អាមេរិក ៖ តាមប្រភពពី Metro ឱ្យដឹងថា ប្រធានាធិបតីអាមេរិក លោកដូណាល់ ត្រាំ (Donald Trump) មានអារម្មណ៍នឹកការបើករថយន្តទំនើបដោយខ្លួនឯង ។ ហើយលោកធ្លាប់តែគិតថា ជីវិតជាប្រធានាធិបតីអាមេរិក មានភាពងាយស្រួលជាង ជីវិតជាអ្នកជំនួញ ប៉ុន្តែអ្វីៗបែរជាមិនដូចការគិតរបស់លោកទៅវិញ ។
នៅពេលសម្ភាសន៍ជាមួយអ្នកព័ត៌មាន Reuters បាននិយាយពីចំណាប់អារម្មណ៍ការកាន់តំណែងបាន១០០ថ្ងៃ ប្រធានាធិបតី Trump បានមានប្រសាសន៍ថា «ខ្ញុំស្រឡាញ់ចូលចិត្តជីវិតខ្ញុំពីមុន ។ ឥលូវនេះ ខ្ញុំមានការងារជាច្រើនត្រូវធ្វើ មិនដូចកាលពីមុនឡើយ ។ ខ្ញុំធ្លាប់តែគិតថា វាមានភាពងាយស្រួលជាងកាលពីមុន» ។
គួរបញ្ជាក់ថា លោកត្រាំ (Trump) បានឡើងកាន់តំណែងបានជាង៥ខែមកហើយ បន្ទាប់ពីយកឈ្នះលើលោកស្រីហ៊ីលឡារី Hillary Clinton ។
លោកបន្តថា «អ្នកពិតជាត្រូវនៅក្នុងស្រោមបិទជិត ព្រោះអ្នកមានការពាររហូតដល់ថ្នាក់ទៅណាមិនកើត ។ ខ្ញុំចូលចិត្តបើករថយន្តតែពេលនេះ ខ្ញុំមិនអាចបើកដោយខ្លួនឯងបានទៀត» ។ ជាមួយគ្នានេះដែរ លោកបានបង្ហើបថា លោកជានិច្ចជាកាល តែងតែងាកទៅរកមិត្តភក្តិ និងមិត្តរួមជំនួញរបស់លោក សម្រាប់ការសុំជាមតិយោបល់ ។
ចែករំលែកព័តមាននេះ