រាជធានីភ្នំពេញ ៖ លោកជំទាវទី១ Kim Keon-hee ទទួលបានការចាប់អារម្មណ៍យ៉ាងខ្លាំងពីសំណាក់ប្រជាពលរដ្ឋខ្មែរ ដោយសារតែទឹកចិត្តដ៏សប្បុរសរបស់លោកជំទាវ ដែលបានសួរសុខទុក្ខផ្ទាល់ និងជួយព្យាបាលកុមារកម្ពុជាម្នាក់ ដែលមានជំងឺបេះដូងប្រហោង អោយបានជាពីជំងឺ ។
អំឡុងពេល លោកប្រធានាធិបតីកូរ៉េខាងត្បូង Yoon Suk-yeol អញ្ជើញមកចូលរួមកិច្ចប្រជុំកំពូលអាស៊ាន នៅទីក្រុងភ្នំពេញ លោកជំទាវទី១ Kim Keon-hee កាលពីថ្ងៃទី១២ ខែវិច្ឆិកា ឆ្នាំ២០២២ បានចុះសួរសុខទុក្ខផ្ទាល់ដល់គ្រួសារខ្មែរមួយ ដែលកូនមានជំងឺបេះដូងពីកំណើត លោកជំទាវ បានថ្លែងលើកទឹកចិត្ត ហើយថា នឹងជួយព្យាបាលក្មេងប្រុសវ័យ១៤ឆ្នាំ រូបនេះរហូតដល់ជាសះស្បើយ ។
បើយោងតាមទីភ្នាក់ងារសារព័ត៌មាន យ៉ុនហាប់ បានរាយការណ៍ថា ជំទាវទី១ Kim Keon-hee បានទៅលេងដល់ផ្ទះកុមារកម្ពុជា ដែលមានជំងឺបេះដូង កាលពីថ្ងៃសៅរ៍ និងបានសួរសុខទុក្ខ ហើយលួងលោមលើកទឹកចិត្តគ្រួសារ ដោយជំរុញពួកគេកុំឲ្យចុះចាញ់ ទោះកាលៈទេសៈណាក៏ដោយ ។
ក្មេងប្រុស អាយុ១៤ឆ្នាំ មានជំងឺបេះដូងពីកំណើត ធ្លាប់បានទៅមជ្ឈមណ្ឌលវេជ្ជសាស្ត្រ Hebron ក្នុងទីក្រុងភ្នំពេញ ដែលបង្កើតឡើងក្នុងឆ្នាំ ២០០៧ ដោយក្រុមគ្រូពេទ្យកុមារកូរ៉េខាងត្បូង ។
ទោះជាយ៉ាងនេះក្តី ក្មេងប្រុសនោះ ដោយសារតែមិនសូវស្រួលខ្លួន ទើបលោកជំទាវ១ បានសម្រេចចិត្តទៅលេងដល់ផ្ទះរបស់ក្មេងប្រុសនោះជំនួសវិញ ។
លោកជំទាវទី១ បានប្រាប់ក្មេងប្រុសដែលមានជំងឺបេះដូង ថា “អ្នកអាចប្រយុទ្ធនឹងវាបានទេ ? ឆាប់ជាសះស្បើយ ។ តោះ! ជួបគ្នានៅកូរ៉េខាងត្បូង” ។
ថ្លែងលើកទឹកចិត្តទៅកាន់គ្រួសារខ្មែរមួយនេះ លោកជំទាវទី១ បាននិយាយទៀតថា “ពិតជាមានក្តីសង្ឃឹម! សូមកុំបោះបង់ ទោះក្នុងកាលៈទេសៈណាក៏ដោយ ត្រូវបន្តទៅមុខទៀត” ។
សូមជម្រាបថា ឪពុករបស់ក្មេងរូបនេះ បានស្លា.ប់មុនពេលកូនប្រុសកើត ហើយម្តាយ និងបងប្រុសរបស់គាត់ មានបញ្ហាសុខភាពទៀត ។ គ្រួសារមួយនេះ ត្រូវរស់ពឹងផ្អែកលើបងថ្លៃស្រី ដែលមានការងារជាអ្នកសម្អាត ។
