រាជធានីភ្នំពេញ ៖ សមាជិកថ្មីរបស់គណបក្សប្រជាជនកម្ពុជា និងបងប្អូនជាអតីតសមាជិក សមាជិកា គណបក្សសង្គ្រោះជាតិ ដែលបានបោះបង់ចោលគណបក្សរបស់ខ្លួនទៅរួមរស់ក្នុងជីវភាពនយោបាយរបស់គណបក្សប្រជាជនកម្ពុជាសរុប១៦៣នាក់ ត្រូវបានប្រកាសទទួលស្គាល់យ៉ាងឧឡារឹក នាព្រឹកថ្ងៃទី៣០ ខែមេសា ឆ្នាំ២០១៧ ក្នុងសង្កាត់សាក់សំពៅ ខណ្ឌដង្កោ។
ក្នុងពិធីប្រកាសទទួលស្គាល់សមាជិកថ្មី និងសំណេះសំណាលជាមួយសមាជិកបក្សថ្មីនោះ លោក ប៊ុន សេរី ប្រធានក្រុមការងារចុះជួយសង្កាត់សាក់សំពៅ និងសហការី បានថ្លែងស្វាគមន៍ និងអបអរសាទរយ៉ាងកក់ក្តៅចំពោះបងប្អូនយើងដែលបានសំរេចចិត្តដ៏ត្រឹមត្រូវក្នុងការរួមរស់ក្នុងជីវភាពនយោបាយជាមួយគណបក្សប្រជាជនកម្ពុជា ដែលជាស្នូលនៃការពង្រឹងខឿនសន្តិភាព និងការអភិវឌ្ឍន៍។ លោកបន្តថា ការសំរេចចិត្តចូលជាសមាជិក គណបក្សប្រជាជនកម្ពុជាដោយស្ម័គ្រចិត្តរបស់បងប្អូន គឺធ្វើឡើងប្រកបដោយសុភវិនិច្ឆយ័ និងមានទំនុកចិត្ត ហើយការសំរេចជ្រើសរើសយកគណបក្សប្រជាជនកម្ពុជា គឺមានន័យថា បងប្អូនមិនអាចប្រគល់វាសនាខ្លួន ឬកូនចៅខ្លួនទៅលើគណបក្សណា ឬមេបក្សណាមួយដែល មិនមានភាពច្បាស់លាស់ មិនបានយល់ពីការលំបាករបស់ប្រជាពលរដ្ឋនោះដោយប្រថុយប្រថានបានឡើយ ការសំរេចចិត្តនេះស្មើនឹងការទទួលបានការរីកចំរើន និងអភិវឌ្ឍន៍គណបក្សប្រជាជនកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខមិនដែលរត់ចោលប្រជាពលរដ្ឋម្តងណាឡើយ ផ្ទុយទៅវិញសម្តេចរួមនឹងថ្នាក់ដឹកនាំគណបក្សប្រជាជនកម្ពុជាដទៃទៀត បានយកជីវិតធ្វើដើមទុនប្តូរយកសន្តិភាពពេញលេញទូទាំងប្រទេស ដោយសារសន្តិភាពនេះហើយបានធ្វើឲ្យប្រជាពលរដ្ឋយើងកំពុងរស់នៅដោយសុខសប្បាយប្រកបរបររកស៊ីបានងាយស្រួល ដែលយើងទាំងអស់គ្នាត្រូវតែថែរក្សាសន្តិភាពដែលយើងទទួលបានយ៉ាងលំបាកនេះ ឲ្យបានស្ថិតស្ថេរគង់វង់ មិនអាចឲ្យក្រុម ឬជនណាបំផ្លាញបានឡើយ រួមទាំងការថែរក្សាសន្តិសុខ សណ្តាប់ធ្នាប់សាធារណៈក្នុងមូលដ្ឋានយើងផងដែរ ។
លោក ប៊ុន សេរី មានប្រសាសន៍ទៀតថា នៅថ្ងៃទី៤ មិថុនា ២០១៧ ជាថ្ងៃបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ នឹងដំណើរការ ហើយចាប់ពីថ្ងៃទី២០ ឧសភា ដល់ថ្ងៃទី២ មិថុនាខាងមុខ ជារយៈពេលនៃការឃោសនាបោះឆ្នោត ។ ពេលនោះនឹងមានគណបក្សនយោបាយច្រើនមកឃោសនារកសំឡេងឆ្នោត តែទោះបីយ៉ាងណាប្រជាពលរដ្ឋជាអ្នកវិនិច្ឆយ័ និងធ្វើការជ្រើសរើសយកក្រុមប្រឹក្សាសង្កាត់ដែលចេះស្រឡាញ់ប្រជាពលរដ្ឋ ដឹងសុខទុក្ខប្រជាពលរដ្ឋ ពិសេសមេដឹកនាំមូលដ្ឋានដែលជាមនុស្សអ្នកធ្វើ,អ្នកអភិវឌ្ឍន៍ពិតប្រាកដមិន មែនសន្យាបែបពពុះសាប៊ូនោះទេ ៕
ចែករំលែកព័តមាននេះ