រាជធានីភ្នំពេញ ៖ សុខភាពក្នុងវិស័យវាយណភ័ណ្ឌកាត់ដេរ និងស្បែកជើងនៅតែមានកំណើនល្អប្រសើរ ដោយសារការកើនឡើងនូវការនាំចេញ និងវត្តមានរោងចក្របើកថ្មីៗនៅកម្ពុជា ។
រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈ លោក អុិត សំហេង បានឲ្យដឹងកាលពីថ្ងៃទី១ ឧសភា ថា វិស័យកាត់ដេរកម្ពុជា នឹងមានកំណើនប្រសើរនៅឆ្នាំនេះ ទោះបីជាការកំណត់ប្រាក់ឈ្នួលខ្ពស់ជាងមុនសម្រាប់កម្មករក៏ដោយ ។ វិស័យនេះបានផ្ដល់ការងារដល់ប្រជាជនកម្ពុជាសរុប៧៥ម៉ឺននាក់ ដោយផ្តល់ចំណូលសរុបដល់កម្មករ២ពាន់លានដុល្លារក្នុង១ឆ្នាំ ។
លោកថ្លែងថា ៖ « បើគិតទាំងប្រាក់អត្ថប្រយោជន៍ផ្សេងៗ កម្មករនិយោជិតម្នាក់ៗអាចទទួលបានប្រាក់ចំណូលពី១៧០ដុល្លារអាមេរិក ទៅ១៨១ដុល្លារអាមេរិកក្នុងមួយខែ » ។
ការនាំចេញផលិតផលកាត់ដេរ និងស្បែកជើងកម្ពុជាតែងតែរក្សាបានកំណើនប្រចាំឆ្នាំពីរខ្ទង់ជាប់ៗគ្នាកាលពីឆ្នាំមុនៗ ដែលធ្វើឲ្យអ្នកជំនាញលើកឡើងថា សម្ពាធនៃការប្រកួតប្រជែងពីគូប្រជែងថ្មីក្នុងតំបន់ នឹងបន្ទាបអត្រាកំណើនមកនៅត្រឹមមួយខ្ទង់វិញ ពោលគឺក្រោម១០ភាគរយក្នុងមួយឆ្នាំ ។
លោក ហេង សុខគង់ រដ្ឋលេខាធិការក្រសួងឧស្សាហកម្ម និងសិប្បកម្មបានថ្លែងថា សុខភាពក្នុងវិស័យឧស្សាហកម្មកម្ពុជា នៅតែមានភាពល្អប្រសើរ ដោយសារការមកដល់រោងចក្រថ្មីៗពីប្រទេសវៀតណាម និងអ្នកវិនិយោគដទៃទៀត ដែលធ្វើឲ្យវិស័យឧស្សាហកម្មមានភាពរីកចម្រើនជាបន្តបន្ទាប់ចាប់តាំងពីឆ្នាំ២០១៥ដល់ឆ្នាំនេះ ។ លោកបន្តថា ការលុបចោលនូវកិច្ចព្រមព្រៀងដៃគូពាណិជ្ជកម្មអន្តរប៉ាស៊ីហ្វិក(TPP)របស់សហរដ្ឋអាមេរិក ក្រោមរដ្ឋបាលប្រធានាធិបីលោកដូណាល់ ត្រាំ បានធ្វើឲ្យរោងចក្រមួយចំនួនដែលចាកចេញ បានត្រលប់មកកម្ពុជាវិញ។
ប្រធានសមាគមរោងចក្រកាត់ដេរនៅកម្ពុជាលោក វ៉ាន់ ស៊ូអៀង បានឲ្យដឹងថា វិស័យកាត់ដេរសម្លៀកបំពាក់ និងស្បែកជើងកម្ពុជាស្ថិតក្នុងដំណើរការល្អ បើទោះបីជាប្រតិបត្តិករកំពុងប្រឈមការកើនឡើងនៃថ្លៃពលកម្មក៏ដោយ ប៉ុន្តែអត្រាកំណើននៃវិស័យស្នូលរបស់សេដ្ឋកិច្ចកម្ពុជាមួយនេះ នឹងទាបជាងមុន ខណៈដៃគូប្រកួតថ្មីដូចជាប្រទេសមីយ៉ាន់ម៉ា និងបង់ក្លាដែស កំពុងតែវិវត្តន៍ខ្លាំងឡើង ។
GMAC មានក្រុមហ៊ុនសមាជិក៦០០ ជាមួយនឹងតម្លៃនាំចេញចំនួន៦,៨ពាន់លានដុល្លារកាលពីឆ្នាំ២០១៦ កើនឡើង៩ភាគរយធៀបនឹងឆ្នាំ២០១៥ ។ តម្លៃនេះធ្លាក់ចុះពីកំណើនពីរខ្ទង់ កាលពីឆ្នាំកន្លងទៅ ។
លោកថ្លែងថា គិតមកទល់ពេលនេះ មានរោងចក្រថ្មីចំនួន១៨ដែលបានចុះបញ្ជីរដើម្បីដំណើរការផលិតកាបូប និងសម្ភារទាក់ទងនឹងការធ្វើដំណើរ ដែលបានធ្វើឲ្យចំនួនរោងចក្រសរុបបានកើនដល់២៧រោងចក្រ ។ ក្រុមហ៊ុនមួយចំនួនកំពុងចាប់ផ្តើមសាងសង់រោងចក្រហើយគ្រោងនឹងចាប់ផ្តើមដំណើរការក្នុងពេលឆាប់ៗខាងមុខ ៕
ចែករំលែកព័តមាននេះ