះមានការអន់ថយ ហើយប្រាក់ជាច្រើនត្រូវបានចាក់ចូលទៅក្នុងប្រទេស ។ ប្រសិនបើមិនមានការលូកដៃពីរដ្ឋាភិបាលទេ សេដ្ឋវិទូបាននិយាយថា ប្រាក់យន់ចិន ប្រហែលជាអាចនឹងធ្លាក់ចុះច្រើនជាងនេះទៀត ហើយអាចនឹងបង្កឲ្យមានការជ្រួលច្របល់ក្នុងទីផ្សារពិភពលោក ។
លោកដូណាល់ ត្រាំ បាននិយាយកាលពីថ្ងៃទី២១ ខែមេសា កន្លងមកថា ប្រទេសចិនបានបញ្ឈប់ការទម្លាក់តម្លៃប្រាក់របស់ពួកគេហើយពេលដែលលោកឡើងកាន់តំណែង ។
លោក Julian Evans-Pritchard សេដ្ឋវិទូនៅស្ថាប័ន Capital Economics បាននិយាយថា៖ « ខ្ញុំគិតថាអ្វីដែលលោកត្រាំចង់និយាយនោះគឺតម្លៃប្រាក់យន់មានស្ថិរភាពឡើងវិញ បើធៀបនឹងតម្លៃប្រាក់ដុល្លារ បន្ទាប់ពីមានការធ្លាក់ចុះអស់ជិត២ឆ្នាំ ។ លោកដូចជាចង់និយាយថា វាកើតឡើង ព្រោះតែលោកដាក់សម្ពាធលើប្រទេសចិន ប៉ុន្តែយើងមិនទាន់មានភ័ស្តុតាងណាមួយដែលបង្ហាញពីការផ្លាស់ប្តូរនៃគោលនយោបាយអត្រាប្តូរប្រាក់របស់ប្រទេសចិនទេតាំងពីការបោះឆ្នោតរបស់លោកត្រាំមក »៕
ចែករំលែកព័តមាននេះ