រាជធានីភ្នំពេញ ៖ វិស័យសូត្រកម្ពុជា បច្ចុប្បន្នកំពុងប្រឈមនឹងការធ្លាក់ចុះ ដោយសារកត្តាជាច្រើន រួមទាំងការចំណាកស្រុករបស់ពលរដ្ឋ និងថ្លៃដើមខ្ពស់ក្នុងការផលិត ។ ដើម្បីឲ្យវិស័យមួយនេះ មានភាពល្អប្រសើរឡើងវិញ អ្នក ជំនាញយល់ថា លុះត្រាតែមានការវិនិយោគ និងគាំទ្រពីរាជរដ្ឋាភិបាល ដើម្បីជំរុញការអភិវឌ្ឍ ។ នេះបើយោងតាមខ្លឹមសារក្នុងជំនួបពាណិជ្ជកម្ម វិស័យសូត្រកម្ពុជា និងសហព័ន្ធសូត្រអន្តរជាតិ ដែលបានប្រារព្ធនៅទីស្ដីការក្រសួងពាណិជ្ជកម្ម កាលពីល្ងាចថ្ងៃទី២ ឧសភា ។
ប្រធានគណៈកម្មាធិការសូត្រជាតិ លោក ម៉ៅ ថូរ៉ា មានប្រសាសន៍ថា វិស័យសូត្រកម្ពុជា មានការធ្លាក់ចុះនៅសល់ប្រហែល៤០%ប៉ុណ្ណោះ ដោយសារពលករវ័យក្មេងដែលបម្រើការងារនៅក្នុងផ្នែកនេះបានចំណាកស្រុកទៅធ្វើការនៅក្រៅប្រទេស ដែលទទួលបានចំណូលខ្ពស់ជាង ការផលិតសូត្រលក់នៅទីផ្សារ ។
លោក ប៉ាវ អៀងឃ័ង នាយកក្រុមហ៊ុនចម្រុះសិប្បករអង្គរ បានឱ្យដឹងថា សូត្រជាមុខរបរមួយដែលអាចជួយឱ្យសេដ្ឋកិច្ចគ្រួសារនិងប្រទេសជាតិមានការកើនឡើង តែវិស័យនេះជួបផលលំបាក គឺការផលិតសសៃសូត្រ ។
លោកបន្តថា ៖ « តាមការស្រាវជ្រាវរបស់ខ្ញុំឃើញថា កម្ពុជាអាចផលិតសូត្របានរហូត១៥០តោន ក្រោយសង្គ្រាមលោកលើកទី១ ប៉ុន្តែដោយសារការអភិវឌ្ឍ និងសង្គ្រាម បានធ្វើឱ្យសូត្រខ្មែរបាត់បង់ទៅវិញ »។
លោកបន្ដថា ៖ « កម្ពុជាមានអ្នកផលិតសូត្រច្រើន តែបានបោះបង់វិញ ដោយសារកត្តាឧស្សាហកម្ម និងការងារមួយចំនួនដែលធ្វើឱ្យប៉ះពាល់ ។ អ្វីដែលប៉ះពាល់ខ្លាំងបំផុតសម្រាប់គឺវត្ថុធាតុដើមផលិត ហើយប្រសិនវត្ថុធាតុដើមជាសសៃសូត្រថ្លៃខ្ពស់ពេកនោះ មិនអាចធ្វើឱ្យអ្នកផលិតរកចំណូលបានទេ » ។
អ្នកអង្គម្ចាស់ Pheanuroth Sisowathសមាជិកក្រុមប្រឹក្សានៃSDC បានឲ្យដឹងថា ៖ « សព្វថ្ងៃនេះវិស័យសូត្រខ្មែរ ត្រូវការការគាំទ្រពីរាជរដ្ឋាភិបាល និងគ្រប់ស្ថាប័នពាក់ព័ន្ធ ដើម្បីឱ្យការផលិតសូត្របានត្រឹមត្រូវ និងបន្តពង្រឹងលើផ្នែកបច្ចេកទេសរបស់ពួកគាត់ ប្រសិនបើយើងចង់ឆ្ពោះទៅមុខ ហើយបើចង់ប្រកួតប្រជែងលើទីផ្សារសព្វថ្ងៃនេះ លុះត្រាតែគ្រប់ប្រតិបត្តិករ ងាកមកផលិតសូត្រដែលមានគុណភាពខ្ពស់ ជាជាងយកតែបរិមាណ ជាពិសេសត្រូវការថវិកា និងការវិនិយោគជាចាំបាច់ ប្រសើរជាងការបណ្តុះបណ្តាលតែលើជំនាញ » ។
