កំពុងភ្ជូរដីស្រាប់តែមានអាវុធយុទ្ធភ័ណផុសឡើងយ៉ាងច្រើន
ខេត្តកំពងស្ពឺ ៖ អាវុធយុទ្ឋភ័ណដែលសល់ពីសម័យសង្គ្រាមត្រូវបានប្រជាពលរដ្ឋភ្ជួរដីប្រទះឃើញជាច្រើនប្រភេទ
ខេត្តកំពងស្ពឺ ៖ អាវុធយុទ្ធភ័ណដែលសល់ពីសម័យសង្គ្រាមត្រូវបានប្រជាពលរដ្ឋភ្ជួរដីប្រទះឃើញជាច្រើនប្រភេទហើយក៏បានរាយការណ៍ជូនអាជ្ញាធរយកទៅរក្សាទុកដើម្បីប្រគល់ឱ្យជំនាញស៊ីម៉ាកគ្រប់គ្រង ។ ការប្រទះឃើញនេះកើតឡើងកាលពីល្ងាច ថ្ងៃទី២៩ ខែមេសា ឆ្នាំ២០១៧ នៅចំណុចក្នុងទំនប់អូរតាអាំ ភូមិត្រពាំងខ្លុង ឃុំដំបូករូង ស្រុកភ្នំស្រួច ខេត្តកំពង់ស្ពឺ ។ អ្នកដែលប្រទះឃើញមានឈ្មោះ ស៊ីម គា ភេទប្រុស អាយុ៣៣ឆ្នាំ នៅភូមិមានជ័យ ឃុំដំបូករូង ស្រុកភ្នំស្រួច ខេត្តកំពង់ស្ពឺ ។
ប្រភពពីសមត្ថកិច្ចស្រុកភ្នំស្រួចបានឱ្យដឹងថា ប្រជាពលរដ្ឋខាងលើបានបើកត្រាក់ទ័រភ្ជួរដីក្នុងគោលបំណងធ្វើចំការពេលដែលកំពុងភ្ជួរស្រាប់តែ ឃើញសព្វាវុធទាំងនោះបណ្តាលឱ្យរបើកចេញពីក្នុងដីមកជាច្រើនប្រភេទ ។ ក្រោយប្រទះឃើញបុរសខាងលើបានរាយការណ៍មកអាជ្ញាធរឱ្យចុះមកយកទៅរក្សាទុកនៅកន្លែងមានសុវត្ថិភាព ។
ប្រភពបន្តថា គ្រឿងសព្វាវុធទាំងនោះរួមមានអាវុធ គ្រាប់ វិទ្យុចាស់ៗមួយចំនួនដូចជា អាវុធOPINO ចំនួន២ដើម គ្រាប់២៥៣ គ្រាប់ អាវុធ 12.7 mm ១ដើម អាវុធ B41 ៣ដើម អាវុធ B40 ២ដើម អាវុធ CKC ១ដើម អាវុធ M16 ១ដើម វិទ្យុទាក់ទង T25 ១គ្រឿង ក្រោយចុះទៅដល់កន្លែងដែលប្រទះឃើញសមត្ថកិច្ចបាននាំយកគ្រឿងសព្វាវុធទាំងនោះទៅរក្សាទុកដើម្បីរង់ចាំទាក់ទងទៅជំនាញស៊ីម៉ាកឱ្យមកទទួលយកទៅគ្រងគ្រងបន្ត ។
លោក វ៉ី សំណាង អភិបាលខេត្តកំពង់ស្ពឺក៏បានផ្តាំផ្ញើដល់បងប្អូនប្រជាពលរដ្ឋទូទាំងខេត្តផងដែរប្រសិនបើប្រទះឃើញគ្រឿងអាវុធ និងយុទ្ឋភ័ណមិនទាន់ផ្ទុះដូចបុរសខាងលើសូមប្រញាប់រាយការមកសមត្ថកិច្ចមូលដ្ឋានជាបន្ទាន់ដើម្បីឱ្យសមត្ថកិច្ចយើងចុះទៅប្រមូលយកមករក្សាទុកប្រគល់ឱ្យជំនាញគ្រប់គ្រងប្រយោជន៍ការពារក្រែងកើតហេតុអាក្រក់ណាមួយពីគ្រឿងផ្ទុះទាំងនោះ ៕
ចែករំលែកព័តមាននេះ