ប្រសិនបើនិយាយពីទីផ្សារអចលនទ្រព្យពាណិជ្ជកម្មរបស់តំបន់អាស៊ីប៉ាស៊ីហ្វិក វិនិយោគិនបានផ្តោតទៅលើប្រទេសខុសៗគ្នាចំនួន៣ ។
បន្ទាប់ពីប្រទេសឥណ្ឌាទទួលបានការវិនិយោគក្នុងផ្នែកអចលនទ្រព្យដល់ទៅ២,៣ប៊ីលានដុល្លារនាឆ្នាំមុន នៅដើមឆ្នាំ២០១៧នេះបានផ្តល់ផលចំណេញជាច្រើនដល់ទីផ្សារឥណ្ឌាផងដែរ ដោយទីផ្សារនេះទទួលបានការវិនិយោគរហូតដល់៤៧លានដុល្លារឯណោះក្នុងត្រីមាសទី១ ។
ជាមួយគ្នានេះ អ្នកជំនាញក្នុងក្រុមហ៊ុន JLL គិតថា នឹងមានការវិនិយោគបន្ថែមចូលមកក្នុងប្រទេសនេះ ខណៈលោកនាយករដ្ឋមន្ត្រី Modi នៅគ្រប់គ្រងក្នុងសភាដែលជំរុញឲ្យមានការធ្វើកំណែទម្រង់កាន់តែលឿន ។ ដោយមានច្បាប់និយ័តកម្ម និងការអភិវឌ្ឍអចលនទ្រព្យនឹងចូលជាធរមាននៅថ្ងៃទី១ ឧសភា គេគិតថា នឹងមានតម្លាភាពជាងមុនផងដែរក្នុងវិស័យនេះ ។
ក្រៅពីប្រទេសឥណ្ឌា វិនិយោគិនអន្តរជាតិកំពុងតែសម្រុកចូលក្នុងទីផ្សារប្រទេសអូស្ត្រាលី។ លោក Simon Storry ប្រធានផ្នែកការវិនិយោគអន្តរជាតិក្នុង JLL Australia និយាយថា ៖ « ការទិញរបស់អតិថិជនបរទេសត្រូវបានរាប់បញ្ចូល៤០% នៃការទិញសរុបប្រចាំត្រីមាសរបស់អូស្ត្រាលី ហើយពួកយើងគិតថា លំហូរធនធានពីបរទេសនឹងរក្សាកត្តាជំរុញដល់ការវិនិយោគ » ។
នៅក្នុងប្រទេសសិង្ហបុរីវិញ ក៏មានអ្នករង់ចាំអចលនទ្រព្យតម្លៃល្អជាច្រើនផងដែរ ។ លោក Myles Huang មកពីក្រុមស្រាវជ្រាវទីផ្សារធនធានអាស៊ីប៉ាស៊ីហ្វិករបស់ JLL និយាយថា ៖ «ទ្រព្យសម្បត្តិដែលបានដាក់លក់លើទីផ្សារដូចជា Asia Square 2 នឹងជាផលិតផលសម្រាប់ទាក់ទាញការវិនិយោគធំៗ ។ ចំណែកក្នុងប្រទេសផ្សេងទៀតនៅអាស៊ីអាគ្នេយ៍វិញ គឺមានវិនិយោគិនជនជាតិចិនចាប់អារម្មណ៍លើគម្រោងទាក់ទិននឹងការផ្តួចផ្តើមគំនិត One Belt One Road » ។
ទោះជាយ៉ាងណា លោក Huang បន្ថែមថា ការទិញក្នុងទីផ្សារដទៃ គឺពឹងផ្អែកលើថា តើមានអចលនទ្រព្យក្នុងស្តុកដែរឬទេ ៕
ចែករំលែកព័តមាននេះ