យោងតាម YONHAP ថា កូរ៉េខាងត្បូង និងសហរដ្ឋអាមេរិកបានបញ្ចប់នាថ្ងៃទី៣០ មេសា សមយុទ្ធយោធារួមរយៈពេល២ខែក្នុងស្ថានភាពតានតឹងបំផុតនៅឧបទ្វីបកូរ៉េ ។
អ្នកទទួលខុសត្រូវយោធាកូរ៉េខាងត្បូងម្នាក់ថ្លែងថា សមយុទ្ធ FOAL EAGLES បានបញ្ចប់នាថ្ងៃទី៣០ មេសា ដូចការគ្រោងទុក ។ ទាហានអាមេរិកជាង១០.០០០នាក់ ក្នុងនោះមួយចំនួនមកពីបរទេសបានចូលរួមក្នុងសមយុទ្ធយោធា FOAL EAGLE ដែលចាប់ផ្តើមពីដើមខែមីនាមក ។ ចំណែកទាហានកូរ៉េខាងត្បូងជាច្រើនរយពាន់នាក់ក៏ចូលរួមដែរ ។ ប្រភពនេះបន្តថា កងទាហានមកពីបរទេសវិលត្រឡប់ទៅកាន់មូលដ្ឋានពួកគេវិញនាពេលឆាប់ៗ ។ គ្រឿងសព្វាវុធយុទ្ធសាស្ត្រអាមេរិកជាច្រើនបង្ហាញពេលសមយុទ្ធដូចជានាវាផ្ទុកយន្តហោះនុយក្លេអ៊ែរ USS CARL VINSON បណ្តាយន្តហោះប្រដេញបំបាំងកាយ F-35 និងយន្តហោះទម្លាក់គ្រាប់បែកយុទ្ធសាស្ត្រ B-1B ជាដើម ។
សមយុទ្ធប្រព្រឹត្តទៅពេលមានភាពតានតឹងខ្លាំងបំផុតរកកលផ្ទុះសង្គ្រាមនុយក្លេអ៊ែរ ខណៈ កូរ៉េខាងជើងគំរាមកម្ទេចសហរដ្ឋអាមេរិក និងបណ្តាសម្ព័ន្ធមិត្ត ហើយធ្វើការបាញ់សាកល្បងមីស៊ីលបាលីស្ទិកជាច្រើនលើកអំឡុងពេលនៃសមយុទ្ធយោធារួមនេះ ។
កងនាវាចម្បាំងអាមេរិកនាំមុខ ដោយនាវាផ្ទុកយន្តហោះ USS CARL VINSON ដែលមកដល់ដែនទឹកឧបទ្វីបកូរ៉េ មុននេះចាប់ផ្តើមធ្វើសមយុទ្ធជើងទឹកមួយជាមួយកងម៉ារីនកូរ៉េខាងត្បូង ។
សមយុទ្ធរួមនេះធ្វើឡើងប៉ុន្មានម៉ោងប៉ុណ្ណោះ ក្រោយការបាញ់មីស៊ីលរបស់កូរ៉េខាងជើងចុងក្រោយមួយ ។ សមយុទ្ធជើងទឹកមានរយៈច្រើនថ្ងៃនេះ ខាងកូរ៉េខាងត្បូងចូលរួមដោយនាវាពិឃាតប្រភេទ AEGIS ២គ្រឿង ៕
ចែករំលែកព័តមាននេះ