ទីក្រុងហុងកុង ៖ ហុងកុងទំនងជាវ៉ាដាច់ទីក្រុងញូវយ៉ក ដោយក្លាយជាទិសដៅកំពូលសម្រាប់វិនិយោគអចលនទ្រព្យពីចិនដីគោកនៅឆ្នាំនេះ ដែលមានប្រតិបតិ្តការកម្រិតខ្ពស់ក្នុងត្រីមាសទី១ ។ នេះបើតាមក្រុមហ៊ុន Colliers International ។
ក្រុមហ៊ុនសេវាកម្មអចលនទ្រព្យឱ្យដឹងថា ប្រតិបត្តិការវិនិយោគសរុបលើវិស័យអចលនទ្រព្យនៅហុងកុង ក្នុងរយៈពេល៣ខែដំបូងឆ្នាំ២០១៧ បានកើនឡើង២១៣% ស្មើនឹង៣៦,១ប៊ីលានដុល្លារហុងកុង បើធៀបនឹងរយៈពេលដូចគ្នាឆ្នាំមុន ។
កាលពីឆ្នាំមុន ការវិនិយោគលើអចលនទ្រព្យរបស់ចិននៅទីក្រុងហុងកុង មានចំនួនសរុបជាង៤១,២ប៊ីលានដុល្លារហុងកុង នៅពីក្រោយទីក្រុងញូវយ៉កក្នុងចំនួន៤៤,៤ប៊ីលានដុល្លារហុងកុង ។ នេះបើតាមទិន្នន័យរបស់ក្រុមហ៊ុន Real Capital Analytics ដកស្រង់ដោយក្រុមហ៊ុន Colliers ។
លោក Antonio Wu នាយករងគ្រប់គ្រងផ្នែកទីផ្សារមូលធន និងសេវាកម្មវិនិយោគនៅក្រុមហ៊ុន Colliers ថ្លែងថា ៖ « ហុងកុងអាចជំនួសតំណែងទីក្រុងញូវយ៉ក ដោយក្លាយជាទីក្រុងពេញនិយមបំផុតសម្រាប់ការវិនិយោគផ្នែកអចលនទ្រព្យរបស់ចិននៅឆ្នាំ២០១៧ » ។
លោក Wu បន្ថែមថា រដ្ឋបាលលោក Trump នឹងប្រុងប្រយ័ត្នបន្ថែមទៀតក្នុងការអនុម័តការវិនិយោគបរទេសចូលសហរដ្ឋអាមេរិក ដែលវានឹងផ្តល់ប្រយោជន៍ដល់ទីក្រុងហុងកុង ។
ក្រុមហ៊ុន Colliers ឲ្យដឹងថា ទីក្រុងស៊ីដនី និងទីក្រុងឡុងដ៍បានជាប់ចំណាត់ថ្នាក់ទី៣ និងទី៤ ជាទិសដៅដ៏ពេញនិយមបំផុតសម្រាប់ការវិនិយោគអចលនទ្រព្យពីជនជាតិចិននៅឆ្នាំ២០១៦ ។
ការវិនិយោគក្នុងទីក្រុងស៊ីដនីកើនឡើងដល់២៨,៣ប៊ីលានដុល្លារហុងកុងពីប្រទេសចិននៅឆ្នាំមុន ខណៈការវិនិយោគរបស់ចិនក្នុងទីក្រុងឡុងដ៍ធ្លាក់ចុះដល់១៣,៧ប៊ីលានដុល្លារហុងកុង ។
លោក Wu និយាយថា ការចាកចេញរបស់អង់គ្លេសពីសហភាពអឺរ៉ុប បានបង្វែរការវិនិយោគរបស់ចិនចេញពីអង់គ្លេស ហើយមូលធនមួយចំនួនបានហូរចូលទៅកាន់ទីក្រុងហុងកុង ។
លោកនិយាយថា អគារការិយាល័យ គឺជាគោលដៅពេញនិយមក្នុងចំណោមវិនិយោគិនចិនដីគោក ។ ពួកគេជឿថា ការទិញអគារ និងការជួលការិយាល័យនឹងកើនឡើងនាពេលអនាគត ។
ប៉ុន្តែលោក Wu មិនបានឆ្លើយតបនឹងសំណួរថា តើវិនិយោគចិនដីគោកត្រូវទទួលខុសត្រូវចំពោះការបំប៉ោងតម្លៃអចលនទ្រព្យឬយ៉ាងណា។ លោកទទួលស្គាល់ថា វិនិយោគិនចិនទាំងនោះហាក់ឆេវឆាវ ហើយហ៊ានបោះបង់ប្រាក់ចំណេញដើម្បីឱ្យមានការទទួលស្គាល់ពីចំណោមគូប្រជែងក្នុងស្រុក ។ ប្រសិនបើរដ្ឋាភិបាលអាចបង្កើនការផ្គត់ផ្គង់ដីធ្លី តម្លៃនឹងមានស្ថិរភាព ។
ក្រុមហ៊ុន Colliers ព្យាករថា តម្លៃអចលនទ្រព្យសម្រាប់រស់នៅនឹងកើនឡើង៨%នៅឆ្នាំនេះ ហើយតម្លៃអចលនទ្រព្យល្អប្រណីតនឹងកើនឡើង៣% ។
លោក Wu បន្ថែមថា ៩០%នៃការផ្គត់ផ្គង់ការិយាល័យថ្មីរវាងឆ្នាំ២០១២ និងឆ្នាំ២០១៧ គឺស្ថិតក្នុងទីតាំង Decentralised ៕
ចែករំលែកព័តមាននេះ