រាជធានីភ្នំពេញ ៖ លោកនុត ឈឿម ទីប្រឹក្សាសម្តេចតេជោ នាយករដ្ឋមន្ត្រីប៉ុន្មានថ្ងៃមុននេះ បានអញ្ជើញមកជួបសំណេះសំណាលជាមួយលោកឧកញ៉ាថុង អ៊ុយប៉ាង ស្ថាបនិក និងជាទីប្រឹក្សាសារព័ត៌មានកោះសន្តិភាព នៅការិយាល័យនិពន្ធកោះសន្តិភាពផ្ទាល់ ។
លោកនុត ឈឿម ជានរណា? អញ្ជើញមកពីណា? មានអតីតភាពជាអ្វី?
ខ្ញុំស្គាល់លោកនុត ឈឿម ច្បាស់លាស់ ។ កាលសម័យសង្គមរាស្ត្រនិយម ដែលមានសម្តេចព្រះនរោត្តម សីហនុ ជាព្រះប្រមុខរដ្ឋ លោកគឺជាឥស្សរជនជាន់ខ្ពស់ ផ្នែកនយោបាយនៅជាប់សម្តេចព្រះប្រមុខរដ្ឋ ។ ជាអតីតស្ថាបនិក និងជាចាងហ្វាងនយោបាយសារព័ត៌មានឈ្មោះ «សុជីវធម៌» ដែលជាសារព័ត៌មានល្បីល្បាញជាងគេនៅក្នុងប្រទេស ។
លោកនិងភរិយា បានអមព្រះរាជដំណើរសម្តេចព្រះប្រមុខរដ្ឋទៅប្រទេសបារាំង ដែលប៉ុន្មានថ្ងៃក្រោយលន់ នល់-សិរិមតៈ បានធ្វើរដ្ឋប្រហារថ្ងៃទី១៨ មីនា ១៩៧០ ។
លោកនុត ឈឿម ត្រូវបានមេដឹកនាំរដ្ឋប្រហារហាមចូលប្រទេសវិញ ។ មិនតែប៉ុណ្ណោះ ឧបករណ៍ និងទ្រព្យសម្បត្តិទាំងអស់ ក្នុងទីស្នាក់ការសារព័ត៌មានសុជីវធម៌ ត្រូវបានរដ្ឋការលន់ នល់ រឹបអូស សូម្បីកៅអីមួយគ្មានសល់ផង ។
រស់នៅនិរទេស ក្រៅប្រទេសមែន ប៉ុន្តែលោកនុត ឈឿម នៅតែអមដំណើរដង្ហែសម្តេចព្រះប្រមុខរដ្ឋបន្តរៀងរហូត ដើម្បីធ្វើការតស៊ូនយោបាយ រហូតបានចូលស្រុកវិញ ក្នុងសម័័យរាជាណាចក្រទី២ រហូតដល់ប្រទេសមានសន្តិភាពពេញលេញនាបច្ចុប្បន្នកាល ។
ពេលវេលានេះ ពិតមែនមានវ័យចំណាស់ទៅហើយក្តី លោកកំពុងមានតួនាទីជាទីប្រឹក្សាផ្ទាល់សម្តេចតេជោ មានឋានៈស្មើនឹងទេសរដ្ឋមន្ត្រីនៅឡើយ ។
ជួបជាមួយលោកឧកញ៉ាថុង អ៊ុយប៉ាង លោកសប្បាយរីករាយណាស់ ស្មានមិនដល់ថា កាសែតកោះសន្តិភាព ដែលជាសហតរៈពីសម័យមុន មានជីវិតរស់នៅដឹកនាំកាសែត «កោះសន្តិភាព» បានល្អប្រពៃ … មានឈ្មោះល្បីរហូតមកបែបនេះសោះ ។ លោកនិយាយថា ៖
-ដំណើរប្រព្រឹត្តទៅរបស់កោះសន្តិភាពល្អណាស់ នៅតែជាកាសែតពេញនិយម ទាំងនយោបាយ សេដ្ឋកិច្ច វប្បធម៌ កីឡា និងសន្តិសុខសង្គម មានរឿងរ៉ាវមិនអស់ ក្នុងកាសែត ។
លោកនិយាយថា ៖
-ខ្ញុំស្តាយ… ព្រឹកឡើងរាងយឺតបន្តិច រកទិញកោះសន្តិភាពតាមទីផ្សារ មិនបានសោះ ។ ស្វែងរកច្រើនកន្លែង នៅតែរកមិនបាន… សូមជួយឧបត្ថម្ភមួយៗផង… ពេលរកមិនបាន ។
លោកនិយាយដោយញញឹមថា ៖
-ខ្ញុំពេលណាក៏អានកោះសន្តិភាពដែរ ខានអានមិនបាន ។ ឃើញមានក្នុងវ៉េបសាយ ក្នុងវីដេអូដែរ ប៉ុន្តែមិនអស់សេចក្តី អានកាសែតទើបគ្រប់ជ្រុងជ្រោយ… ។
លោកឧកញ៉ាថុង អ៊ុយប៉ាង បានសម្តែងនូវការស្វាគមន៍អបអរសាទរ ចំពោះវត្តមានលោកនុត ឈឿម ដែលលោកឧកញ៉ាចាត់ទុកជាគ្រាដំបូងបានជួបគ្នា ។ លោកថ្លែងថា ៖
-ខ្ញុំបានជួបបង ត្រេកអរណាស់… ខ្ញុំបានចាត់ទុកបងជារៀមច្បង… ដែលមិនអាចបំភ្លេចបាន ។ កាលយើង នៅពីក្មេង ក្នុងសម័យសង្គមរាស្ត្រនិយម… យើងបានចងបាច់ មានសម្ព័ន្ធមេត្រីភាពល្អណាស់ … អ្នកអានទូទាំងប្រទេសគាំទ្រយើងភ្លូកទឹកភ្លូកដី ។ យើងបានបន្សល់ទុកនូវអនុស្សាវរីយ៍ លើវិស័យនិពន្ធសារព័ត៌មាន ដឹកនាំការផ្សាយល្បីល្បាញ ដែលអ្នកនយោបាយច្រើនណាស់ ជំនាន់នោះ ធ្វើដូចយើងមិនបាន ។
ក្រៅពីបានរៀបរាប់នូវអ្វីដែលមានចំណងទាក់ទងការងារពីសង្គមចាស់ដ៏វែងអន្លាយ ពីនេះពីនោះស្ទើរមិនចេះចប់ និងការទទួលស្គាល់រាប់អានគ្នា ជាភាតរៈភាពដ៏បរិសុទ្ធមក លោកនុត ឈឿម បានសម្តែងនូវការទុកចិត្ត ដោយប្រគល់សិទ្ធិឱ្យកោះសន្តិភាពចេញផ្សាយនូវកំណត់ត្រាជាប្រវត្តិសាស្ត្រមួយយកមកចេញផ្សាយប្រចាំថ្ងៃ ដើម្បីជូនមហាជនគ្រប់មជ្ឈដ្ឋានបានស្វែងយល់ ឬជាឯកសារស្រាវជ្រាវសម្រាប់ជំនាន់ក្រោយផងដែរ ។
ខ្ញុំសោកស្តាយដែរ ដោយមិនបាននាំយកនូវខ្លឹមសារដ៏ច្រើន និងល្អៗ នៃកិច្ចសំណេះសំណាលមកចេញផ្សាយ ។
ចែករំលែកព័តមាននេះ