យោងតាម YONHAP ថា គណៈកម្មាធិការប្រមុខនាយសេនាធិការកងទ័ពកូរ៉េខាងត្បូងនិយាយថា កូរ៉េខាងជើងកាលពីថ្ងៃទី២៩ មេសា បានបាញ់មីស៊ីលបាលីស្ទិកមួយទៀតចេញពីខេត្ត PYONGAN ខាងត្បូង ក៏ប៉ុន្តែវាបានផ្ទុះប៉ុន្មាននាទីក្រោយការបាញ់ចេញ ។
ការបាញ់មីស៊ីលថ្មីនេះប្រហែលជាការតបតចំពោះការអំពាវនាវជាមហាឡារិករបស់សហរដ្ឋអាមេរិកនៅ អ.ស.ប ប្រឆាំងការគំរាមកំហែងនុយក្លេអ៊ែររបស់ក្រុងព្យុងយ៉ាង ។ នេះជាការធ្លាក់ចុះដុនដាបថ្មីនៃទំនាក់ទំនងរវាងក្រុងវ៉ាស៊ីនតោន និងក្រុងព្យុងយ៉ាង ។ ប៉ុន្មានម៉ោងក្រោយកិច្ចប្រជុំពិសេសរបស់ក្រុមប្រឹក្សាសន្តិសុខ អ.ស.ប ក្រសួងការពារប្រទេសកូរ៉េខាងត្បូងប្រកាសនាថ្ងៃទី២៩ មេសា ថា កូរ៉េខាងជើងបានបាញ់មីស៊ីលបាលីស្ទិកពុំដឹងពីប្រភេទអ្វី ។ ក្រសួងនេះបញ្ជាក់ថា យើងសង្ស័យដែលការសាកល្បងនេះទទួលបរាជ័យ ។ មីស៊ីលបានហោះប៉ុន្មាននាទីឆ្ពោះទៅទិសឦសានក្នុងកម្ពស់ត្រឹម៧១គីឡូម៉ែត្រ ។ ទីបញ្ជាការដ្ឋានកងទ័ពអាមេរិកសម្រាប់តំបន់ប៉ាស៊ីហ្វិក PACOM អះអាងថា មីស៊ីលនេះពុំរត់ហួសពីដែនដីកូរ៉េខាងជើងឡើយ ។
តាម TWITTER ដូចតាមទម្លាប់ប្រធានាធិបតីអាមេរិកលោកដូណាល់ ត្រាំ បានចោទប្រកាន់ក្រុងព្យុងយ៉ាងភ្លាមៗថា «ខ្វះការគោរព» ចំពោះចិនជាសម្ព័ន្ធមិត្តសំខាន់របស់ខ្លួន ។
ពេលមានការបាញ់មីស៊ីលនេះ រដ្ឋមន្ត្រីការបរទេសអាមេរិក លោក REX TILLERSON ដែលដឹកនាំកិច្ចប្រជុំក្រុមប្រឹក្សាសន្តិសុខ អ.ស.ប ទើបចាកចេញពីក្រុងញូវយ៉កនាយប់ថ្ងៃទី២៨ មេសា ក្រោយពីលោកស្នើដល់បណ្តាដៃគូឱ្យប្រឆាំងការគំរាមកំហែងនុយក្លេអ៊ែររបស់កូរ៉េខាងជើង ដែលអាចញ៉ាំងឱ្យមានផលវិបាកប្រកបដោយគ្រោះមហន្តរាយនានា ។ លោកជំរុញជាពិសេសដល់ចិនឱ្យគាបសង្កត់លើក្រុងព្យុងយ៉ាងតាមរយៈការដាក់ឱ្យនៅឯកោខាងសេដ្ឋកិច្ច និងការទូត ។
ប្រភពរដ្ឋាភិបាលអាមេរិកនិយាយថា មីស៊ីលបាលីស្ទិកកូរ៉េខាងជើងនេះដែលផ្ទុះក្រោយការបាញ់ចេញជាមីស៊ីលធុន SCUD KN-17 អាចបាញ់បានចម្ងាយមធ្យម ។ ប្រភពនេះបញ្ជាក់ថា មីស៊ីលបានផ្ទុះពេលកំពុងហោះហើរ២នាទីក្រោយការបាញ់ចេញ ហើយបំណែករបស់វាធ្លាក់ក្នុងសមុទ្រខាងកើត ។ ពួកអ្នកជំនាញការអាមេរិកក៏វាយតម្លៃដែរថា មីស៊ីលបាញ់សាកកាលពីថ្ងៃទី១៦ មេសា ជាមីស៊ីលធុនដូចគ្នានេះដែលមានឈ្មោះថា DONGFENG-21 អាចបាញ់បានចម្ងាយពី៩០០ទៅ១.៥០០គីឡូម៉ែត្រ ដែលមីស៊ីលនេះមានរហស្សនាមថា «អ្នកពិឃាតនាវាផ្ទុកយន្តហោះ» ។
នេះជាការសាកល្បងមីស៊ីលបាលីស្ទិកលើកទី៣ នាខែមេសា បន្ទាប់ពីការបាញ់មីស៊ីលនាថ្ងៃទី៥ និង១៦ មេសា ។ ការបាញ់មីស៊ីលថ្មីនេះកើតមាន៤ថ្ងៃក្រោយពីក្រុងព្យុងយ៉ាងធ្វើសមយុទ្ធទ្រង់ទ្រាយធំពុំធ្លាប់មានពីមុនមក នាឱកាសខួបលើកទី៨៥នៃថ្ងៃបង្កើតកងទ័ពប្រជាជនកូរ៉េ ៕
ចែករំលែកព័តមាននេះ