លោក អ៊ិន សុភិន អគ្គនាយកក្រុមហ៊ុនមហាហង្ស បានលើកឡើងថា រហូតមកដល់នាពេលនេះ ក្រុមហ៊ុនរបស់លោកនៅមិនទាន់ចេញលិខិត និងការយល់ព្រមណាមួយចំពោះការស្នើសុំលាលែងពីតំណែងលំដាប់រងទី១ របស់កញ្ញា
រាជធានីភ្នំពេញ ៖ លោក អ៊ិន សុភិន អគ្គនាយកក្រុមហ៊ុនមហាហង្ស បានលើកឡើងថា រហូតមកដល់នាពេលនេះ ក្រុមហ៊ុនរបស់លោកនៅមិនទាន់ចេញលិខិត និងការយល់ព្រមណាមួយចំពោះការស្នើសុំលាលែងពីតំណែងលំដាប់រងទី១ របស់កញ្ញា ហង្ស សុរិយាន់ ក្នុងកម្មវិធី Miss Grand Cambodia 2022 នៅឡើយទេ។
ការអះអាងរបស់លោក អ៊ិន សុភិន នាពេលនេះ បានធ្វើឡើង បន្ទាប់ពីកញ្ញា ហង្ស សុរិយាន់ បានចេញលិខិតបើកចំហរមួយ ដោយបានស្នើសុំលាលែងពីតំណែងលំដាប់រងទី១ កញ្ញាឯកកម្ពុជា កាលពីពេលថ្មីៗ ក្នុងពេលដែលតាមរយៈលិខិតនេះ នាងមិនបានបញ្ជាក់ពីហេតុផលនោះឡើយ។
ពាក់ព័ន្ធបញ្ហាខាងលើនេះ លោក អ៊ិន សុភិន បានអះអាងប្រាប់កោះសន្តិភាពតាមសារអេឡិចត្រូនិច នៅថ្ងៃទី១៤ ខែវិច្ឆិកា ឆ្នាំ២០២២នេះថា ការស្នើសុំលាលែងពីតំណែងរបស់កញ្ញា ហង្ស សុរិយាន់ នាពេលនេះ គឺជាការគិតរបស់នាងតែម្ខាងប៉ុណ្ណោះ ប៉ុន្តែសម្រាប់ក្រុមហ៊ុន គឺមិនទាន់យល់ព្រមនៅឡើយទេ។
លោកបញ្ជាក់ថា រហូតមកដល់ពេលនេះ លោកនិងក្រុមហ៊ុន ជាមួយកញ្ញា ហង្ស សុរិយាន់ គឺមិនដែលមានបញ្ហាអ្វីឡើយ ហើយកន្លងមក នាងមិនចង់ចេញទៅប្រកួត Miss Earth នៅប្រទេស Philippine ក៏យើងធ្វើតាមចិត្តគាត់ដែរ។ យ៉ាងណា បើតាមលោក អ៊ិន សុភិន ថា បញ្ហានេះ លោកមិនទាន់អាចនិយាយអ្វីបានច្រើនឡើយនៅពេលនេះ ដោយសារលោកកំពុងជាប់រវល់ដឹកនាំបេក្ខភាពមកប្រកួតកម្មវិធី Miss Teen Universe 2022 នៅលើទឹកដីសហរដ្ឋអាមេរិក។
លោកថា ក្រុមហ៊ុនអាច ឬមិនអាច សម្រេចតាមការចង់បានពី ហង្ស សុរិយាន់ នាពេលនេះ គឺត្រូវរង់ចាំការវិលត្រឡប់របស់លោកជាមុនសិន ដើម្បីបានជួបពិភាក្សាការងារនេះដោយផ្ទាល់ជាមួយនាង ខណៈពេលលទ្ធផលយ៉ាងណាលោកប្រាប់បន្តនាពេលក្រោយ។
យ៉ាងណា ពាក់ព័ន្ធបញ្ហាខាងលើនេះ កោះសន្តិភាពនៅមិនទាន់អាចស្វែងរកការបកស្រាយពីកញ្ញា ហង្ស សុរិយាន់ បាននៅឡើយទេ គិតត្រឹមថ្ងៃទី១៤ ខែវិច្ឆិកា ឆ្នាំ២០២២ នេះ ក្នុងពេលដែលការសាកសួរមិនទាន់មានការឆ្លើយតប។
ជាការកត់សម្គាល់ ក្រោយបញ្ចប់បេសកកម្មនៃការប្រកួតប្រជែងដណ្តើមមកុដកម្មវិធី Miss Universe Cambodia 2022 បានបញ្ចប់ ដោយមិនបានជាប់អ្វីនោះកញ្ញា ហង្ស សុរិយាន់ ក៏បានបន្តមហិច្ឆតារបស់ខ្លួន ដោយបានចូលរួមប្រកួតកម្មវិធី Miss Grand Cambodia 2022 ដោយនាងទទួលបានចំណាត់ថ្នាក់លំដាប់រងទី១។
កញ្ញា ហង្ស សុរិយាន់ បានបោះជំហានលើវិស័យបវរកញ្ញានេះរយៈពេល៦ឆ្នាំមកហើយ ដោយនៅក្នុងឆ្នាំ២០១៧ កញ្ញាធ្លាប់ចូលរួមប្រកួត Cambodia’s Next Top Model ជាប់ចំណាត់ថ្នាក់លេខ៤ ហើយនៅក្នុងឆ្នាំ២០១៨ នាងចូលរួមប្រកួតក្នុងកម្មវិធី Miss global international នៅក្នុងប្រទេសហ្វីលីពីន ដោយជាប់ចំណាត់ថ្នាក់លេខ១១ និងនៅក្នុងឆ្នាំ២០២២ កញ្ញា ហង្ស សុរិយាន់ បានចូលរួមប្រកួត Miss Universe Cambodia 2022 ជាប់ចំណាត់ថ្នាក់លេខ៦។
គួររំលឹកថា ៖ តើមានរឿងអ្វី? ធ្វើស្រីស្អាត ហង្ស សុរិយាន់ បានប្រកាសលាលែងតំណែងបវរកញ្ញា ៕
ចែករំលែកព័តមាននេះ