លោកជំទាវទី១ Kim Keon-hee បានមកដល់ប្រទេសកម្ពុជា កាលពីថ្ងៃសុក្រ រួមជាមួយនឹងស្វាមី គឺលោកប្រធានាធិបតីកូរ៉េខាងត្បូង Yoon Suk-yeol ដើម្បីចូលរួមកិច្ចប្រជុំកំពូលអាស៊ាន លើកទី៤០និងលើកទី៤១ ដែលកម្ពុជាធ្វើជាម្ចាស់ផ្ទះ ។
តើជំទាវទី១ របស់កូរ៉េខាងត្បូង ជានរណា ? កោះសន្តិភាពសូមធ្វើការលើយកប្រវត្តិសង្ខេបខ្លះៗរបស់លោកជំទាវដូចតទៅ ៖
លោកជំទាវ Kim Keon-hee កើតនៅថ្ងៃទី២ ខែកញ្ញា ឆ្នាំ១៩៧២ ក្នុងតំបន់ Yangpyeong នៃខេត្ត Gyeonggi របស់កូរ៉េខាងត្បូង។ គាត់បានសិក្សានៅវិទ្យាល័យ Myungil សម្រាប់ក្មេងស្រី មុនពេលបញ្ចប់ការសិក្សាផ្នែកសិល្បៈពីសកលវិទ្យាល័យ Kyonggi។
នៅក្នុងឆ្នាំ២០០៩ គាត់បានបង្កើតក្រុមហ៊ុនពិព័រណ៍សិល្បៈ Covana Contents និងបានធ្វើជានាយកប្រតិបត្តិ និងប្រធានក្រុមហ៊ុនចាប់តាំងពីពេលនោះមក។
នៅក្នុងឆ្នាំ២០១២ គាត់បានរៀបការជាមួយនឹងលោក Yoon Suk-yeol ដែលជារដ្ឋអាជ្ញាកូរ៉េខាងត្បូងនៅពេលនោះ។ លោកស្រីបានក្លាយទៅជាស្ត្រីទីមួយរបស់កូរ៉េខាងត្បូង បន្ទាប់ពីស្វាមីបានឈ្នះការបោះឆ្នោតប្រធានាធិបតីនៅខែមីនា ឆ្នាំ២០២២។
នៅក្នុងឆ្នាំ២០១៩ ប្រព័ន្ធផ្សព្វផ្សាយបានរាយការណ៍ថា លោកស្រីមិនបានបង់ពន្ធ និងរងការស៊ើបអង្កេតពីបទទទួលយកប្រាក់លើកទឹកចិត្តសម្រាប់ការរៀបចំពិព័រណ៍សិល្បៈ។
នៅឆ្នាំ២០២១ មានសេចក្តីរាយការណ៍ថា លោកស្រី Kim Keon-hee បានបំប៉ោងប្រវត្តិរបស់គាត់ដោយភ្ជាប់ទៅនឹងសាលាធុរៈកិច្ចនៃសកលវិទ្យាល័យ New York។ នៅក្នុងសន្និសិទសារព័ត៌មាន គាត់បានធ្វើការសុំទោសជាសាធារណៈ និងបានសន្យាថានឹងផ្តោតតែលើនាទីក្នុងនាមជាភរិយារបស់លោក Yoon Suk-yeol។
នៅបំណាច់ឆ្នាំ ២០២១ រដ្ឋអាជ្ញាបានប្រកាសថាពួកគេនឹងចាប់ផ្តើមធ្វើការស៊ើបអង្កេតប្រឆាំងនឹងលោកស្រី Kim Keon-hee ពីបទពុករលួយទាក់ទងនឹងឧបាយកលទីផ្សារភាគហ៊ុន៕
ចែករំលែកព័តមាននេះ