ខេត្តកំពង់ចាម ៖ ដោយមានការឯកភាពពីលោកអភិបាលស្រុក លោកឧត្តមសេនីយ៍ត្រី ឯម កុសល ស្នងការនគរបាលខេត្ត និងលោក ហួត វុទ្ធី ព្រះរាជអាជ្ញាអមសាលាដំបូងខេត្ត បានសម្រេចឲ្យរុះរើតូប៣
កន្លែងក្នុងនោះមាន ទី១-កន្លែងទំនាស់នៅភូមិច្រណោម ឃុំបុសខ្នុរ ទី២-ភូមិអូរក្រវ៉ាន់ ឃុំចម្ការអណ្តូង ទី៣-ភូមិថ្នល់បែកកើត ឃុំស្វាយទាប ស្រុកចម្ការលើ។ ក្រោយពីមានទំនាស់កើតចេញពីការយកតម្លៃលើ
សសៀវភៅបន្ទុកនោះ។ លោក ខេង ស្រេង អធិការនគរបាលស្រុកចម្ការលើ ប្រាប់ឲ្យដឹងនៅរសៀលថ្ងៃទី២ ឧសភា ២០១៧នេះថា ៖ ដោយសារតែទំនាស់កើតចេញពីការយកតម្លៃលើសសៀវភៅបន្ទុក ដែលក្រសួងសេដ្ឋកិច្ច និងហិរញ្ញវត្ថុបានកំណត់នោះ គឺអ្នករត់តាក់ស៊ីបានឲ្យតែ ៥.០០០រៀល ចំណែកអ្នកទារភាស៊ីទារដល់១១.០០០រៀល បានបង្កឲ្យមានការឈ្លោះប្រកែកគ្នា ដល់ទៅប្រើអំពើហិង្សាកន្លងទៅថ្មីៗនេះ ជាមួយនោះក្រុមអ្នករត់តាក់ស៊ីបាននាំគ្នាបិទផ្លូវជាតិលេខ៧១A ថែមទៀត។
លោក ខេង ស្រេង អធិការនគរបាលស្រុកចម្ការលើប្រាប់បន្តថា ក្រោយពីកម្លាំងរបស់សមត្ថកិច្ចបានចុះទៅជួយអន្តរាគមន៍នោះ កាលពីព្រឹកថ្ងៃទី២៩ មេសា ២០១៧ រថយន្តតូចធំបានបន្តធ្វើដំណើរជាធម្មតាវិញផងដែរ។ ហើយអ្នកទារភាស៊ី៣នាក់ ត្រូវបានហៅមកសួរនាំនៅអធិការដ្ឋាននគរបាលស្រុកចម្ការលើ ចំពោះជម្លោះដែលបានកើតឡើងភាគីទាំងសងខាងមិនបានប្តឹងផ្តល់គ្នានោះទេ។ ក្នុងពេលពលល្ងាចថ្ងៃដដែលលោកអភិបាលស្រុកបានហៅអ្នករត់តាក់ស៊ី មកប្រជុំនៅសាលាស្រុកចម្ការលើ ដោយបានលើកឡើងពីសំណើមាន ១-សំណូមពរឲ្យយកភាស៊ីទៅតាមសៀវភៅបន្ទុក ២-ឲ្យរុះរោងចាំទារលុយនៅភូមិច្រណោមចេញ។ ហើយអ្វីដែលលោក ខ្លូត ចិន្តា អភិបាលស្រុក បានសន្យាជាមួយនឹងបងប្អូនអ្នករត់តាក់ស៊ី បានទទួលយកសំណើទាំងនោះ រហូតមដល់ព្រឹកថ្ងៃទី០១ ឧសភា បានហៅតំណាងក្រុមអ្នកទារភាស៊ីមកធ្វើការសម្របសម្រួលហើយក៏បានយល់ព្រមឲ្យរុះរើរោងនៅភូមិច្រណោម ឃុំបុសខ្នុរចេញនាព្រឹកដដែលនោះ។
ចំណែកទីតាំង២កន្លែងទៀត ដែលមាននៅភូមិអូរក្រវ៉ាន់ ឃុំចម្ការអណ្តូង និងភូមិថ្នល់បែក ឃុំស្វាយទាប ស្រុកចម្ការលើ ត្រូវបានឲ្យរុះរើចេញទាំងអស់ ព្រោះថាកន្លែងទាំងអស់នេះគឺម្ចាស់តែម្នាក់ទេ។ អ្នកភូមិច្រណោម ប្រាប់ឲ្យដឹងដែរថា ទីតាំងរោងដែលគេចាំទារភាស៊ីពីរថយន្តដឹកអ្នកដំណើរដោយបានធ្វើឡើងជាប់នឹងផ្លូវជាតិលេខ៧១A ចាប់តាំងពីពេលដែលគាត់បានឃើញមានរយៈពេលជាង១០ឆ្នាំមកហើយធ្លាប់ទាំងបានឃើញដុំថ្មហោះមកកាត់មុខផ្ទះរបស់គាត់ថែមទៀត ដំបូងៗមានការភិតភ័យទំនាស់ទារភាស៊ី។ តែក្រោយៗមកលុះពេលដែលស៊ាំទៅក្លាយទៅជាធម្មតាទៅហើយ រោងនេះទើបត្រូវបានឃើញអាជ្ញាធរចុះរុះរើនៅនៅព្រឹកថ្ងៃទី០១ ឧសភា ២០១៧ នេះទេ៕
ចែករំលែកព័តមាននេះ