ឮសំឡេងស្រែកយំ ស្ត្រីម្នាក់ឈប់ម៉ូតូទៅមើលក៏ឃើញទារកដ៏កំសត់ច្រកថង់ខ្មៅប្លុងចោលក្នុងព្រៃ
- សៀមរាប
ទារកដ៏កម្សត់ម្នាក់ទើបនឹងកើត ត្រូវបានឪពុកម្តាយមិនស្គាល់អត្តសញ្ញាណយកមកប្លុងចោលក្នុងព្រៃទាំងយប់ ប៉ុន្តែសំណាងល្
ខេត្តសៀមរាប ៖ បើតាមសេចក្តីរាយការណ៍បានឱ្យដឹងថា ទារកដ៏កម្សត់ម្នាក់ទើបនឹងកើត ត្រូវបានឪពុកម្តាយមិនស្គាល់អត្តសញ្ញាណយកមកប្លុងចោលក្នុងព្រៃទាំងយប់ ប៉ុន្តែសំណាងល្អបានស្ត្រីម្នាក់ជិះម៉ូតូមកពីធ្វើការ ក៏ប្រទះឃើញ រួចក៏យកមកផ្ទះ និងបានរាយការណ៍ប្រាប់ សមត្ថកិច្ច ដើម្បីយកទារកដ៏កម្សត់រូបនេះមកចិញ្ចឹមបីបាច់ថែរក្សាបន្តពីឪពុកម្ដាយរបស់គេវិញ បង្កឱ្យការភ្ញាក់ផ្អើលកាលពីវេលាម៉ោង២១និង០០នាទីយប់ ថ្ងៃទី១៣ ខែវិច្ឆិកា ឆ្នាំ២០២២ ស្ថិតក្នុងភូមិអូរ ឃុំកណ្តែក ស្រុកប្រាសាទបាគង ខេត្តសៀមរាប។
បើតាមសាក្សីបាននិយាយរៀបរាប់ប្រាប់ថា ទារកដ៏កម្សត់ម្នាក់ត្រូវបានឪពុកម្តាយយកមកប្លុងចោលនៅក្នុងព្រៃ បើកុំតែស្ត្រីចិត្តធម៌ម្នាក់ចេញពីធ្វើការ បានឮសំឡេងក្មេងយំ ក៏ឈប់ម៉ូតូដើររកមើល ស្រាប់តែប្រទះឃើញទារកនៅក្នុងថង់ខ្មៅ ហើយកំពុងតែស្រែកយំកងរំពងព្រៃតែម្នាក់ឯង គួរឱ្យអាណិតខ្លាំងណាស់ បន្ទាប់មកស្ត្រីរូបនោះក៏យកទារកកម្សត់ទៅផ្ទះតែម្តង។
បើតាមប្រសាសន៍របស់លោកវរសេនីយ៍ឯក លឹម សម្បត្តិ អធិការនគរបាលស្រុកប្រាសាទបាគង បានឱ្យដឹងនៅវេលាម៉ោង១៧និង៣០នាទីយប់ ថ្ងៃទី១៤ ខែវិច្ឆិកា ឆ្នាំ២០២២នេះថា ស្ត្រីឈ្មោះ សិន មករា អាយុ៣៥ឆ្នាំ រស់នៅភូមិអូរ ឃុំកណ្តែក ស្រុកប្រាសាទបាគង ខេត្តសៀម រាប បានរាយការណ៍មកសមត្ថកិច្ចយើងថា គាត់បានចេញពីធ្វើការនៅរីសត ផ្លូវកែវ សារ៉ាន់ ហើយក៏ជិះម៉ូតូមកផ្ទះវិញ។
ប្រភពដដែលបន្តថា ខណៈពេលជិះដល់ត្រង់ចំណុចខាងលិចឆៀងខាងត្បូងព្រៃដំរី ស្ថិតនៅភូមិស្ពានក្អែក ឃុំកណ្តែក ស្រុកប្រាសាទបាគង ខេត្តសៀមរាប ក៏ស្រាប់តែលឺសម្លេងក្មេងស្រែកយំតែម្តង នៅពេលលឺដូចនោះរូបនាងក៏បានឈប់ម៉ូតូ ហើយបើកភ្លើងទូរស័ព្ទ រួចដើរទៅរកមើល ក៏ស្រាប់តែប្រទះឃើញទារកម្នាក់ដែលទើបនឹងកើត (ជាកូនប្រុស) នៅនឹងថង់ខ្មៅចំហរមាត់ក្រោមដើមត្រាច ដោយមិនដឹងថា អ្នកណាយកមកទុកចោលតាំងពីពេលណានោះទេ ដោយឃើញដូច្នេះរូបនាងក៏បានយកទារករូបនោះមកផ្ទះតែម្តងទៅ ហើយក៏បានរាយការណ៍ទៅសមត្ថកិច្ចយើងភ្លាមៗដែរ។
បច្ចុប្បន្នទារកដ៏កម្សត់រូបនេះ ត្រូវបានស្ត្រីចិត្តធម៌ខាងលើ យល់ព្រមយកមកចិញ្ចឹមបីបាច់ថែរក្សាឱ្យដូចជាកូនបង្កើតរបស់ខ្លួនហើយ។ ចំណែកពលរដ្ឋវិញ ក៏បានលើកឡើងថា ឪពុកម្ដាយអីក៏ចិត្តខ្មៅម្ល៉េះ ខំពរពោះជាង៩ខែ រួចបង្កើតកូនមក បែរជាមិនចិញ្ចឹមបីបាច់ថែរក្សា ហើយយកមកបោះចោលក្នុងព្រៃគួរឱ្យសង្វេគយ៉ាងដូច្នេះ។ ពលរដ្ឋបន្តថា ឪពុកម្ដាយបែបនេះ មិនស្មើនឹងសត្វតិរិច្ឆា.នផង ព្រោះសត្វចេះថែរក្សាកូនវាបានយ៉ាងល្អ រហូតធំធាត់ដឹងក្តី៕
ចែករំលែកព័តមាននេះ