រាជធានីភ្នំពេញ ៖ វិស័យសំណង់កម្ពុជា ក្នុងរយៈពេលប៉ុន្មានឆ្នាំនេះមានកំណើនជាបន្តបន្ទាប់ ហើយបើតាមប្រធានសមាគមអ្នកសាងសង់កម្ពុជា អ្នកឧកញ៉ា ពុង ឃាវសែ ឱ្យដឹងថា នៅឆ្នាំ២០១៤ ទុនក្នុងវិស័យសំណង់កម្ពុជា មាន
រាជធានីភ្នំពេញ ៖ វិស័យសំណង់កម្ពុជា ក្នុងរយៈពេលប៉ុន្មានឆ្នាំនេះមានកំណើនជាបន្តបន្ទាប់ ហើយបើតាមប្រធានសមាគមអ្នកសាងសង់កម្ពុជា អ្នកឧកញ៉ា ពុង ឃាវសែ ឱ្យដឹងថា នៅឆ្នាំ២០១៤ ទុនក្នុងវិស័យសំណង់កម្ពុជា មានប្រមាណ២.៥០៧លានដុល្លារអាមេរិក, ឆ្នាំ២០១៥ មានជាង៣.៣៣៨លានដុល្លារអាមេរិក, ឆ្នាំ២០១៦ ជាង៥.៥៧៩លានដុល្លារអាមេរិក ហើយក្នុងឆ្នាំ២០១៧នេះ អ្នកឧកញ៉ានៅតែមានជំនឿថា ទុនក្នុងវិស័យនេះនឹងមានកំណើនបន្តទៀត ។ អ្នកឧកញ៉ាមានប្រសាសន៍បែបនេះក្នុងកិច្ចសំណេះសំណាលជាមួយសមាជិកសមាគមអ្នកសាងសង់កម្ពុជា រៀបចំឡើងនៅសណ្ឋាគារហ៊ីម៉ាវ៉ារី ។
អ្នកឧកញ៉ាមានប្រសាសន៍បន្តថា ការអភិវឌ្ឍវិស័យអចលនទ្រព្យក្នុងប្រទេសកម្ពុជា រយៈពេលប៉ុន្មានឆ្នាំនេះបានកើនឡើងច្រើន ដោយសារតែកម្ពុជាមានស្ថិរភាពនយោបាយ និងសេដ្ឋកិច្ច ដែលញ៉ាំងឱ្យបរិយាកាសវិនិយោគ កាន់តែមានភាពទាក់ទាញទាំងវិនិយោគិនក្នុងស្រុក និងបរទេស ក្នុងនោះមានពីសិង្ហបុរី កូរ៉េខាងត្បូង តៃវ៉ាន់ ហុងកុង ចិន និងប្រទេសជាច្រើនទៀត ។
អ្នកឧកញ៉ាបន្ថែមថា ៖ « សព្វថ្ងៃនេះ វិស័យសំណង់ គឺជាសសរស្តម្ភទ្រទ្រង់សេដ្ឋកិច្ចដ៏សំខាន់ ក្រៅពីវិស័យកាត់ដេរ កសិកម្ម និងទេសចរណ៍ ហើយខ្ញុំជឿថា នៅឆ្នាំ២០១៧នេះ តួលេខកំណើននៃវិស័យសំណង់ក្នុងប្រទេសកម្ពុជា នឹងល្អប្រសើរជាងវិស័យផ្សេងៗទៀត ។ ជាក់ស្ដែង នាពេលបច្ចុប្បន្ន អគារខ្ពស់ៗ ជាពិសេស រាជធានីភ្នំពេញ បានកើតឡើងជាបន្តបន្ទាប់ ដែលធ្វើឱ្យមតិមួយចំនួនបង្ហាញពីក្តីបារម្ភទៅលើការផ្គត់ផ្គង់លើសតម្រូវការ ប៉ុន្តែយើងគ្មានការព្រួយបារម្ភទេ ពីព្រោះតម្រូវការនៅតែមានច្រើនដដែលនៅពេលនេះ » ។
អ្នកឧកញ៉ាបន្តទៀតថា ចិន គឺជាប្រភពទុនដ៏សំខាន់នៃការវិនិយោគវិស័យសំណង់នៅកម្ពុជា ហើយប្រទេសផ្សេងទៀតក៏ដូចគ្នាដែរ ក៏ព្រោះតែទំនាក់ទំនងរបស់កម្ពុជា និងប្រទេសទាំងនោះមានភាពស្អិតរមួតកាន់តែរឹងមាំ ទើបធ្វើឱ្យវិនិយោគិនពីបណ្ដាប្រទេសទាំងនោះមានទំនុកចិត្តមកបណ្ដាក់ទុននៅកម្ពុជា ។ ទោះជាយ៉ាងណា វិនិយោគិនខ្មែរក៏បានបណ្ដាក់ទុនវិនិយោគច្រើនដែរក្នុងវិស័យសំណង់ ។ ជាក់ស្ដែង ក្រុមហ៊ុន OCIC ក្នុងឆ្នាំថ្មីនេះ គ្រោងបន្ថែមថវិកាប្រមាណ២០០លានដុល្លារអាមេរិកទៀតទៅលើគម្រោងទីក្រុងរណបជ្រោយចង្វា ដោយវិនិយោគលើហេដ្ឋារចនាសម្ព័ន្ធ និងផ្សារទំនើប ដើម្បីប្រកួតប្រជែងជាមួយផ្សារទំនើបរបស់ជប៉ុននៅកម្ពុជា ។
ដោយឡែក លោកឧកញ៉ា សៀ ឫទ្ធី អ្នកអភិវឌ្ឍន៍វិស័យអចលនទ្រព្យដ៏ធំមួយនៅកម្ពុជា ក៏បានយល់ឃើញដែរថា បើទោះបីជាមានមតិមួយចំនួនយល់ឃើញថា វិស័យសំណង់ និងអចលនទ្រព្យមានបញ្ហា ប៉ុន្តែលោកមើលមិនឃើញថា វាមានបញ្ហាទេ ។ លោកឧកញ៉ាមើលឃើញថា វិស័យសំណង់នៅកម្ពុជានាពេលនេះ វាអាចនឹងដល់កំពូល ហើយបើសិនជាកម្ពុជារក្សាបាននូវកំណើនថេរបែបនេះ មិនយូរទេ កម្ពុជានឹងអាចរីកចម្រើនដូចបណ្ដាប្រទេសមួយចំនួនក្នុងតំបន់ដែរ ។
គួរបញ្ជាក់ថា តាមការព្យាកររបស់ធនាគារពិភពលោក ដែលបានចេញផ្សាយកាលពីពេលថ្មីៗនេះថា វិស័យសំណង់នៅកម្ពុជាក្នុងឆ្នាំ២០១៧ និង២០១៨ខាងមុខ នឹងល្អប្រសើរ ដែលនឹងជំរុញកំណើនសេដ្ឋកិច្ចរបស់កម្ពុជានៅតែខ្ពស់ស្ថិតនៅរង្វង់៧%ក្នុងមួយឆ្នាំ ៕
ចែករំលែកព័តមាននេះ