ប្រទេសកូរ៉េខាងត្បូង ៖ បន្ទាប់ពីលោកប្រធានាធិបតីអាមេរិកលោក ដូណាល់ ត្រាំ បានចោទជាសំនួរថា តើអ្នកណាគួរតែរ៉ាប់រងការចំណាយសម្រាប់ប្រព័ន្ធការពារមីស៊ីលរបស់សហរដ្ឋអាមេរិកដែលបានដំឡើងនៅកូរ៉េខាងត្បូងនោះ នាយកផ្នែកសន្តិសុខជាតិរបស់អាមេរិកបាននិយាយថា ខ្លួននឹងទទួលរ៉ាប់រង យ៉ាងហោចណាស់ក៏ក្នុងពេលបច្ចុប្បន្នដែរ ។
យោងតាមសេចក្តីថ្លែងការណ៍មួយដែលចេញផ្សាយកាលពីថ្ងៃអាទិត្យពីការិយាល័យប្រធានាធិបតីកូរ៉េខាងត្បូងបានឲ្យដឹងថា លោក H.R. McMaster អ្នកប្រឹក្សាផ្នែកសន្តិសុខជាតិនៅសេតវិមាន(White House)បានប្រាប់ដល់ភាគីខាងកូរ៉េខាងត្បូងថា សហរដ្ឋអាមេរិកនឹងបន្តរ៉ាប់រងការចំណាយទាក់ទិននឹងប្រព័ន្ធនេះ ។
លោក McMaster បានឆ្លើយតបនឹងការប្រកូកប្រកាសពីលោកត្រាំកាលពីសប្តាហ៍មុនជាមួយនឹងកូរ៉េខាងត្បូងដែលជាសម្ព័ន្ធមិត្តក្នុងអាស៊ីដ៏សំខាន់របស់សហរដ្ឋអាមេរិក ។
ការដំឡើងប្រព័ន្ធការពារមីស៊ីល (THAAD)នេះ មិនបានធ្វើឲ្យជនជាតិកូរ៉េខាង ត្បូងសប្បាយចិត្តទេ និងបានប៉ះពាល់ដល់ទំនាក់ទំនងរបស់ប្រទេសនេះជាមួយចិនផងដែរ ។
ក្រសួងការពារជាតិរបស់កូរ៉េខាងត្បូងបាននិយាយម្តងហើយម្តងទៀតថា ប្រទេសនេះនឹងផ្តល់ជាដី ប៉ុន្តែមិនចូលរួមក្នុងការរ៉ាប់រងលើការចំណាយសម្រាប់ប្រព័ន្ធនេះទេ ដែលបង្កើតឡើងដើម្បីការពារការវាយប្រហារពីកូរ៉េខាងជើង ។
លោក McMaster បានផ្តល់ការធានាសាជាថ្មីដល់លោកKim Kwan-jin នាយកផ្នែកសន្តិសុខជាតិរបស់កូរ៉េខាងត្បូងថា សហរដ្ឋអាមេរិកនឹងបន្តកិច្ចព្រមព្រៀងបច្ចុប្បន្នដែលខុសពីសម្តីរបស់លោកត្រាំ ។ ប៉ុន្តែក្នុងបទសម្ភាសន៍មួយជាមួយនឹងFox News លោក McMaster បាននិយាយថា លោកមិនមាននិយាយដូច្នេះឡើយ ។
លោកបាននិយាយថា៖« មិនមែនបែបនោះ ទេ ។ អ្វីដែលខ្ញុំបានប្រាប់ដល់ភាគីខាងកូរ៉េខាងត្បូង គឺកិច្ចព្រមព្រៀងដែលមានស្រាប់នៅតែបន្តអនុម័ត លុះត្រាតែមានការចរចាឡើងវិញណាមួយ ។ ពួកយើងនឹងគោរពតាមពាក្យសម្តីរបស់ពួកយើង »។
លោកបានបន្តថា រដ្ឋាភិបាលលោកត្រាំមានគម្រោងចរចាឡើងវិញលើទំនាក់ទំនងផ្នែកយោធារបស់សហរដ្ឋអាមេរិក ជាមួយកូរ៉េខាងត្បូង និងជាមួយសម្ព័ន្ធមិត្តទាំងអស់របស់ពួកយើង ប៉ុន្តែក្រសួងការពារជាតិរបស់កូរ៉េខាងត្បូងមិនមានចំណាប់អារម្មណ៍ក្នុងការត្រលប់ទៅកាន់ការចរចាលើបញ្ហាTHAAD វិញទេ ។
ប្រទេសកូរ៉េខាងត្បូងបានជួយដល់ការចំណាយសម្រាប់កងយោធាអាមេរិកដែលមានប្រមាណ២៨.៥០០នាក់ក្នុងកូរ៉េខាងត្បូងរួចមកហើយ ដោយចួលរួមជិត៨៨៩លានដុល្លារជារៀងរាល់ឆ្នាំ ។
កិច្ចព្រមពៀងនាពេលបច្ចុប្បន្ន នឹងផុតកំណត់នាចុងឆ្នាំ២០១៨ខាងមុខ ហើយការចរចាលើការបន្តជាថ្មី ត្រូវបានគិតថា នឹងចាប់ផ្តើមក្នុងអំឡុងពេលចុងឆ្នាំនេះផងដែរ ៕
ចែករំលែកព័តមាននេះ