ក្នុងជំនួបនោះដែរ រដ្ឋមន្ត្រីក្រសួងពាណិជ្ជកម្ម លោកប៉ាន សូរស័ក្ដិ បានលើកឡើងថា វិស័យសូត្របានផ្តល់ការងារជូនអ្នកតម្បាញជាស្ត្រីនៅតាមជនបទប្រមាណ២ម៉ឺននាក់ ។ នៅក្នុងឆ្នាំ២០១២ កម្ពុជាបាននាំចេញផលិតផលសូត្រ មានទំហំទឹកប្រាក់ជាង៧សែនដុល្លារអាមេរិក តាមរយៈពាណិជ្ជកម្មឆ្លងកាត់បន្ទាត់ព្រំដែន និងការលក់ឲ្យភ្ញៀវទេសចរអន្តរជាតិ ។
លោកបញ្ជាក់ថា ៖ « ផលិតផលសូត្ររបស់កម្ពុជាជាង៩៥% ត្រូវបានផលិតពីសរសៃសូត្រពណ៌សដែលនាំចូលពីបរទេស ដោយសារតែបរិមាណផលិតកម្មសរសៃសូត្រនៅកម្ពុជាមានកម្រិតតិចតួចនៅឡើយ »។
លោករដ្ឋមន្ត្រីបន្តថា តាមរបាយការណ៍របស់មជ្ឈមណ្ឌលពាណិជ្ជកម្មអន្តរជាតិ(ITC)បានឲ្យដឹងថា ការផលិតវត្ថុធាតុដើមពីសូត្រក្នុងមួយឆ្នាំ គិតជាមធ្យមមានចំនួន៨ម៉ឺនតោន ក្នុងនោះសរសៃសូត្រជាង៧០%មានប្រភពមកពីប្រទសចិន ។ ពាណិជ្ជកម្មសូត្រសកល ត្រូវបានគេប៉ាន់ស្មានថា មានតម្លៃប្រមាណ២៥ពាន់លានដុល្លារ ។ ដោយឡែកនៅក្នុងប្រទេសកម្ពុជា សូត្រត្រូវបានចាត់ទុកជាផលិតផលអាទិភាពដែលមានសក្តានុពលនាំចេញដូចបានកំណត់ក្នុងយុទ្ធសាស្ត្រសមាហរណកម្មពាណិជ្ជកម្មរបស់កម្ពុជា (CTIS)ឆ្នាំ២០០៧ និងឆ្នាំ២០១៤ ។
លោករដ្ឋមន្ត្រីបន្ថែមថា ដើម្បីធានានិរន្តរភាពការអភិវឌ្ឍវិស័យសូត្រក្នុងរយៈពេលវែង រាជរដ្ឋាភិបាលកម្ពុជា តាមរយៈក្រសួងពាណិជ្ជកម្ម បានបង្កើតឲ្យមានគណៈកម្មាធិការសូត្រជាតិ និងចងក្រងនូវយុទ្ធសាស្ត្រសូត្រជាតិកម្ពុជា ឆ្នាំ២០១៦-២០២០ផងដែរ ។
បច្ចុប្បន្ន គណៈកម្មាធិការសូត្រជាតិកម្ពុជា កំពុងប្រើប្រាស់យុទ្ធសាស្ត្រនេះ ធ្វើជាផែនទីសម្រាប់បង្ហាញផ្លូវ ដើម្បីកៀរគរជំនួយហិរញ្ញវត្ថុ និងបច្ចេកទេសបន្ថែមពីលេខាធិការដ្ឋានEIF និងដៃគូអភិវឌ្ឍន៍អន្តរជាតិផ្សេងៗ សំដៅអភិវឌ្ឍន៍សង្វាក់តម្លៃសូត្រប្រណីតរបស់កម្ពុជា និងគាំទ្រប្រតិបត្តិការរបស់ក្រុមហ៊ុនផលិតសូត្រកម្ពុជាទាំង១៤ក្រុមហ៊ុន ៕
ចែករំលែកព័តមាននេះ