ខេត្តឧត្តរមានជ័យ ៖ លំនៅឋានប្រជាពលរដ្ឋទាំង៨៧ខ្នងផ្ទះ ដែលរងការខូចខាតដែលកើតឡើងពីបំផ្លិចបំផ្លាញផ្លាញផ្ទះសម្បែងដោយគ្រោះធម្មជាតិ ភ្លៀងធ្លាក់លាយឡំនឹងខ្យល់កន្ត្រាក់លើភូមិចំនួន៤
ខេត្តឧត្តរមានជ័យ ៖ លំនៅឋានប្រជាពលរដ្ឋទាំង៨៧ខ្នងផ្ទះ ដែលរងការខូចខាតដែលកើតឡើងពីបំផ្លិចបំផ្លាញផ្លាញផ្ទះសម្បែងដោយគ្រោះធម្មជាតិ ភ្លៀងធ្លាក់លាយឡំនឹងខ្យល់កន្ត្រាក់លើភូមិចំនួន៤ ស្ថិតក្នុងសង្កាត់កូនគ្រៀល ក្រុងសំរោង ខេត្តឧត្តរមានជ័យ និងរន្ទះបាញ់ស្លាប់ម្នាក់កាលពីវេលាម៉ោង៤ល្ងាច ថ្ងៃទី២៥ មេសា កន្លងទៅត្រូវបានក្រុមការងារកាកបាតក្រហមខេត្តចុះជួសជុល និងកសាងឡើងវិញជូនពលរដ្ឋ កាលពីព្រឹកថ្ងៃទី២៧ មេសា ឆ្នាំ២០១៧។
ក្រោមការដឹកនាំពីលោក ស ថាវី អភិបាលខេត្តឧត្តរមានជ័យ និងមានការចូលរួមពីឧត្តមសេនីយ៍ទោ ម៉ែន លី ស្នងការដ្ឋាននគរបាលខេត្ត លោកបញ្ជាការរង លោក អ៊ុំសុភ័ក្រ អភិបាលក្រុងសំរោង ព្រមទាំងមន្ត្រីរាជការ នគរបាល ប្រជាពលរដ្ឋជាច្រើនរូបទៀត ដែលបានជួយជ្រោមជ្រែងក្នុងការជួសជុល។ លោក ស ថាវី អភិបាលខេត្តឧត្តរមានជ័យបានមានប្រសាសន៍តាមទូរស័ព្ទឱ្យដឹងកាលពីព្រឹកថ្ងៃទី២៨ មេសា ២០១៧នេះថា ក្រុមការងារបានចុះទៅជួសជុលផ្ទះសម្បែងប្រជាពលរដ្ឋដែលរងការខូចខាតដោយគ្រោះធម្មជាតិកាលពីថ្ងៃទី២៥ មេសា កន្លងទៅ ក្នុងនោះលំនៅឋាននីមួយៗដែលប៉ើងដំបូលត្រូវបានប្រើប្រាស់ប្រក់ស័ង្កសីចាប់ពី៣០រហូតដល់៥០សន្លឹក។
ដោយឡែកលំនៅឋានពលរដ្ឋដែលដួលរលំដល់ដីខូចខាតទាំងស្រុង ត្រូវបានសាងសង់ឡើងវិញ ខណៈនោះដែលនៅក្នុងជំហានដំបូង ក្រុមការងារបានប្រក់ដំបូល និងសាងសង់បានចំនួន៣០ខ្នងផ្ទះ ហើយក្រុមការងារនឹងខិតខំបន្តបន្ទាប់ទៀត។ លោក ស ថាវី អភិបាលខេត្តបានមានប្រសាសន៍បញ្ជាក់ថា អំណោយទាំងនេះគឺទទួលបានពីសម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ រួមនឹងអំណោយរបស់កាកបាទក្រហមខេត្តឧត្តរមានជ័យផងដែរ។
លើសពីនោះថ្នាក់ខេត្តបានធ្វើជារបាយការណ៍ដាក់ចូលទៅសម្តេចកិត្តិព្រឹទ្ធ បណ្ឌិត ប៊ុន រានី ហ៊ុនសែន ប្រធានកាកបាទក្រហមកម្ពុជានាំយកអំណោយចែកជូនដល់ប្រជាពលរដ្ឋទទួលរងគ្រោះនាពេលខាងមុននេះយ៉ាងឆាប់រហ័សបំផុត។ ប្រជាពលរដ្ឋដែលទទួលរងគ្រោះលើភូមិចំនួន៤ ស្ថិតក្នុងសង្កាត់កូនគ្រៀលក្រុងសំរោង ខេត្តឧត្តរមានជ័យ បានថ្លែងអំណរគុណជាទីបំផុតដល់សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ រួមទាំងលោកអភិបាលខេត្ត លោកស្នងការដ្ឋាននគរបាលខេត្ត មន្ត្រីរាជាការ និងនគរបាលគ្រប់រូប ដែលបានជួយជួសជុល និងសាងសង់លំនៅឋានជូនប្រជាពលរដ្ឋដែលជួប គ្រោះធម្មជាតិបំផ្លិចបំផ្លាញលំនៅឋាន៕
ចែករំលែកព័តមាននេះ