រាជធានីភ្នំពេញ៖ បុរសជាជនជាតិវៀតណាមម្នាក់ត្រូវបានប្រជាពលរដ្ឋប្រទះឃើញអណ្តែតនៅក្នុងលូទឹកស្អុយ បន្ទាប់ពីបាត់ខ្លួនអស់៧ថ្ងៃ ហេតុការណ៍បង្កឱ្យមានការភ្ញាក់ផ្អើលកាលពីវេលាម៉ោង៩និង៣០នាទីព្រឹក ថ្ងៃទី២៩ ខែមេសា ឆ្នាំ២០១៧ នៅចំណុចក្នុងបុរីមហាសេដ្ឋី តាមបណ្តោយផ្លូវរថភ្លើង ក្រុម១២ ភូមិសាមគ្គី សង្កាត់ឫស្សីកែវ ខណ្ឌឫស្សីកែវ ។
សពបុរសរូបនោះឈ្មោះ ប៉ែង ដាំង ភេទប្រុស អាយុ៣២ឆ្នាំ ជាជនជាតិវៀតណាម ជាមនុស្សសរសៃប្រសាទ ស្នាក់នៅផ្ទះលេខ៤១ ផ្លូវបេតុង ក្រុម៤ ភូមិសាមគ្គី សង្កាត់ឫស្សីកែវ ខណ្ឌឫស្សីកែវ។
បើតាមព័ត៌មានពីក្រុមគ្រួសារសពបានឲ្យដឹងថា បុរសរូបនោះជាមនុស្សមានជំងឺសរសៃប្រសាទ ហើយចេះតែដើរផឹកបាត់ពីផ្ទះ ។ ហើយនៅវេលាម៉ោងប្រមាណ២រសៀល ថ្ងៃទី២១ មេសា បុរសរូបនោះបានបាត់ខ្លួនពីផ្ទះមិនដឹងទៅទីណា។ បន្ទាប់ពីបាត់ខ្លួនក្រុមគ្រួសារបាននាំគ្នាដើររកគ្រប់ច្រកល្ហកមិនឃើញ។ លុះនៅព្រឹកថ្ងៃទី២៩ មេសានេះ វេលាម៉ោង៩និង៣០នាទីព្រឹក អាជ្ញាធរសង្កាត់ឫស្សីកែវ និងកម្លាំងប្រជាការពារបានចុះស្តារលូស្ទះនៅក្នុងមូលដ្ឋាន ក៏ប្រទះឃើញសាកសពជនជាតិវៀតណាមរូបនោះតែម្តង។
នៅព្រឹកនោះនគរបាលជំនាញបានចុះទៅពិនិត្យសពពុំមានស្លាកស្នាមអ្វីឡើយ ។ សពត្រូវបាននគរបាលឱ្យដឹងថា ស្លាប់ដោយសារតែលង់ទឹក បន្ទាប់មកសពត្រូវបានក្រុមគ្រួសារនាំយកទៅធ្វើបុណ្យតាមប្រពៃណីនៅវត្តទួលសង្កែ ក្នុងសង្កាត់ទួលសង្កែ ៕
ចែករំលែកព័តមាននេះ