ខេត្តស្ទឹងត្រែង ៖ នគរបាលស្រុកសេសាន បានឃាត់ខ្លួនជនសង្ស័យម្នាក់ពីបទប៉ុនប៉ងចាប់រំលោភសេពសន្ថវៈលើកុមារីអាយុ៧ឆ្នាំ តែមិនបានសម្រេច ។ ហេតុការណ៍នេះបានកើតឡើងកាលពីវេលាម៉ោង៤រសៀល ថ្ងៃទី៧ មីនា ហើយជនសង្ស័យត្រូវកម្លាំងអធិការដ្ឋានស្រុកសេសាន ចាប់ឃាត់ខ្លួននៅម៉ោង៧យប់ក្នុងថ្ងៃដដែល លុះដល់វេលាម៉ោង៣រសៀល ថ្ងៃទី៨ មីនា ក៏បានបញ្ជូនមកកាន់ស្នងការដ្ឋាននគរបាលខេត្តដើម្បីចាត់ការបន្ត ។
ជនសង្ស័យដែលត្រូវសមត្ថកិច្ចចាប់ឃាត់ខ្លួនពីបទប៉ុនប៉ងចាប់រំលោភសេពសន្ថវៈនេះ ឈ្មោះបុត្រ ញ៉ុត អាយុ១៧ឆ្នាំ ជាកសិកររស់នៅក្នុងភូមិសេសាន ឃុំកំឆុន ស្រុកសេសាន រីឯក្មេងស្រីរងគ្រោះទើបមានអាយុ៧ឆ្នាំ ប៉ុណ្ណោះ ។
នៅមុខសមត្ថកិច្ចការិយាល័យប្រឆាំងការជួញដូរ និងការពារអនីតិជនឈ្មោះបុត្រ ញ៉ុត បានសារភាពថា នៅមុនពេលកើតហេតុខ្លួន និងមិត្តភក្តិ៤នាក់ទៀតបានទៅបេះផ្លែស្វាយក្បែរអូរខ្លីចំងាយពីភូមិជាង២០០ម៉ែត្រ ពេលនោះក្មេងស្រីរងគ្រោះក៏បានទៅជាមួយដែរ ។ ក្រោយពីបេះផ្លែស្វាយយកមកហូបហើយខ្លួនបានទៅលាងដៃនៅទឹកអូរតែពីរនាក់ក្មេងស្រី ឯមិត្តភក្តិរបស់ខ្លួននៅក្រោមដើមស្វាយ ដោយមិនបានដឹងថា រូបខ្លួនប៉ុនប៉ងចាប់រំលោភក្មេងស្រីនេះឡើយ។ ជននេះបានបន្តទៀតថា បន្ទាប់ពីល្បួងក្មេងស្រីរងគ្រោះទៅមាត់អូរហើយនោះខ្លួនបានចាប់រំលោភ តែមិនទាន់បានសម្រេចទេ ដោយសារឪពុកក្មេងស្រីរូបនោះមកទាន់ខ្លួនក៏បានលើកខោឡើងរត់គេចខ្លួនទៅផ្ទះ។ លុះដល់វេលាម៉ោង៧យប់ ខ្លួនត្រូវបាននគរបាលស្រុកចុះមកឃាត់ខ្លួនតាមបណ្តឹងរបស់ឪពុកក្មេងស្រីរងគ្រោះ។
លោកយ៉ន ឌីន ស្នងការរងទទួលបន្ទុកការិយាល័យនគរបាលកណ្តាលយុត្តិធម៌បានឱ្យដឹងថា ចំពោះនីតិវិធីរបស់យើងជាជំហានដំបូងគឺត្រូវឱ្យពេទ្យពិនិត្យធ្វើកោសល្យវិច័យទៅលើក្មេងស្រីរងគ្រោះ រួចហើយនឹងបញ្ជូនសំណុំរឿងនេះទៅស្ថាប័នតុលាការចាត់ការបន្ត ។ លោកម៉ុត អ៊ីត អាយុ៣៩ឆ្នាំ ជាកសិករ និងត្រូវជាឪពុកក្មេងស្រីរងគ្រោះបាននិយាយថា លោកចង់ឱ្យច្បាប់ដាក់ទោសជនសង្ស័យរូបនេះឱ្យស័ក្តិសមនឹងទង្វើលាមករបស់គេ និងទាមទារសំណងជំងឺចិត្តចំនួន៨លានរៀល ព្រោះគេបានប្រព្រឹត្តអំពើមិនល្អលើកូនស្រីរបស់លោកដែល ទើបមានអាយុ៧ឆ្នាំ ៕
ចែករំលែកព័តមាននេះ